Zou Youth Organisation GHQ Nasep chiemte tham khen khat

Kum 25 sung ZYO in nasep tampi ana nei a, tuate lah a athupipen achiemte masah ahileh:

1. Kum 1997 Lamka buoilai in ZYO Volunteer-te pan lahdan phathuoi leh gentham ching mama hi. A shi-amangte sui a, relief material (panpina) hawm a, relief camp bawl a, shi-ding, man-ding jaulou a kalsuon volunteer-te pataat ahuoi mama uhi.

2. Kum 2001 in mipite’n ZYO a’ng puapha kia ua, tunitan khawllou kei a masuon thei a a um sungin ZYO Project Committee hing kisiemkhia hi. Tam Project Committee tungtawn in Project-te siem khiet ahia, kum 5 sung in mipi, mimal leh lamkaite kiphalna jal in Lamka khopi sunga Kamdou Veng, Awnchinkap Veng, leh Sielmat Buonsanlui baang ah Plot/gam acre a sim in Hostel, Hall, Cemetry leh adang dangte bawltheina ding mun Dangka a lakh a man ZYO in aleikhiet hi khangthu a di’a cheimte tham ching talua hi. Maban ah zong Project a peitou nalai a, Hostel, Hall chite I mu bai uh I ki nem uhi.

3. Zou khuo khen khat, khosung kivaihawmna Youth Club apat in ZYO a kipuah di’n kihen lamdangna a um a, lungdam a huoi mama hi. Tuaban ah, Shillong khopi azong ZWA chi’a ana kivaihawm zing pen ZYO Shillong Branch chi’n November 15, 2008 ni’n ana khelta uhi.  Tua mabang in Delhi a ZOD zong November 29, 2008 ni’n ZYO chi’a hen in umta hi.

ZYO GHQ THUSIM TOMKIM

Zomi Youth Organisation (ZYO) khu Zou sung a hatlaite Kum 14-50 kikal sung a mite (abihtah a Nungah leh Tangvalte) Phattuomngai Pawl (Philanthropic Organisation) kilawikhawmna, (Apex Body of the Zou Youth) ahi. Kum 1983 in azatat-huoi Pu T. Gouzadou, Ex-Minister, Founder President hina nuoi ah ana kiphutkhie hi.

I chi-le- nam a diing a sil hoi leh phattuom diing tampi Zomi Youth Organisation (ZYO) in tup-le- ngim (aims and objects) a nei a, apoimaw tangpite i tahlang ding uhi:

• Chi-le-nam khantouna ding in Nampi khut leh keng ahi ding hi.
• Chi-le-nam tawisangtu hi ding in si lhoi bawl a, Pupa tawndân leh ngainate, thu-le-la, ham-le-pau kembittu ahi ding hi.
• Panpitu ding neilou, Genthei, liengvai, meithai, taga, Sietna tuohte panpi ding leh kem a, enkawltu (kalsangtawi) ahiding hi.
• Khotâng sietna leh sil hoiloute (Social-evils) doudâl leh siemphat ngaite siempha a, Khotâng hoina dîng, sienthouna leh damtheina dîng a panlatu ahi dîng hi.

I society sung ah ZYO a manphatna leh a poimawdan i thei zounai tadisih ua, i zat na ding amun leh ahuntah ah aphatuomna ding bang in i zang thei nai sih uhi. Azal i zou ding bangtah a, i zoutheinailou jieh un i nampi adia vangsietna chi khat ahi hi. Zou khosuonna/Zou hausatna khuo leh UZO unit dintheina khuo khat a ZYO unit dintheilouna khuo khu Zou khosuon dihtah a chingthei sih (bukimlou) chi ding ahi mai hi. I Zou hina dihtah, i hoina leh phatna (i giel) i suhlat theina ding lampi um sun khu ZYO ahia, i pibawl a i ngaisang/ tawisang ding u khu poimaw-le-kul ahita hi. Hun hingpeitou zel ding ah i nampi in ZYO a poimawna hing lien deudeu ding a, sa-le-gal, shi-le-man, siet-le-khat i tuoh chieng a, i nampin a masawt ding leh i thatang a, i nampi vanzat poimaw ding khu ZYO hing hiding ahi. Tuajieh in Zou umna taphot ah ZYO Unit a um ngeingei ding ahi.

ZYO Silver Jubilee | Zou Youth Organisation Kipuihuoina Danbu (171)

Print PDF