Thakhatin ka khangloua, thoupaia ka dahleh ka geia ding nungahnun, “Brother, nang nasa ngamdabara?” ang chia, “Sister, ei asidah ngaihaktang rest touge haina phamlaga, i khang khanghoudana nungngaina hippah manlene!” chin kisuonglatah mai in ka dawnga, tuabepin alawipan, “Eikhoi zourage” chin akhutin nungahnu koiphei in ang nuasieta uhi.
Azingni nitahlam Nai 4:15 in Lamka ka tung kiata hi. Shirui lili pahkung ka puohte Maryin akigengen thute tahsanglouin ahuon uah asuona, hing pouin ang pallun nadieimah izawh!
Innkuon nite kihouna bangin ang tung ding October niguhni nitahlam Nai guh chienga Chingnu toh kiteng ding ka hitapouma ua, manlemuol pen i ngainadan bangin Siel 5 ang tangin, asumin Dangka 5000/- a la ua, satha ahileh Moupuinia ang tha uh ban umnawnlou ding chi ahi hi. Tam pen i ngainadana thumvei satha ding ahia, ahivangin innkuonte kituohna ahipouleh sil hithei hiveve dan ahi hi.
Kitenna hun zong mi bawl ngainadan banglou deu maiin nitah Nai 6 a nei ding chi ahia, tuabangmain moulopna zong umlou ding ahi hi.
Tami ni hing tun ding ngahla pawl ka um uh mabangin hing tundakonleh chipawl zong um vevehi. Khuchikikal in miten athuneikhum theilou hun khu hing peizelin October ni 6 nia hing tung khongta hi. Ka lawm Zampu toh Pa Liente nupa kitenni theigigena annkuong alui uh zingkalin ka vane uhi.
Nitahin kitenna zaw ahizouin Biehinn maiah ka pawt ua, miten ang chibai valuoi uhi. Tuate lahah ka nulepa leh Esther vang ka mukha sih hi.
Innlam ka tun un lawmleleguol leh hing deisaha hing kipahpia innlam tana hing zuite toh niengtui dawnkhawm in hun phabep ka mang uhi. Lawm Zampu khu kitenna hun thuah lungkimthei mawngmawnglouin, “Lawm Thang aw, tambang pen nangma hing deisah leh hing ngainate pampainain ka ngai hiel hi” ang chi hi. Gen ding tahpi zong ka theisia, dawnloua koimawh lah sil kizenlou abang zela, sil umdan zousie theisa a lah ang doh hin ka theia, atawpin, “Lawm, neilaman khat-hou hizawkhava e” chin ka dawng hi.
Miteng peizouin zan zong hing sawt simta ahimanin, tuana um khawm ding mithumtein akhatveina dingin innsung kikhopna nei in Pasien kungah kipah thugenna leh thumna ka nei ua, mun nia kikhenin zalkhuna zal dingin mangpha ka kihahta uhi.
Hun leh nite hing peiliem zungzungin kei zong ang tung ding October 21 chienga ka sepna ding mun Presidency College, Motbunga nasep pan ding ka hita hi. October 15 nin keimatangin tuamuna umna ding inn leh sil bangkim sutup dingin ka vahawta hi.
Pa Liente nupa deisahna toh nau Hoinieng pen kumkia a Tansawm Laivuonna apang ding ahijiehin leh asangkaina kitantheilou ding ahina toh pa Liente inna tua hun tan um den dinga nuasiein kou nupa zong ka inn tha luo ding uh manawin thanuomtahin October 18 ni zingmawngin Blue Hills Travels Bus khata tuongin ka kuonta uhi.
Chingnu toh ka umkhawmzou uh, Khristmas khatvei mangzouin, khuo zong ang lumkiata hi. Hun muolliem kal zong phohphalou hi-uleng kilawma, akal lahlaha lawmleguol toh Muloutongsanin kihoumat nan ulengzong koima amun ua vakawmmanlouin ka um kha uhi.
Ni khat zing ann nezoua innsunga ka ni ua ka umlai un naupang khat hing tai vingvengin laihah khat ang pie hi. Chingnuin vasangin aphela, tua lai-ip sungah laihah ni aum hi. Chingnun asimsapen kei hing piein khat pen asim kia hi. Kei ang pieh penah hichibangin kigiel hi -
Ka it, u Ching aw,
Chidamtaha na um uh lam-etna lienpi toh tamlaihah tungtawnin kang houpi hi. Kei leh tamna innkuonte ka damkim chiet uhi. Laivuon hun hing naita ahijiehin laisim ka hapantheimama ua, na thumna uah nang mangngil ngailou uh kinem ing.
I u lienpute nupain i nulepa inn pana, anawkhietna uh kum kim ching phielta a, Lamka nuoiah inn khat ha khata 150/- in sap ua, i pa khu a awm nain potkhe ngaimanglouin lumchipden hi.
U Lienpuin lah papa Card tatsahkia nawnloua, aval Dangka 300/- teng lah innsap chinggiap chi ding hia, papa zenlouin um chithei ahi hi. I nuin Zenhang Bazarah methei nengpou zuazela, hatzounawnlou ahimanin ni khat in bangmaza mulou hi. U Thang toh mangpha na man un.Kipah ing,
Na it,
Hoinieng
chin kigiel hi. Chingnun ama sim khu hing pekiain ka kung ah ang tou hi. Tuapen ah tambangin kigiel hi-
Ka it, u Thang,
Pasien venna toh damtaha tam lai kang hahthei jiehin lungdamin Pasien ka phat hi. Nou zong Ama pasien lungsietna tanga chidamtaha na um uh ka lam-en hi.
Ang tung ding April kalnina sungin Laivuon ka zouta ding uhi. Pasien panpina toh chidamtah in lai ka simtheina hi. Lawchin zong lam-en ing.
Miten innsung nuom khu Vangam naipen ahi chia la a, asah ukhu ka mou niengte innkuonin atahtaha, aman uh ahi. Amauh mankhahlou pen khu en i mankhah uh ahi. Pasienin Leitung hoisah leh tua hoina zaalzou ding leh mite sil hoi lama pui dinga hing siemkhaloua sil hoiloute hoilouna mite theia tahlang dinga, ang zah ahisihleh abelguot mawngmawng ata-amale u Thang? Shi masangin bangma kikhel aum sih hi. Kipah ing. Damvai, Mangpha.
Na it, Hoinieng
Ka laisimzouin Chingnun hing naiphei in ka angah awlin ang kingama, hing dahtouin ka maitang en kilkel kawmin “U Thang i nulepa vangsena uh e maw? Awleh, maikha uh na sa ei?” ang chi hi. “Ing heh” chia dawng dia kisalaipi thakhatin ka khawla, tambangin dawngtaleng, ang thudoh khu dihna chi suoh ding ka himanin kei zong awlin abieng ka zuta, “Nang bang chi nasa ei?” chin ka nuadoh hi. Aman zong hing en kawmin awlawlin:
“Innsung nuom khu Vangam nai pen ahi,
Pate adia Lenggam ahi;
Nute adia loupina pen ahi,
Tate adia Paradise………
Pasien….tenna innsung nuom khu…..
chi la ang sahzouin, “U Thang, Pasien hing pieh damnate toh na kunga hichibanga ka umthei hampha hinang e maw!” ang chi kia a, ka dawn masangin, “Lazar leh mihausapa taangthu bangin, u Thang nang pen Pa Abraham angsungah nuomtahin um inlen, kei pen kitawldamlou kei in Meidilah kilehzingtamawh leng…..tua na umna mun panin hing mu zing ngal lechin ! Tua na umna khu nuomsain Vangam hina na chinadiei?” ang chi hi.
Ama ngaisutna thei kawmin, “Nang leh kei mawna lah umloua, inn pana delkhieta um inga, innlelou zousie tannalai inga, bang ka kisuonlana diei mah?” chin ka dawng hi. Chingnuin ka khut ziet lam ang pomin, ama khut phang toh keia phamkomin abieng ngapnain nei in, akhut lang khatin ka mai ama lam nga dingin ang heisaha, tuazouin “U Thang, kum thum val vingveng vahvai vang nahi ngut a, amauten nang bangtanvei ang na buoipi ma ding uoimah izawh?” chin ang dong kia leuleu hi.
Nuikawmin abieng ka zutpieha, “Ching, na hoi deudeu ka chi” ka chileh aman zong, “Kei hoi nangsahnate midangte dingin bang avahitakoi diei? Leitung hausatna leh mel-hoinate zaw itna dihtah panglouin buoina giap ahi uhi” ahing chileh hun beisate ang phohkhesah hi.
“Na chidanpi i nulepa vapuivang chi navelemaw?” chia ka doh bawlleh, aman, “A gam leh athuneina lahsaha umsa, kumpipa khat agammiten akumpi ding un hankiata uleh, tua gamah kilemna leh muonna um ngei dingin ka gingta hi” ahing chi hi. Dingkhiein awlin abieng ka tawpa, awl gen kia dingin College kai dingin ka kuonsanta hi.
College ah class sunga ka umlai in Chowkidarpa hing lutin, “Awzapu, na phone ding hing pei” chin ang han hi. Peipaia, ka vadawnleh, “Lawm Thang, Zampu hing e. Damna uteh izawh?” ang chia, “Dam e. Lawm Ching zong dam e.” chia ka dawn leh, “Hoi e. Kou ka lawinu khosiha, RMC (Tu in RIMS chi hita) ah Numei umna No. 9 ah ka umlaitah uh ahi. Ahoilam vang ahita hi” chin ang dawng hi. “Asawttai? Bang ni, bang huna lut uh e?” chin kindeudeu in ka donga, aman zong, “Zanitah Nai 7 lah vel ahita” chin ang dawng hi. “I dam leh zingah ka ni un kang haw ding uhi” ka chileh, “Agamlatlat toh maw?” ang chia “Gamla chilaizang, laphuoh khatin Pei utlei nainou hia, utsihleilah gamlapi achi khu avele aw” nuikawma ka chileh ama zong ang nuia, “Pasien in i thumnate hing sangvan kang tun masang un nana pawtzou tamaw ding uh e?” ka chileh “Hoi ding hia” chia ang dawnzouin “Ahileh, lungdam e. Tamtanin aw.” ang chia kei zong “Hi. Damvai e” chin Muloutongsan koi ka thuota hi.
Zingkalin Imphal lam zuonin ka zinkheta uhi. Awang BOC apatin RIMS Zatouinn zuonin Auto-Rickshow khatin ka taita vengveng uhi. Zatouinn ka lut masang un Dr. Sunita Devi, (Gynaelogist) kungah kibangmalam uhi. Ki-ensah ding mi tamlou khat ana um ua, ka lawinu kungah, “Sawt ngah tuohsihnai e” ka chileh aman zong “Mi atawma, hamphat huoi e” ahing chisam hi.
Kou hun ang tunin ka lut ua, Zatounun Chingnu a etzouin atouna ah hing toukia hi. Nuisim, lungnuomtah melpuo ahing enin, “Sawtloukala mipa khat hiding nata khuh” ang chi hi. Kiheipaia ka lawinu ka etpaileh ama zong kipahtaseng ahidiei, ahisihleh azum ahitadieimah abiengtegel ang am pimpem mawh hi. Zatounu kunga kipahthu gen kawmin ahing pieh laidal khu sangin tuazouin ken note ka piea, kougel ki-ena kinuisan sim kawmin Zoutouinn zuon dingin tuamun ka pawtsata uhi.
Lawm Zampute umna ka tun uleh lawm Vung zong na halta mama hi. Chingnuin anau uh, “Nanau, David” chileh lah athuoa, “Hei, David mel hoina chie!” achizouin “Lawm Vung, anulepa hoite, hoilou chi umlou hive-aw maw?” achileh lawm Vung zong ang nui chichiei sam hi. “Sakhi api asan leh anou zong san, kichibou, anu sun akhulah” ka chileh lawm Zampu hing kipanin, “Lawm Vung zong ang khosihleh hing gawngsimin i lawinu hing hoita deudeu” ang chibelap leh lawm Vung in, “Zawngin ngautalei zong hing taisan sihnava chia i mittaw sielkhau tuh avele! Mawle lawmching?” chin aw ngattah, lah sieng sitset in ang chikhie hi.
Numei mizenten Zoutoute mi-et hun hita damlou vete peita un chin ui naw zawng nawin ang nawta uhi. “Bakhat zong ki-um mannailoua, lungthah theilahhilou, damvai e, Lawm vung. Kou zong peisuohsuohta va-ung” chi kawmin ka lawinuin mingainadan chin damlou vena dangka bangza amakhat apie hi.
Anukhia pen ka hita ua, kotbul ka tun un, “U Thang, u Thang..” chia hing kihanin ka theia, ka veilama ka kiheileh tualama lum damlou numei khatin ang hat anahi hi. Koi ahi theizuollou ka himanin vanaiphei zuolin, “Nang hing hankha amah?” chin kineem manglouin ka vadong hi.
“U Thang hing ngaidamin aw” ang chikhiet leh kang theikhe gua a, “Katei-aw, Esther lah na hin” ka chileh kinuoi kawmin, “Ka hi” chin ang dawng hi. Hitui kai nengnung pumin, “U Thang aw, hing ngaidamin, na tunga bawlkhel tampi ka nei hi” ang chi hi. “Esther aw, kap sin. Ka tungah bawlkhel na neilamzong theising. Na nei lezong kang ngaidam hi. Hing damtan. Pasien in hing panpi ding ahi. Ka chilai mamain zong ang nawten Bawng hawlin ang hawl thawta uhi.
Mizente zumah valut zuolin, ama lah ka dohmanlou banah vadoh mawh zong thunuom hilou ahimanin Esther damlou dan ka vadong hi. Tuana na um mizennuin, “Zani mamain sisan etkhietna nei ahia, gintatloupin HIV nei na himawh ve-aw” ang chizouzouin bawlkhiel kisain, “Kinai hina uteh maw?” chin ang dong zompai hi. “Hi.” chia awla ka dawnleh amanun zong, “Khohna e” ang chia, bangma dang gennawn seselouin ka pawtsanta hi.
Innlam zuonin Auto-Rickshow khata ka peilai un Chingnuin, “U Thang Estherpi amel nakihengmansam emaw? Khuchituha mel-hoipi” ang chia, “Koi mel kihenlouna ding zong asamah khosih phapan leh kipan zel chi uh hiven” chin ka dawng hi.
Gandhi Avenue apat potkhietna leh NH 39 lampi kisuhtuona ah Chingnu pa, pa Lien Rickshow tunga tuong ka mu uhi. Ka khutzap uleh hing thei in ang khawla, kouzong ka tuonna uh hakhiein ka zuon ua, chibai kipie in lamgeiah ka kidinhou uhi. “Heilama hing kipan e pa?” chin Chingnuin adong hi. “Ukhrula hingkipan ka hia, Lamka umkiata ding ka hi” chin kipahtahmai in adawng hi.
Zinglam Nai 11 hita a, zing-ann ne dingin Hotel khat ah ka kizuilutta uhi. Ka ann nehlai un pa Lien in “Thangbawi, innlam nang phakuaimai ding uoi?” ang chia “Kei pen Tansawmlenite Laivuonna thaia kipan ding hita ahimanin, kimantheilou ding khat suoh hiveng aw. Chingnu hou ang haw ding ahiloungalleh” chia ka dawnleh, “Nang hawkhawmthei ding ua ahileh i chia hiven; khuchi ahileh bang, haw ngaisih e” chin ang dawng hi. Ka lunglamtah genkha chie, ka lungsima chin lungkimtahin ann ka nezomzel hi. “U Thang, lem nang sahpileh i pa vazuitavangin ni li zou chiengin kang tung ding hi” Chingnun ang chilaizang hi. Ka kipahnateng thebehkhiet bangta hi. A pa maitanga phallou ding lah sil zumhuoi in ka ngaisuta, Chingnu kungah, “Na chi huna nang tun teitei ngai ven” nuikawmin ka chi hi. Lamka Bus Stand tan ka vahahzouin ni li ngah ding sauseng sadapsim lah kilangsah ngamlou sasain ka umna lam uh ka zuonta hi.
Nisielin ka pa hatmaw semsema, sumlepai tahsap jieh in kizenzoulouin mawh umumta hi. Ka nuin amu hoi ni chiengin Pharmacy toute kung pouah Za ding vadongin ana piehte uh aleizel hi.
Ka nuin bazarah methei zuazela, thahattalou ahimanin khatveivei chiengin van lahna ding sumpi neinanleh thatanghata kituthaw bang ngaizel ahijiehin van zua ding amuzoulou hun aumzel hi. Bazar kaina innneute sapzouloua, leituola toupi dingin zong miten na ngaiphamanglou uhi.
A van zuapi midangten ningbawl uha, mite zatatlou nupi khata hing suohta hi. Bazar atou chiengin nupi khenkhat atute uh aban ua hing kaia, amoute uh toh adu-angai uh leia hing vahte amu chieng bangin; angaisutna hing khanglouin ahun mansate leh atheisa nalesilte jiehin ahitui in apumdipzel hi. A lawileguolte mukhah ding bang azum vatun hi. Khenkhatin atheinawn sih ua, akhen inlah akitheimawbawl ua, tuachilou akhenten ahikia leuleu leh houlimpi in thu tampipi adongzel ua, ama thanoplou lampang ahikhazel hi. Amelthei khenkhat inlah houlimnopnan azang ua, azah hin azahlouna hitaleh, migilou, ta leh moute toh umkhawmtheilou innpi sitsie ahisah uhi.
Bazar aloutheiloua, tou angailai in, innlama ngaploua lumzing apasal tuilum nasun ding zong umloua, anuasie ahilam ahing theikhe zel hi. Niteng chiphielin asamkang kibelapa, lungkham, lunggelnatein mihingte tehsahbaia, dama thahat-lai dingte zong chinasahzou ahilam ahing phohkhe panvaluoi hi.
Koiman houpithamin zong ngainawnloua, mite etdanin talenaute toh kimatlou, umkhawm-tengkhawmtheilou, migilou, atuga at, amaikha ahitamai hi. Hausain lienzoupoulei i nuipi ding mi tama, liengvailei houlung kuppi ding kimuzoulou chia min lasuh-latunga, asahte uh dih hina ngut e aw! Ka nuin alungsimin chin, nisimin alunggel kibelap zel hi.
Chingnu apa toh inn atuntun un kisuokhe mengmengin avakisila, tuazouin kisain anu kungah “Bazar vakaita vang e, nu” achileh anun, “Bang vakin bawl ding lah?” chia adohleh, “Ka poimaw van khenkhat valei vangin me zong ka dulam aumleh kang lei ding hi” chia dawngin anun bang gen e chi zong ngainawn seselouin akuonkheta hi.
Zenhang Bazarah me ding sui kipangin avahkoilele hi. Aninglamkhatah mezua nupi khat toua, aman zong avanaiphei hi. “Henu, tami bangzat man e?” chia nupinu me zuate avadawp hi. “Tengni man hibou e. Kilei in. Bawinu.” anachi hi. Avanzuate tampikhat aleisaha, asum piehkawmin, “Henu, mel-hoi samchie! Tu a bawn hichi mel-hoi nalai, na nungahlai in dawi mel-hoilou ding navele!” achileh nupinu zong anuikhahlouna asawttah maizen toh ahing nui chichieisam hi. Tualaitahin, “Henu hing pei aw, niengtui hing khelai vang, na vante gal-et theinavei?” chin achiel hi.
Nupinu zong ama deisahtaha niengtui dawnpi ding mukhah akineplou hizalaiah kipahtasengin, “Bawinu ka van nang leisah tengpi zong hunta. Kipah ing” chin adawng hi. Chingnuin lah nawthaw bawl sim ahimanin, anielngamloumanin zui in atouna geitaha Niengtuisaina ah alutta uhi. Atoupi, avanzuapiten lamdang sain aen kheukhou uhi. Chingnu mel leh akivondan khulah mi maimai hiding inlah agingtathei sih ngal uhi. Tuabangmain nupi nun zong adeilou amounu kunga thugengen ahilam atheisih hi.
A niengtui dawnlai un Chingnuin, “Henu, ka nuneute khat toh kibang kangsa hi. Heia uma, talenau bang na chi nei ei?” chia adohleh nupinu zong ittah maia, akhankhuo dong mi atuohkhah ngaimanglou toh kipahgawpin atungtang leh ainnkuon sung thu uh dohkiakia ngainawnselouin kimtahin ahil dimdiamta hi.
A innpinu kisiemmawtandante amuin, Chingnu zong ki-iplain kigenkhe dehdeh mai hi. “Bawinu, nang heisunga uma, na nulepa koi e?” chia adohlai in, “Bethel Venga um Chinlien tanu ka hi” chia adawnzouin ama tungtang adohkia khah ding dalna kawmin, “Henu, Niengtui hatbe vai aw?” achileh, “Hunta ! Hunta! Kipah mama ing” achizouin, “Nangbang tanu chingtah, mel-hoinalai, hing nei na nulepa hampha tei uh e!” achikia hi.
Bakhat hing kingaituo dedawin, “Leitungah mipil chini uma, ahuntaha sil umzie theisiem valiente leh akikhelnua a theipanphingte” achizouin, Chingnuin bangamakhat dong dinga kisalai dongmanlouin ama hing houlimzompehin “Kei zong anina pawla pangkha ka khuh” achikawmin amaitang azutzutmai hi.
Chingnuin zong nopsalou ahimanin, “Henu, Pasien muongpuolei Aman ei ading sil hoi ang bawlsahna ding hi. Lungkham mawngmawng sin, genthei leh nopsah chitepi Leitungah akihahthaw tohbang ahibouvele. I nopsah hun zong hing umnasamlou ding i?” chia henep bawlin, dingkhiein Niengtuisainu kungah anehman teng uh apiehlaitanin zong alawinun kipahthu agengenmai hi.
Chingnu avanlei toh Lamka nuoia, ngaploua lum ainnpipa ve dingin akuonta hi. A innluonate uh tanu a kipangin maitaitahin ahoupi hi. “Hepa, tunia College a scholarship la inga, kikhulou leh Vitamin khat kang leisah ahi. Koima hilsihveteh. Ka paten thei uleh hing samkhava uh. Kang etmaw jieha kang leisah ahi” chin aZa leite apie hi.
“Kadei! Kadei! kipah sam i ng e! Bawinu, Pasien in hing guolzawlta heh aw. Na chi-na lu dam heh aw” chin kipahtahmai in sang hi. Chingnun bawl ding poimaw khat nei ing chia kilepin apawtsanta hi.
Nitah Nai 3:30 in Chinlal leh anau sangkai inn ang tun un Chinlal in anu kungah, “Kang peina uah lampia na houlimte gendanin tuni nitahlama Zenhang Bazarah mipi zaua taizahten nupi khat tuonthopkha ua, tun District Zatouinnah kizen hileh kilawm” achi hi.
Nitah ann nehzouin Hoiniengte mouta zong apa ve dingin kuonkheta uhi. Avatun masang un inna Chinlal gen nupi kituonkha khu Hoiniengnu ahi chi kholaiah Chiching in na hil hi. Zatouinn zuonin akin-kinin Auto-Rickshow khatin ataitumta vingveng uhi. Zatouinn sung awnglou ahimanin innliepah avamu uhi. Gingtat sangin akisuhkhahna pen huoiseloua, asietmitbawh kihehkha ahi hi. Abuoipi pai vingveng uhi.
Azing nin Hoinieng toh pei in apa Zatou etsah dingin avala uhi. Zatouten aetzou un Zatouinna umsah ngai ahi achijieh un amaun zong aumsahpaita uhi. Zatouten a awmsungah tui um ahi chi ua, tuamun apat tui thol ni ching dihtah alahkhietzou un aphapai vengveng mai hi. Tuachin nithum abuoipizouin Chingnuin anuasieta hi.
Ken lah Motbung khopiah Chingnu ka ngahlata mama hi. Ahing tun hun akipel banah bangma lah ang theisah nalai sih hi. Ka lunghimaw simtenta hi. Chingnu azinkhietzou ani sagi ni zingkal dah 11 in ahing tung hi.
“Hing ngaisengsengta, tuni hing tung sihlechin, zing chienga Vahui suhlena hing lenmai ding ka chi hita hia” ka chileh aman zong, “Kang laihah mulou i?” chin ang dawng hi. “Tuabeh kimuleh kihichi lunglenlou ding hia? chiemnui chitaha ka chileh, “A kipuohsuoh hitaven” awlin ang chisangiap hi.
“Bangpikhat bawla hing tamden dedaw nataileh lawm?” chia ka dohleh, “Kihawvanglah, tunua chienglah kimawh hawthei mengmengtalou maithei chia; tualeh i nu ma hing ngaplou kawideldawla, hing tamsawtkha ka hi” achizouin, “Tun vang ahoidana kang nuasie hi” ang chikia hi.
Amou peinuain Hoinieng anute innah vahaw hi. “Hoinieng aw, Zatouinna nang hawpi, ang buoipi zing nu khu koi e? Lah nang hil ngaivawt sin” chin anun adong hi. “Ka mou Chingnu ahikhulah. Amatanga hinghaw zuol ahia, tun apeikiata hi” chia adawnzouin, “Tamnah noua dingin Dangka 500/- ang nuasie, tuami pedinga hing haw ka hi” achizompeh hi.
Tam nutate kihouna apan azahtahin, “Khatveini lama kei kunga hing hawa, inn neite tanu ka hi chia Za hing leisah khuzong hingelva ching e!” ang chikhie hi. Hoinieng nu zong hing kingaituo dedawin, “Bazara kei hing houpinu toh zong kibang ngel ve uh aw! Theising eh! Na mou Chingnu ma hi kawikawiva chitabou ing e!” ahing chi hi. Hitavalon dingin agingta ua, ajiehpen amel leh a aw akibah banah avabawldan tuomtuom leh Zatouinn tanpha asumlepai senga abuoipi dante thamloua hun china vekhie avakankhe zing ahijiehin hitavalon dingin agingta tintenta uhi.
Hoiniengin lah tuabang theipikhahlou ahimanin angaikhe ngengngong hi. Akipah ua, azum ua, gen ding tahpi zong atheisih uhi.
Ka pan, “Numei mawh khuonkhuon sin, tua hun chiengin bang nachi theisihteh” achilaia, “Thei mang, theimang, Thangbawi in angai, anei ding Chingnu kichipenpoumain tamtengpi nuain nang leh kei hing itin hing ngai theiva na chi mawngmawng e aw, Thangbawipa” achi vatvat lai ka nun ang phokhiea, amit amaia kilanga, tua zousie abil-ha ah ginggingtamawh ahimanin, kunin akap a, “Thangbawipa aw, hing ngaidamin keima bawlkhel ahi” chia genin apumkawi pheia, akikatuo ahimai uhi.
Tomkhatzouin ka pa hing dahkhiein Hoinieng kung lam ngain, “Kei hing panpi dinga Pasien in Vansawlsiengte khat ang sawl hiva ka chin!” achi hi. “Hepa! Ahikhulah! ainn ua ka umzou kum khat valta hia, innsung nuomkhu Vangam naipen ahi chi khu amaun atahtahin mang uhi” chin ang dawng hi.
“Thangbawipa, zing chieng mamain Thangbawite nupa kungah vahawin ngaidam i vangen ding hi. Sil umdan etin hing ngaidamin hing pom thamtham ding un ka gingta tinten hi” Hoinieng nun achi banah koima dawn masangin, “Ang ngaidam uttahsih ua ahilezong hoi veve, ajiehpen eima khelman i kimu ahiboua, i hagau zong lungmuong pielgal kaizoutava” ang chi kia leuleu hi.
Chingnu vagamtatdanah khun kimuonngamnatah khat vang anei ua, ahivangin kimaituotahtah ding zong achizamama uhi. Hoinieng nu pen hunpeisate angelleh nasain, tualeh alelamkhatah Buipi suonggieltuoh banga, a umlai ua tambang kipahna thu amudan uh angaisut chiengin Pasien silguon hidingin angaisuta, tawptheilouin ka chitahpimain akap denkei hi.
Hunchikhatin hing kikoukhiein, “Mangpa aw, hing lungsiet hinamaizen chie! Tambang hun hoi nang piehnahlai” chikawmin atanu Hoinieng apumkawita hi. Akallahlah ah, “Hoinieng aw” achikhethei zela, aban bangma gentheilouin akap ahitazel hi. Ngaidam akingentuo ua, kikatuoin kipumkawi ua, atawpin kihakhiein amau son chietah Pasian biein thumna anei ua; atheiloukal un ainnsung uah Penticostni hing tungtha ahitamai hi.
Hunchikhatin ka nu hing khawlin hoideua hing kinulsiengin, “Endi ua! Laisiengthou in, Itna in a engsesiha, adawtheia, huottuom anei sia…….. a chikhu dih hinamai e? Piengtha ka hi, Pasien in ka khelnate hing ngaidamin Pasien ta ka hita ka chichi lai a…… ken, ka ta, ka moute ka mudamai khu” achia kapin athumzela, “A hing it theivawtlou dinga ka koi, Chingnuin ama deilou keima hichituha ang itthei, lamdang, lamdangtaluo hi. Pasien nei miten asil nei uh tamna e!” achia, ama-le-ama kihouin tualoukal chiengin thumna nei in Pasien kungah kipahthu agengenmai hi.
Sawtsimnuain ang khawltheita ua, awlin ang houlimkia ua, “Pei in Chingnu nulepa kungah ngaidam i vangenmasa pen ding hi” Hoinieng kungah anun achia, aki-entuo ua, koima bangma gen aum sia tuabepin, “I leibat atam hi. Pei in i vahaw ding uhi” ang chikia hi. Awla kisain pa Liente inn lam zuonin ang kizuikheta uhi.
Kot avakiu ua ahileh nu Niengpin ang hong hi. “Hinglut un. Hoinieng, nalepa zong lah ahi un!” achi hi. “Hing haw uh maw? kichibai vai e” chin pa Lien in chibai hawm apana, ainnkuon dangten zong kholaivahte chibai abuh chiet uhi. Maryin niengtui hawmpai in Hoinieng in anulepa vahawna jieh agen hi. Ka nu um ngimtheilou ahimanin ka pa zong ze-ngahta seseloua hing dingkhiein, “Chingnu nulepa, kang kholaivahna uh toh kisaiin ken hun phabep khat kang mangzuai ding hi” achizouin, “Pasien ngaidamna zekim leh aguolzawlna phungching mu ka hilam tunitahin ka kiphohkhepan valuoi ua. Pasien phatin umta hen” achikhiet leh amittui in apumdimta hi. Guosiengkie bangin ahitui atahzungzungmaia. “Chingnu nulepain ka sil bawlkhelte uh hing ngaidam un” achi hi.
Pa Lien zong sil umdan bangtan ahei atheisiem paia, dingkhiein, “Thangbawi nulepa aw, kou tungah bangma bawlkhel neisih uteh. Hunsahtan. Kou dingin zong anuomsih hi.” chin tou dingin avachiel hi. “Tam bang na sil tuohte uh tunua chienga i hoizawhna ding leh guolzawlna tamsem Pasienin ang pieh nuom jieh zong hikhamawsihva. Kumpi David in Humpi hat-laite zong gilkielin tasamthei ua, ahivangin Mangpa muongte khu amau genlou atusawnte uzong liengvaia chimaw ka mukhanai sih hi achi khu theizing vai-ui. Pasien belte khu bangchihlai in zong innsung khat i hizing mawng uhi.” ang chi hi.
“Thangbawite unauin nou nupa khat hing bellou hi uleh kou nupa bang ka suohta ding uoimah izawh?” chin ka nuin pa Lien thugen dawnna danin ang chikhe kia hi. “Kou zong nouma bang ka hibou uhi. Thangbawite unauin kou hilouin Pasien akibel chinten jieh uh hizaw ding hi” chin ang gen kia hi. Pa Lien hing kipankiain, “Bangteng hilezong hinkhuo kichi tambang ahigiapa, mihingten i maban ding bangma thei i nei sih uhi. I kipah ua, Pasien kungah i unpi un thumna, kipahthugenna nei va-ui” ang chia tuachin thumkhawmna a manzou un, “Zingkhovahpha Mangpan ang musahleh kou zong Thangbawite nupa kungah haw sawm ka hi uhi” ka pan ang chileh, “Vahaw ding hilouin aumden dingin chizawin” chin pa Lien in ang chi hi. Tuachizouin kimangphahahin kikhenta uhi.
Motbungah May ni khat ni zing ann nehzouin inn sungah ka tou ua, hunchikhatin Chingnu hing dingkhiein kholailam aena, kiheikiain, “Vadaileng zuai vang e” chin ang potsata hi. Aumdan enmaw sim inga, mu khat neia, daileng dia kilep hiva chi ka lungsimah ang um valonga, luhimawta ka himanin dingkhiein kholailam ka en hi.
Mi thum, ka umna lam uh zuona hing pei ka galmu hi. Ka en zinga, ang naideu phet un khat pen khu Hoinieng ahi chi ka chiengta a, adang nitegel koi hiding e? chi ka suongtuo theinai sih hi. Muchien theina chienga gamla ang gei un, ka nulepa ahilam uh kang theita hi. Ka dip puluh ang sa a, bangamakhat, azauhuoi sil i mu i zah chienga umngimtheiloua i um khu bangin ka umta mawh hi. Ka khosanelin ang pumtuomta hi.
Bang na chi houpi ding ade-aw chin ka lunggela, kipahtaha na lamdawn ding lah ka lungsim khat aut tinten sia, na nuasan ding lah ka ki-awizel sih hi. Chingnu hat ding ka chileh lah zaphata ding ahiman un kizen sakialou. Buoitahpimain ka buoita hi.
Tambanga hun tomkhat ka um sungin thakhatin ka lungsimah Chingnuin amaute hing pei mua, alunglam ahilou jieha daileng kipang hidingpoua kang gelnahlaileh, ka buoina ang kibelapta deudeu hi. “Nangnu lihleh maw, kama utteng gengena, atahtah ahiding chieng amaw na hichiviel” pou chin ka lungsimin ka lawmnu ka mawsah malamta hi.
Kot ang kikiuta ngei maia, ka kuotkuota pei in ka vahongta hi. Ka nuin, “Thangbawi ei!” chia kikouin delin ang pumkawipaia, tuabangmain ka pan zong. Ka nun “Thangbawi ei, hing ngaidam aw, bawi” akal lahlah ah ang chikhetheizelin akap ahitazel mai hi. Ka sangkai chillai bang ka sa a, tua hun lai invang, ka nuin kipahtah leh nuisingseng kawma ang pom lah ahingala. Kipah sengin ka biengkiah luonhi aluong hi chi khu anghitamai hi.
Bakhatzouin ka kihakhethei ua, akichiem hi-uleh kilawmin ka nulepan kituohtahin, “Chingnu lah?” ahing chi uhi. Ka gei ua na ding Chingnu amutah un kidelhuonin apumkawi ua, khatvei kalasai sam kiavai chi toh bangin kikatuoin amauin amau vengvung kiata leuleu uhi.
Innvengte patau gawpin ang del kheukhuo ua, “Ipi hitam, awzapu?” ang chi uhi. “Ka nulepa hing haw ua” ka chipanleh alah ua khatin ‘Itidan a…..?” chin agen ut gensuohlouin ang dong kia a, kei zong, “Hi iyiii, kipahval ……” chia chieh nieinuoi kawma ka chileh nuakia sieng asawm ua, ken zong, “Hilou, nang kholailen uh kipah um banah, tunia hing kipahpi dingin kang chiel na hi uhi” chia chieltahtaha chielin aun-un ka khouzou vanglah hi.
Hoiniengte moutain niengtui a buoipi lai un innvengte tanvalnou khat sawlin Biskut ka leisah hi. Chingnuin niengtui hawmin, ken Biskut ka hawma, ka nu kung ka tunin, “Henu, Biskut lien penpen kang leisah hie” chin ka pie….a..
~ Beita e.~
