EXAM HALL IN BIEHINN KIZANG TAMAI!
Tumlam gam a biehinn tampi club hall a ki zangta chi thuthang I galza chieng in I lunggel tuom jel. Tun ahileh western countries hinawnlou, I pienna gam Manipur ah exam hall in biehinn ki zang chi thute za in hing um ta. November 27, 2012 ni’a Manipur Teacher Eligibility Test (TET) laivuonna ah New Chekon a um Covenant English School huonga um Reformed Presbyterian Church sung thanghuai tah a zah in um hi. Tuana skul headmasterpa’n BOSEM thupieh dungjui a zah ahidan a hattuom theisah chi chi ahiban ah RPC hattuom in thusuo a bawlna uah tuban tam bang gamtatna tawpsan di’n a kisaipite mawpai in ngetna bawl chi ahi niing nieng hi.
Ngaisut tham ching khat – Hindu, Muslim, Bhudhist leh sakhuo dang khat kikhopna tuo bang sil tung hileh tuachi ningnieng a koi ahi diei? Press release mai in a ki chai diei? Tulai ham hileh meisi pah lahlah jieng inte. Christian sakhuo thugin “na lungthahna ni in tumpi sih hen” chi jui a kinei ihi di uai ahileh leh eilam a dihlouna a um zieh a tangkou ngam lou I zaw diei chi ngaisut tham ching hi.
India ah sakhuo toh kisai sil khat pou pou pen a niingnieng a ngai ana hi loudan news tampi ah I mu thei uhi. Tuote bangin uham tah in kiphinna leh tuolthana tan pan lavai china hi lou in, Manipur a hattuom tampi um a, local church khat main ngaidan a gen thaw maipen sil langdang khat veve ahi. Tu kum April ha in Dalit sangnaupang te’n Hyderabad ah Bawngsa Pawi (Beef Festival) chi ana zah zieh un Hindu sakhuo a kuulmut pawl Akhil Bharatiya Vidyarthi Parishad te’n dalitte tam tah ana soisah uh I thei uhi. Tua bang ma in India khopi tengah am pawi pen khap in um hi. Mi’n a neu apat a ne, bawngsa neh zieh a sakhuo sukha chi mawhpen dih thei ngeilou hi. April ha ma in Mumbai church a Jesu Lim kibawl, a mittui luong dan a kibawl pen in nalah a hu bing chi’n hattuom lamkai Sanal Edamaruku zong the Indian Penal Code section 295(a) tungtawn in case ana bawl khum uhi.
Indian Penal Code (IPC) Section 295A of 1927 ah “koi zong sakhuo ginna toh ki tuolou a gam tang, mi dang khat sakhuo kal a thugen, simmaw leh musit te tungah kum 4 tan thonginn (jail) khum ahi ban ah court in pha asah bang sum lieu sah ahi ding” chi’n kigiel hi.
Tutung a TET exam hall a biehinn zah ahi toh kisai etphat di’a poimaw ahileh – School huonga biehinn um chi pen govt in school recognition abawlna policy toh akituohna amah? I biehinn munte dan dihlou (illegal) a kilam ahizieh a kam suo ngam lou I mah? Headmaster pa’n exam hall a zah ding chi exam ma sang a theisahna mu tei sam ding hi’a bang chidan a exam zaw a a gen doh pan a diei?
~ Pupu Zou
A mockery of Christianity… a disgrace to Lord Jesus!!!! so wicked a conduct!!!!!