Zuauthu Lamleeng Vangin Maw Tongchiam Simthu i Ngilhta Mei
By- Khup Simte Seldou
Simlei tung mi zatam lai a deih chi bang kana teelsa vangngaih “ CHICHING” kei dingin kum bangzaat hung pai in nii bang zaat vei hung suahin hung tum jongleh nang ngaih lungzuan baanni um nawnlou ding.
Pathianin mihing a siam chiil in pasal ana siam a, himahleh pasal amah chouh a aum ding hoih sa lou in a um pih tu ding in pasal naahguh lakhia in numei ahung siam hi. Huchi in pasal te naahguh apat numei ki siam ahih dung zuui in Pathian in zong zi le pasal a kineituah ding in mihing te phalna ahung na pe ta chi phot ni maw…hehehe…
Humah bang in kei zong pasal in ka hung piang a tahsa lam a ka hung khanglet dung zuui in khangthah te tengteng lunglut na LOVE i cih uh khangthah te ki iit tuah na te ah ka hung kibual ve tei sam ta hi. Huchi in nungaah nou khat toh hung kimu tuah in vangngaih simthu khau bang ka hung suut pan ta uhi. Huchih hun lai in Chiching toh ni khat chu hung kimu tuah in hi hun ah ki mu ding leh ki houlim ding chi in hun lem ka hung sep ta va, huchiin hun hung pai in huhun chu ahung tung ngei ta hi. Numei zahtaat mi leh numei a mi maingal lou ka hih man in kava pai a kava kihou pih ding zong ka zum tuntun a mite hung heet diing bang ka lau mahmah mei hi. Ahih vangin lamkhat ah ka kithalawp mahmah a, inn apat ka pawt diing kuanin ka neih tengteng agim um thei teng teng kinuh kitaat leh kizuut in ka hung pawt sawm ta hi.
Huchi in ka kichiam na uh daah ahung chingta ngei a, ka phone ahung ging a, ka et leh amah ahung hita ngei mei a ka la a ka hungta hung tung ding ka hi ta chi in ka heem a, huin zum leh saili in koimah a sisih a chih uh khu ka hung hedoh a tahchapa chi in ka va juan ngernger ta hi.
Huchi in aman zong lungke lou in kuhkal tahin a hung na nga tiingteeng a, Simveng a pat a gamlat sim jiah in 20 mins vel ka pai a huin a kawm chu ka tung ta ngei hi. Huphet in aman zong hung lungthah san ngeei diing chi a ken kana ngaituuah pen aman ahung muhmuh in “Uhau, hung tung ta maw” chi in a hung na welcome ta a, ka diip in chu “kumgup kumgup” achi den a, a khawlthei sih a, himah le aw neem tah a ahung na houpih na jiahin ka nuui a, ka ki chibai va, ka hung toukhawm ta uhi.
Huchi a thu khochaang teng ka hung ki houlim joh un ken zong Ching tuni in nakawm ah geen uut tamtah leh dot ut tamtah hung nei ka hi ka hung chi ta a, huin aman zong Uhau na gen ut taphot gen in Nageen taphot ka ngaikhia diing ahi ahung chi a, huin kenjong ka lungsim a umte amah ka ngaihdaan thu te leh amah ka iit dan thute geen diing in ka hung kisa ta hi.
Huchi in dotna tuamtuam ka hung bol panta hi!
Hau: Ching na hung ngai ei? ( zum sim deuh mei in)
Ching: (Nui sim heuhau pum leh hung eng ngam lou in)
Hi Uhau ngai tham e, Nang kei hung ngailou maw? A hung chi ta a, huin ken jong,
Hau: Ngai e Ching kang ngaih zia leh kang iit zia a hitah a hung kahi, kachi kit a, huphet in ken jong
Hau: Ching na hung lungsiat tahtah nai? Kei tagah le genthei mimawl pen hi ing a.
Ching: Uhau na gentheih na leh na tagah nate zia mahmah in ka hung iit a ka hung lungsiat tuntun ahi zaw.
Huphet in ka dot sawm dang tengteng nusia in Ching ka kipaah talua nahung iit a na hung lungsiat tahtah le damsung in gentheih na ah nopsah na ah huleh lamtuamtuam ah hita leh kei adiing leh ka inkuan te a diing in na hing ngaap na diing maw? Ka chi a, aman zong Uhau tham e, ahung chi a huchi in naupang takhat tuaah himah uleng zong Khupching leh Ngambawm bang khop in damsung a kikhen lou diing khop in ka hung kichiam ta uh hi. Huchi in tomkhat jou in inlam ka hung pai va, a inn tan uh ka va thah a, huchi in kikhelah tah leh kingai tah in ka hung kikhen phot uh hi. Huchi in hun leh nite hung paitou zelin school exam na ding a hung nai deuhdeuh ta jiahin kihou leh ki muh jong ka hung awlbol tava, meel kimulou in ka hung um va, huchi bang a 3 weeks vel kahung um joh un ka hung ki mu tuah kit va, ken jong dotna mah ka bolkit a, Ching , khualjin diing nahih le tangvaal tamtah ten hung na heel saam ding ahih chiang un humiten ei nihgel kaal iitna simthu hung suhtan sawm in nang kawm ah iitna simthu jong a hung suut ngei ding va, hu te lah a ginum in kei a diing in nahung pang jou na diai? Ka hung chi a, aman jong “Uhau mi’n bang teng gen leh jong kei chu nang a kahi jing jing ahung chi ta hi. Huphet in lungnuam tah in solha taang nuaiah kholai ah ka hung ki ton lehleh va, 9pm ging diing ahi ta a ken jong Ching, in paiphot lei la maw? Ka chi a, aman jong Uhau khiatlah ahuai vele jingni hungsuaah leh amual zatam ten ahung hal diing a kizin khe ta ding a ahung chi a, ken jong kapai pih a huchiin khelah tah in kahung kikhen va amah lah jingkhua hung vaah hunhun a jin ding ahi ta a huin ka ki chibai va, jin nuam in la kumthah a nanuih mai meel mu ding i ka kinem jing, tongchiam simthu te heina mun teng ah paitem bang kuah in aw kachi a, kapai san ta hi. Huin ahung nung et vungvung a amit tui asiaah tamei a himahleh ken chu kapai san ta thouthou hi. Huchi in jaankhua a imu lou phial in ka um a jingkal khua hung vaah ding chu ka huphulh mahmah a, himahleh kei houh/khaam gual ahi sih a, jiingkhua chu a hung vaah tangei a, kei a diing in chu vui nani leh lungzuan zatam sial patni ahung kipan ta a, himahleh mi tamtah te a diing in jo kipaah nani jong hikha in te. Huchi in Chiching jong jinlou thei ahi tasih a, huin gari kingahna mun ah ka vapai a tongchiam simthu namdet na ka va nei thah va, hujoh nung sotlou in aman chu inkuan tetoh kimu tuah ding leh hun nuamtah a zang diing in a hung paikhia san ta a, ngai selua in ngailou bang a um in innlam ka hung juan ta hi.
Huchi in kei a ding in chu sunni asawt a, zaan khua hung mial kaal ka ngaah lah mahmah a, ahih vang in zaan ahung hi a, zaan ahung sawt jo chehcheh ta hi. Misi sa puul idou leh amah aum nawnlouh jiahin neukhat adou nop abang a, mihing lai puul dou jaw aw lungkham na tam hina e ka chi nguutnguut a, ahiinlah ka tuah touh chu ahi ta mei hi.
Ni 10 zoh veel ding in ka phone ahung ging a ka la ta a, huin Aw neem tah mei in Uhau ahung chi ta meizen a, ken jong Hoi ka chih leh na dam na maw, Nute la ahoih jeel viai ahung ki chi a, ken jong hi ka dam uh ka hoih veh na uh ka chi a, huin aman Chiching ka hi P.C.O apat ka hung call ahi a chi a, huin ka haa amuang tuam mahmah a, Sawtlou kakihou joh un line ahung tan a, kihou jom thei talou in ka hung um tava poikasa peetmah a ahiin kei thu ahi tasih a, Chiching in la khual hung jin san ahih chiah ka thawm hau mahmah a, kaal bang jaat aha jou in ka bil ah thuhoih lou ahung lut panpan ta hi. Huchiin Chiching geen siat na ngen thu ahung lut zungzung ta a himahleh ken amah kawm apaat thu ka ja ahihlou ziah in ka ging ta thei sih a, ka manglam zong bang ka sa hi.
Huchiin hun hung pai tou jel in Christmas hun a hung tung a mite kipaah tah a um te ka muh in ka eeng mahmah a ka thangse tuntun hi. Hunte hung pai tou zelin kum te hung thah in Chiching jong lehkha sim na mabaan sun zom ding in ahung tung kiit ta hi. Huphet in a hung tung ta chih ka hethet in ka delh a ka va mu ngei a , huchiin thu um daan ka hung kan pan ta hi. Huphet in aman jong zuau thu hi Uhau kei nang a ka hi ken kua mah dang ka ngai sih a hung chi ta a, huchiin lung muang tah in inlam ka hung ki leh kiit ta hi.
Huchiin hun hung pai tou zel in Chiching in tangval dang toh a hung kop chih thu ka ja tam ta luatzia in nuam ka sa sih mahmah ta a nitaah khat chu thu top bawl ka hung ut ta hi. Hu in ka va pai a thu ka dongdong a, aman jong bang mah hung iim lou in tangval khat in zaw ahung try mah ahih vang in ken nang kawm ah iit na thu ka hung chiam man ta zia in amah dawn na ka pe sih ahung chi ta a, huphet in ken jong Ching amah hausa a lehkha lah siam a chitna jong ahau vele maw ka chih leh aman jong Uhau nang kei amah ading a hung phal maw? Ahung chi ta a, huin ken jong nang thuthu ahi mei kilian sah tah a ka hung chih leh ahung pot san a, bang loh theih hitalou in ken jong ka pai san ta. Inn ka tung in ka phone kala a ka call a huchi in ka kaal va thu lamleng te jiahin kenjong khen ding simthu ka hung leel ta mei a, huin Chiching jong hasia kisa in a hung kap huthut a himah leh hubang thiltung ahih leh chiin ken jong thutop ka bawl a damsung a diing in mangpha ka hung haahta hi.
Kum bang zat aha paita mah leh kei selung lai ah Chiching lou lia dang a um thei sih a, kum bang zat hung pai in nii bang zaat vei hung suaah in hung tum jongleh ka lunglai ah vaibang atham jing a, himah leh mihing ki iitna guitunglou chu ahung hita mei hi.
Hujiah in Simtu te tengteng iit na dihtah a ki iit tuah theih chiat sawm ni in, mi kaal subuai tu hilou a lemna siam tu hih chiat sawm zaw niiu.
Author’s Note:- Min ki bang kha leh hibang taang thu toh ki tua a um kha in a um u leh kingai siam ni, tangthu pen analh thei di leh a sim nop thei di tawp a hung ki gelh ahih man in, a kiphuaah tom ahi.
http://www.simtepeople.com/zuauthu-lamleeng-vangin-maw-tongchiam-simthu-i-ngilhta-mei/
