May kalnina seppatniin Hoinieng leh alawmnu Chiching sangkai dingin kuon uha, lampiah thu tuomtuom houlim uhi. Chichingin, “Lawm Nieng aw, na mouin tabangin gen ve-aw- Hoiniengin ka innsung uah, van guhlahin azuamang zel hi” achizouin, “Tahsangsing, chin niel lengzong miten adihma hi chin pangtinten valong uh! Bangchidan atai?” chin alawmnu dong hi. “Van mang, chin gen dendonma e! azuau leh atah kitheizoutalou akhulah, lawm!” chin ang dawng hi.
“Kou innsung khu anoplouna sawtta. Ka u Lien loan lahzouzoua kipan hita. Kei genlou ka nulepa ngel zong bangma genngamloua um mai ahitahi. Ka mouin chidan tuomtuom bawlin kituohmawna ding leisui hin ka theihi. Kei zum vatun ing. Tulai ngelin kholai zong vahngam nawnlou ka hi. Nang hing theisiem china, na kunga um nuomka sa hi” chin Hoiniengin ang dawng hi.
Khuchibanga houlim kawma ang peizellai un Sanginn Kelkot ang tungta uhi. Sangshieten Kelkota sangnaupangte chek abawl zing uh ahia, laizilna toh kisaikhalou Van- Dummuom, Khaini, Tepthei, adg. puohlut phallou ahi. Akaina uh Zougam Higher Secondary School khu sanginn hoi leh minthang mama khat ahi.
Hoinieng Mathemtics Instrument Box sung apat aSangshienu un, dangka sangtampi man ding Sanakhiba khat ang zankhe laizang hi. Sangshienun, Hoinieng khu ginmaw bawlpaiin, “Tami Khiba koi a hi, na chi ei? awleh nangma e?” chin adong hi. Hoiniengin zong patautahmai a, a awm amaileh ama khiba angawngah lungmuongtahin akikhai nalai hi. Tuabepin hoitaha enphadepin, “Shienu, ka Mou Nieng khiba ahi!” achizouin alawmnu kungah “Lawm, en aw! tunvang akhohvawt sil khat hing pieng ding hie!” achigiap sam hi.
Sangshienun gingmaw ahijiehin bangmadang dong nawnseselouin Shiepipa (Principal) kungah a puita hi. Sangshienun Hoiniengte innsung thuthang na zakha ngai hi dingin Chichingin angaisut hi. Hoinieng khu Shiepipa pindanah umdenta hi.
Shiepipa zong lamdangsa, ahivang-alah Hoinieng khu tuabanga gamta dingin agingta vawt sih hi. Ajiehpen, Hoinieng khu aneu apat tua sanginna khanglien ahibanah, laisiem, thumang leh umdan hoi pena chiemte laha khat ahi. Shiepipan zong lunggel kawmkawmin, “Hoinieng tami koia hi na chitai?” chia adohleh, “Ka mou Nienga ahi. Bangchidana kei vansunga um adieimah ka theizou vawt sih hi. Shiepipa aw, ka innsung uah vanmang tamsimta a, ka mou Niengin kei ang ngawzing hi” achibelap hi.
Shiepipan thudong dia akisahlaitah in Chowkidarpa hing lutin, “Pu mi khatin hing kimupi ut. Kang lutsah dieimah?” ang chi hi. “Hing lutsahin” Shiepipan achi hi. Gintatloupin Lienpu maisanzenin ang dienglut koimawh hi. “Bangthu ataile?” chia Shiepipan adohlaiin Hoinieng zong akinuaheileh, koi midang nahilouin a u Lienpu anahi hi. Hoinieng lungsim mit-ha ah sil um dingdante ang kilangzaizai mai hi. Tuamabangin Lienpun zong Hoinieng amutahin azi thugente ang tahsangta deudeu hi. Hoinieng leh Shiepipa pangkhawma, kikhutsan zel hiding pouin agingmawta mawh hi. “Pu, ka nau Hoinieng kimupi uta hing haw ka hi” chin Shiepipa dohna adawng hi. “Tamnah aum khulah” achileh “Innlam ah ka pui thei diei?” chin anget bawl hi. “Tuni Physics Practical nei ding ahi ua, hitheileh peidaleh hoiven. Ajiehpen practical khu bawlsa nuabawl chi umtalou ahi” chin Shiepipan ang dawng hi. “Innlam ah thubuoi khat nei unga, ama poimaw ahijieha hing la ka hi” Lienpuin ang chi kia hi. Khiba khu hing khaisangin Shiepipan, “Tami thu amah?” ang chileh Lienpun zong thanuomtahin, “Ing heh, ahi hi” chin ang dawng hi. “Khiba tawi inlen ka gen bangin Hoiniengin aClass ah pangleh avelemaw?” Shiepipan ang chileh “Shiepipa khat lawmlawmin nang panpi malaha, guta na hupbawl valongin” ang chikhiet maleh, Shiepipa zong zadatasengin amai sawnphengsan ang bangvawt hi. Aw khautahin, “Hei ! Hing genkia vawi! Pilvangin Hoiniengkhu naupang hoi ahi” chi toh sawlkhiet athuota hi.
Aham-aphun um seselouin utate zong akizuipawt ua, Scooterin innlam zuonin ataita vingveng uhi. Inn atuntun un Limpia (Drama) kipan ahimai hi. Deinieng zong tup tung kisain thang-altah maiin, “Nungah gutanu, nang tung ngamnalai e? Michavai” chi toh Hoinieng khu aSambuchinga manin athinin athingta maia, sah leh hang senan anei thopthopta hi.
Kikou vavungin, “Na tanu uh na huphup uh, tun na thei uoimah? Khiba Sangsawm val man gungam nun kei zong hing that ngamven” pou, a ni leh gang zah din achi zielziel hi. Hoinieng, tuola bohlai alutang hing phongkang in aw kithing kawmkawmin, “Pasien in theinaven” ang chisamleh amouin munphie khat manin sat chitahpimain ang sat belap nalai hi.
Amauh innkuon Limpia bawl en ainn kim uah mi vum maita hi. Hoinieng zong awla hing thoukhiein, leituola, alaibu kithethaangte hing tomkhawmin, nulepa toh damkhawmlai dingin zaw na saseng hiding hiven, kap zong kap theinawnlouin asa-ih mabangin akisathaw latlat mai hi.
“Thei kisa nahileh kizuitaveteh” anun achilaia, a u Thangbawi azuilou kisiain, ahasiettha ang kuong deudeu hi. Amouin ama kung lama tukha laibu khat hing tawmin “Zummawnu, vanteng na zuabeimasangin pawtkhe mengmengin” chitoh aelzang senan ang nei hi. A laibuteng akhopzouin Hoinieng zong ahi-anap pumin innsung lam ah alutta hi.
A ente laha zukham kiphasah pawlkhatin, mipi dingkhawmte kungah, “Lila lawire, chatlaw, chatlaw!” chi ua, mite zong apeisiengta uhi.
Hoinieng zong avanteng Suicase khata guongin pawtkhe dingin innsungpiah ang dom phei hi. Tuongphei laitaha khawlin ang awina uoimah? chihileh kilawmin anulepa aen hi. A nulepa ki-entuoin, tuazouin Hoinieng aen ua, Hoiniengin zong aen zing hi. A nu amai huma kunin akapa, apan, “Bawi nang nasanin nang pawtmangsan nalaileh kei bangsuoh ding ka tai?” achileh amittui guosiengkie ma abang zawizawitamai hi. Hoiniengin apa hing nai pheiin ahituite ang siasah kawmin, “Hepa, Pasien apmai vai e” achizouin ka u Thang kunga pei ding ka hi. Pa aw, lungkham sin, na ut pouleh hing pei un aman eite hing it hi” chin apa achiel lah hikawm ahenem lah hikawmin ang chi hi.
A u Thangbawi mabangin ahitui-naptui toh, apienna, akisahtheipi mama, theitawpa, azut leh azep zing inn khu khelalou keiin anuasieta hi.
Ka umna inn avatun leh Saw (chabi) na kikil ahimanin lungkham-lungdongin innmai, behaliepah sah leh hang en in adingdingtamai hi. A dahlelea, achimawna khu zumna in angbelapa, tuate im in selmang sawmnanleh hitui lah tawptheilouin theiloukalin abientgel adim paipai hi.
Chinadingkan theituonlou ahimanin, ahitui kisiasiengin, innliep tuongtungah avan nuasiein Chingnute innlam zuonin apeita hi. Apeilaiin alungsimah …. Dachiengin, ka theilou kala, ka u Thangbawi mundang, gamdang khata na pawtkheman hitaleh keipi heia bang suoh ding ka ta….chi gelkawmin dipkuo leh zauthawngtahin mailam azuon zel hi. Aloutheiloua, haw ngai, zumhuoi lah samama, upaten zumna huoisevawt milaha atuohkhah chieng ua, ka nuoi vangleh lut-hiauvang, achi uh dinmunah Hoinieng dingkha ahimanin, alungsimah khatveivei, hin kinepna hing tawmin tam Leitung hinkhuo taisana nuomtaha khawldam mai utna bang ang um zel mawh hi. Dawimangpa sawlna hiven, Pasienin hingtaisanta chilah hiloua, bang ka zauna dieimah? chibangin amale-ama akihenem zel hi.
Atunkuonin hoitaha kinulsiengzetin Chingnute innah avalut hi. “Nu Nieng aw, ka u Thang hawna na theikha ei?” chin kinemtahmaiin avadongtahi. “Hing tou photin. Tu suntanglaitaha bang ding na chi e?” chin adawng hi. Hoiniengin zong adawn dan ding kan theilouin kunsuhin anuoi aen denta mawh hi.
Nu Niengpin zong Hoinieng umdan apatin bang aheikhat um hi-ngei dingin agingta pai hi. Vadohpai giagua ding lah nopsaloudeu ahimanin, “Na u Thang zong theitasing e, interview ding chia kimatmata Phai haw mielmuol akhulah” achizouin, “Nitahlam chiengin hing tung pan ven” achi hi. Hoinieng zong kakha-katam chiseseloua pawtkhe dia akisahleh, “Touin Niengtui dawn photvai” chin nu Nieng in akham hi. Hoinieng in zong kizen e chin awlin atouta hi.
Nu Niengpin niengtui hing tawiin adawnkhawm ua, “Hoinieng aw, bang toh kisaia, chimawhleia, na u Thang nang sui e?” chin awnemtahin adong hi. Hoiniengin zong ip sanga siengthoutaha hilmai khu hoizaw dinga gingta ahimanin sil umdan zousie ahilta hi. “Tuabang ahimawhleh, na vante valatanlen, tamnah na u Thang na ngah maiin” achi hi. Hoinieng zong banglawtheilou zum leh Sailia shi umlou kichi hiven, Pasien hing lemguotsah hiva e, chin kipahtahmaiin avan valain ka tunkal ngahlatahmaiin tua munah ana um zing hi.
New Bazar Bus Station a ka kumkhietleh Chiching hing taiphei zinzenin ka kungah, “U Thangbawi, nang, Phaia hingkipan maw? ang chilaizang hi. Ang chidan leh amelpuoh lamdangdeua thei inga, “Hi, Niengtui dawnvai aw” chia ka chiel bawlleh aman, “Kei ka lawiten khunah hing ngah uh” achizouin, “U Thang thukhat hing genvang, tuni zingmawng sanginn Kelkotah ka sangshienu un lawm Nieng Instrument Box sungah Sanakhiba khat hing mukhiein Shiepipa pindanah puia, nitahtana kimukha nawnlou ung a” chia agenlaia lungluttah lehlamdang sataha, ama enkawma kamkahzena ka ngaikhiet laiin, “Kei lah tutan innah vahaw man nailou inga, nang zong lah Phai haw hing tung pan hi chin amaw?” ang chibelap hi. “Kimu kia zel nai eh, lawiten hing ngahla tuohta uh” chin ang peisanta hi.
Innlam zuonin ka nawlenta hi. Innah ka vante koikhe mengmengin Chingnute inn vakan masa dingin ka nawlenta hi. Innmai innliepah nu Nieng na touin, “Hing tungta i?” ang na chia. Ka dawn masangin, “Nang lawchintuoh naimah?” ang chikia hi. “Kinem thou ing” chin ang dohna masa pen dawngtalouin anuakhiazaw pen ka dawng hi. Aman zong, “Lungkelouin bawlzel lechin khatvei lawchingna vechin” ang chizouin nauten ann anehlaitah uh ahi, na nehnailouleh vakinehin” ang chi hi. “Hidaheh, kisilnailou ka hibanah, hawna ding khat neinalai ing” ka chileh nu Nieng zong bangamahkhat hing theikhie hileh kilawmin, “Eh! Hoinieng zong nang hing ngaha tamna um ahi ngutveh, kei mama kang mumua gen masah pen ding ka chi hinapin amangngil man ka ta khuh” ang chi hi. Lawptahmaia vanaipheiin nu Nieng kungah sil umdante hing gen sieng leh china toh, “Zingkaal apat hing ngah chimawh?” ka chileh aman zong sil umdan zousie kimtahin ang hil hi.
Innsunga annnekhamte ang pusuo sausau uhi. “Na u Thang ann ding na bawl pieh un” chin nu Nieng in Mary kungah agen hi. Ka lutleh Maryin, “U Thang na kisil utleh kisilmasa lechin” ang chia kei zong kisildepin tuazouin ann ka ne a, nitaha Chinlalte unau lai ka hilzouin, Hoinieng khu Chingnute inna gieh dinga nuasiein, nitah dah 10 lahvelin ka peita hi.
August 15, 1989 nitaha All India Radio, Imphala Paite Vaiguonah Paunouin asah ……
Ka neulaiin khomuikuan chiang,
Ka lawmte toh ka kimawl theizela…
Tete hong ham chiang…
Ka nuin hong sam chiaichiai e…
Ka ta aw innah hong chiahtain hong chi….
Ngil ngei kei ning e ka tun aw khum…
Gamlapiah khualzinin…….
Gentheih haksat namchih ka tuah chiang……
Belh ding neilou ka lung zuan chiang…….
Hong it ka tunnu aw khum ngai ing e……..
chi la hing suoh laizang hi. Nidang hundangin zong ka nun za ngaiin, zong ngaikhe ngai thama, hinanlezong tunitaha, a zah leh thei toh kibang khangailou hi. Ka neulaia, ang it, ang ngaia, ang hawmthaw va-ngut, keima ngel zong inn ka pawtsan kuon kum 3 sungteng chilou teng mawngmawng alungkimna mama atapa ka hidante hing theikhethain, hoi asahpen, nupiten huisem ding zong ka phallou achidan ua ang it leh deithaw vevaw ahidan leh inna pawtkhe dia ang naw laitaha ang chilphikhum laia, na limlim toh thumanglou dingmain kilawm chie, ang chilai hun khu alungsimah hing kilangkhiein, hasiein akap hi.
Amauh thu zong hisamloupia, inn taisana, neilelam zousie tannalai Thangbawite unauin tam Paunou lasah banga, apienna nu uh achimaw-achithei hun un ngai va-ngut ding un agingta a, alungtang thaltang sutkhah mabangin na asa hi.
Alawileguol toh nekhawm-dawnkhawma hunnuom mang Deinieng hing peiin Muloutongsan hehmitin Tape Rocord ang haging zaizai hi. Apamlamdeua khawl alawmten, “Lawm Nieng, Lie leh Tang Cassette hing vaw aw” ang chi-uleh Deiniengin zong ang thuoa…………
Zawnglua bangmah neilouin ………
Hong it hong ngai muzou keng e……
Miten hong simmawh e………
Leitung mite ki-itnain……
sumlepai bek hi……..
Ki-itna maan, ki-itna taktak
Leitungah om kei….
Hauna, pilna, sumlepai………
chi la ngai deumaiin ang ha ging zaizaimai hi. Ka nu adingin hima liemsa a Chi (Salt) saw ma abanga, anau Neita chia adeitel vevaw Deinieng in inn ang lutni akipana…… adeisahdan, aitbawldan, anehngaidante zousie athain ang geldohkia a, amaute akipana mu ding lam-et bangma aumnawnlou pheta, tuate zousie huisemmang bangtamai achileh nahngeh nain ahi-anap kisiain, tua la kiha khu zong ama dinga kiphuoh, kisa hiva e, achi va-ia hi.
Deinieng leh alawmte adingin lah, Zoumi lasiem khat lasah, lawileguol toh nopbawl, hun suhbei nanga, angai ut uh ahileltah hi.
Tambang giapa ka nulepan hun aman laiun langkhat lamah kei, zi nei, innsuon dan ding buoipin ka kitahla mama hi.
September kalmasa nipini zingmawngin Gandhi Avenue, Imphala um State Bank of India a sem lawm Zampu ang haw hi. Innsung ang lutlutin, “Kalaisai! Congretulation” chia akhut hing zankhiein chibai ang buh mawh hi. Athu-ala theiloupin, kei zong dingkhiein chibai ka buh hi. Khuchia ka kituh laiun Lecturer dinga interview ka bawlna lawching ka hidan ang hil hi. Kipahtasengin gen ding tahpi zong theilou khopin sawt sim ka um hi.
Tualaitahin Hoinieng ang lut hi. “Hampha mama chie, lawm Nieng, na u Thang in Lecturer nna muta a, tunvang na ut tantan laisimthei ding nahita khuh” chin chibai abuh hi. Amannun zong, “Hi i ! Kipah nang e” chi toh chibai ang buh hi. Thudang tuomtuom ka houlimlaiun Hoinieng in maingaltahmaiin, “U Zampu meltha mubai ahita diei mah?” chia adohleh “Lam-et huoilam hita” chin adawng hi.
Ka thum un zing ann ka ne ua, aman ang pawtsanzouin Hoinieng zong Sangkai dingin akuonkheta hi. “Hoinieng, Chingnute innah bangmalam inlen, nu Nieng kungah Chingnu hing hawzuol heh” chin genmalamin chia vaihahin kinemtahmaiin ka ngahta hi.
Sawtloukalin Chingnu ang tung pai hi. Ka thuthei pen hil ut hinapin, gentheizuollouin taimeltahmaiin ka ensaldenta mawh hi. Aman zong lamdang hing sa hingelva, zauthawng melpawtahin, “U Thang bang ding nang chi e?” chin dam hiauin ang dong hi. Ka kunglamah hing peipailouin ka dawn kal ngahin aumna ah adingdenta hi.
Ka gen ut pen gentalouin, “Hing pei aw ngainou tuibang gawm ding simthu leltai” ka chikheta mawh hi. Ka lawmnun lah lamdang hing sadeudeu hilekilawmin ka theia, hing peiin awlin ka kungah ang tou hi. Zum sim atadieimah, abiengtegel ahing san tiytieia, mel-hoi ka sadeudeu hi. Kipomlou deuin ka toukhawm ua, Chingnu azau abang hi.
Chingnu kawipheiin, “October, 1988 niguh ni zana kotlama ka thugen banzomtalei chi ka veleh Ching” ka chileh aman zong ka maitang hing enkilkel kawmin “Asunzom zing hivai ka kichia?” chin ang dawng hi. “Khunia ka thugen nukhiapen khu bang atai? Awleh na mangngilta e?” Chin abieng nou thitthet khu awlin ka khuttalin ka zutsah hi.
Nuiin akunsuha, akhutmete pou hiehin ang dawng sih hi. “Manghiltahpi hivachie!” chia ka doh sawnsawnleh awl a hing dahkhiein amitsingin awlin alutang avihlele hi. Ka tungah awlin ang kingampheia, “Na kimantahtah taimah?” ahing chi hi. Ka za-ip sunga lawm Zampu hing puoh Appoinment Order khu lakhiein ka pie hi.
Chingnun awla sangin adingkhie hi. Asimzouin bangmadang zong genlouin ang pekia hi. Ama laisim sungteng ama ka en zing hi. Ang piehzouin kinuaheiin pindan ninga table neu tunga Laisiengthou kikoi khu valain keilamah ang kinuale hi. Ka mai gamlalouah dingin Laisiengthou aphetzela, ken lah ka siel etdenta mawh hi. Hunchikhatin tambangin ang simkhie hi :
Jakop Pasienin apanpia,
Mangpa a Pasien tunga,
Kingahdan siemmi khu ahampha hi.
Ama khu Van, Lei, Tuipi leh
Asunga um zousie siempa ahi,
Aman athuchiem atudet zing ngala.
Bawlsietna thuohte aman ahuma,
Gilkielte Aman ann apie hi.
Thongkete Mangpan suotatna piein;
Mittawte mitvahna amusah hi.
Apuosate Aman akaithoua,
A midihte ait hi.
Ka gam ua teng gamdangmite
Aman ahumbita;
Meithai tagate Aman apanpia,
Migiloute ngaituona asusie hi.
Kumtawna Lengkhu Mangpa ahi!
Aw Zion na Pasian in
Bangchitanin vaihawm zingtava.
Mangpa phat un.
chia ang simzouin “Lapite 146:5-10 ahi” ang chia a Laisiengthou vakoikia hi. Hing peiin, “U Thang, kipahpetma ing” chin chibai ang piea, ka khut hanawnlou in ka kungah ang toukia hi.
Kei lah ka silbawl leh umdanah kizumpiin leh kisuonlanan ka dimdenta hi. Ka kipahna uh asan, angiem kibangkhana dinga, kei penin, hing panpin Mangpa chia ka thumzingna Pa Pasien kunga kipahthu genmasaloua, ka Zounaw paipai jiehin siemmaw ka kitanmama hi.
Chingnu khut hakhelouin ka tudena, aman, “U Thang, Pasien muongngampoulei Aman ei adia sil hoi atheina hi, ka chi mawng hilou i?” ang chi hi. Ka dawn masangin ka khuta ka bu Nai thamkawmin, “Ichialama na thugente zong ka theina hi. Enin, kei zong tambang ka higiap hi. Bangkim nang chidandan ahisih dieimah” ang chi hi.
Ka maitang hing en kawmin, “Ahivangin kei pen nang adingin tam na Nai manphat tuhin ka manphazou dieimah vang theising, kimpi-lenpite toh tein kei pen guolluideumai, kisathei, lawmleguol pawl utloua kigen, innsung ngiemtaha hing khanglien ka hi. Ahinvangin nang it pouleh kipahin, tuate zil dingin ka naupang thounalai hi” ang chi hi.
“Chingnu kipahmama ing” chin a khut ka tawpa, aman “U Thang i nu na lunghimawkhaleh kou innlamah vahkhevai aw” ang chi hi.
Ainn uh ka tun un anu kungah, “Henu, u Thang in Lecturer sepna muta a, tuami hing hil uta ang hatsah ahikhulah” achi hi.
“Kipah nang e! Pasien phatin umta heh aw” nu Nieng in achizouin chibai ang piea, “Pasien in i thumna uh hing saang ahi” achizompeh hi.
“Mihausa leh mipil, milien-milalten Pasien aphohzoulou uh pen sillamdang anahilou hi. Kei bang leltahin bawn nisiela hing panpin chia ka thum zingna pa khu kumpi nasepna meng khat ka mu leltah azong phohpha nawn va-ialou ka hi chiengin” ka chileh nu Niengpin lamdang sadeutahin ang en phei hi.
Khuchi hunlaiin Chingnuin, Niengtui hing domin “Lawmvai e, ka lopna” chin nui kawmin ang hawm hi. Niengtui ka dawnlai un kei zong, tahkapatapa lungsima chizena kihanchiemdepin nu Nieng kungah, “Nu Nieng aw, Chingnu kei kungah hing transferta ulechin hoiva e?” nuikawm in ka chi hi. Nu Nieng in zong thutah deu maiin “Ei thu alah order kibawl theimawhloua, president pa lawi na kihousiem mai ngaiven” ahing chi hi.
Thanuomtasengin ka mawhnuia, “Pa Lien in bangchihchiengin innlam ang pei diei, nu Nieng?” chia ka dohleh aman, “Hing peibai ding thu genkhavawtsihve aw” achizouin, “Nangma hou na vahaw ding ahilou ngalleh” achizom hi. Kuonpai bang ka ut maia, ahivangin azinglama dingin ka kholsan thei vanglah hi.
Ukhrul ah Pa Lien kunga haw dingin zingmawng matahin Imphal zuonin Bus ah ka tuong hi. Bus sungah ka melthei khahlou ngentang toh ka toukhawmkha hi. Zinglam Nai 10 velin Imphala Education Directorate (U) zumpiah ka offer form pelut malamin Ukhrul zuonin Bus a tuongin ka peita hi.
Nitahlam Nai 3 in ka tung hi. SDO office tangtahin ka zuon pai vingveng hi. Tuanah pa Lien touna zumah ka valutleh aman zong lamdang na sain, “Thangbawi lah nahilaizanga, hing touin. Heia hing kipan na hiei?” ang chi hi. “Inna hing kipan ka hi. Innlam ka dam chietna uhi” chin ka dawngpai hi. Innlama thukinthupoimaw umlou ahidan ka hilzouin, “Naupangten zong tu ha sungin Selection Test nei ding ahi uhi” ka chikia hi. Pa Lien in, “Tawp zong huntamawngin, pei aw Thangbawi peitai e” ang chia, aumna inn zuonin ka peita uhi.
Nitah ann ka nehzou un touin thu tuomtuom ka houlim uhi. Hunchikhatin kei zong ka gen ut pen lah dinpat theipailou ka hi toh, “Pa Lien, kei zong Lecturer sepna ka muta hi” chia ka hilleh aman zong, “Hi ih! Katei-aw! lungdam umna e” ahing chi hi. “Thangbawi tuabanga sepna kituptah neita nahileh, na nulepa zong ka theidanin, genthei tuohmama uha, amaun bangma theisih nanlezong, pui inlen umpitalechin kipahmama ding uhi” ahing chi hi. “Ka nulepa pen it in ka lungsiet thama, ahivangin amaute apana kisiana kammal khatbeh zong umloupia, ken lungsiettakhuongin chia ka vapuimai ding pen sil hoi bangnaven, dachiengin upaten Sing leh maltain athahna khengailou chidan hing hiveveleh keia dingin amasa sangin anukhia khu hing huoisezawkha ding hi” chia ka dawn leh, aman zong, “Tuazong hithouma ve-aw” ang chisam hi.
Ka hawna jieh pen lah ka pankhe ngam sia, apat ding dan zong theilouin ka uma, bangma dang noulah ka lungsimah aum theita mawngmawng sih hi. Gen dingin ka kisa zela, ka tawp zel hi. Atawpkhongin pasal, shi leh shi chizenin, “Pa Lien” awl ka chi leh ka awsuo tuomdeu ahidieimah, aman zong lunghimawtahin ang en pai hi. “Chingnu toh umkhawmta uleng, chi gen dinga hing haw ka hi” ka chikhedup sam hi. Awla hing toutang depin, ang nahkhehuoia, “Nougel umkhawm ding zong hoi sanang e. Bangma i neilou pen thukhat hitaleh, Chingnu ngel zong miphung tang ding, inntumsuong hiel dingin muongzou nailou inga, ang pawtsan ding ngaingamlou hiveng aw” talpang zut zetin ang chikhie hi. “Na chitahlezong, hitamaivan” chikawmin dingkhie n banga kikhai Nisimna et athuo hi. “Tu ha 20 chiengin inn hing tun sawmvangin, azingnia kihouna nei theidingin nang zong na innkuonte na hil inlen ken zong ka innsungdongta kang hil ding hi” ang chi hi.
Kipahta sengin ka umna lam zong ka thei va-ia sih hi. Innlam akin-akina delpai bang ka kilawp pialpual hi. Pa Lien hing thugen dawn kuai ding hinapin bakhat sung mawngmawng bangma genlouin ka umkha hi. Biehinn sunga imukha kiphongkhanglou mabangin thakhatin ka lungsim hing siengvata, kei zong, “Pa Lien kipah ing e” ka chitheisam hi.
Pa Lien in ang theisiem mama a, ang dawnna danin alutang alawh hi. Tuazouin awlin ang toukia a, “Thangbawi, Leitung pumpi zel suoha kigenminthang Shirui Lili en dingin zingah tamnalai vemaw” ang chi hi. “Tam ut tham ing, ahivangin nang lah kimanlou ding china, koi toh kivahkoile ding ahia” chia ka genleh aman “Eimatang a vahmawna diing umlou hi. A en mi tu hun lai in atam theimama hi” chin ang dawng hi.
Zan hing sawtin tulaitaha ka gente uh zousie zalmanga matkhah ding lunghimaw kawm lah lungsima thamden kawmin zalkhunah ka zalta uhi.
Zingmawng annneh masangteng pa Lien toh khopi sungah ka vahlele ua, annnehzou, ama office kai dinga, akuonzouin kei zong Shirui Lili en din tua mun tung ding Bus khatah tuongin ka kuonta hi. Bus a minit 30 vel ka taizou nua un Shirui umna muol anaizaw pen ka tung ua, Ukhrul khopi apat Tai 15 a gamla ahi.
Shirui Lili pen Leitung pumpia zong theiphaha minthang Lili pah chituomvawt khat ahi. Limlemel ah Lili dangte sanga, ahoi tungtuonna chiding va-ia umloua, ama Shirui atuomna vawt khat ahileh tua, aumna ahisihleh pouna mun chilou mundanga hingtheilou ahi hi.
Muolvum lam naideuah sing lien, hanglam zuona zamsuh zenzon khat auma, peiin tua sing zam tunga touin Shirui leh tua gam leh muolte enin phabep khatsung ka tou hi. Bakhatzouin kumkhiein sahlama ka peia, munjang khat ka tun leh Suongpi atungvum zang lien simtah khat auma, tua tungah miten zong khawldamna a, azah zing uh ahia, tuanah kei zong ka vakhawlta hi.
Dingkhiein Shirui pah lahah ka vahkoikoia, pahpetepou ka khutin zutin tambangin la ka sa hi:
Etlawm Shirui Lili,
Mimbang pienga kilbang na khanna mun,
Shirui muol nuomnouah;
Pallun lamtuol na kaia,
Zatam selung nopna aw,
Na sau nuom leh na lamtuol nou,
Sietlei laiah nuompen hiva,
Khatvei guollai lenglou keia,
Singdang phung na kawmtalawmlou!
Etlawm zouheisaten,
Mimbangpienga kilbang akhanna uh,
Zoudawn tulsing huikhi;
Sieng lenna tuongnuasiein,
Zatam suon saulimliepah,
Pallun lamtuol kaitave uh;
Zatam selung nopna hi uh,
Shirui lili selung gelven.
Etlawm Shirui lili,
Hing tuolkumin lai hing leng aw nelkai,
Zata singguollaiah;
Pallun lamtuol hing kai ven,
Zatan na pallun zouin,
Anglai naubang hing pom nuom ung,
Tuhpah zemhoi banga suongin,
Kimpi senguol zatam laiah,
Shirui lili! Shirui lili! ………..
