~ R. Sanga
Thumapi: India Daan Bupi in President kiang a thuneihna apiak dungzui in “Outer Manipur” a teeng, Singtang mite’n “Lampi Tang” zui a kivaihawmna mumaltak aneihtheihna diing uh deihna ziak in “Hill Areas Committee Order, 1972” kichi India President lui, V.V. Giri in hon bawlkhia hi. Hiai Daan pen: “The Manipur Legislative Assembly (Hill Areas Committee) Order, 1972” chi a minvuah in om hi.
Hill Areas kichi in ahuap gam pen President Order dungzui in hichi’n kigelh hi:
THE FIRST SCHEDULE [See paragraph 2(c)] HILL AREAS
1) Manipur North, Manipur East, Manipur West leh Manipur South revenue districts.
2) Chandel, Chakpikarong and Tengnoupal revenue sub-divisions of the Manipur Central revenue district.
Explanation – Any reference to a revenue district or revenue sub-division in this schedule shall be construed as a reference to the areas comprised within that district or sub-division, as the case may be, on the 1st day of April, 1972.
Hill Areas Committee Daan Bupi (Constitution):
1. Manipur State Assembly, Innpi ah Hill Areas Committee aom diing a, member(s) ahihleh Hill Areas huapsung akipan MLAs telching a om mite ahih diing uh ahi. State Chief Minister leh Speaker bel Hill Areas Committee Member ahihlouh diing uh ahi.
2. Minister khat peuhpeuh (State Minister ahihke’h Deputy Minister) tel in Hill Areas Committee ah thu agenthei diing a, himahleh Committee Member ahih keileh bel Minister ahihna suang in Meeting ah ‘vote’ aneithei kei diing hi.
Hill Areas Committee Nasep & Thilhih (Function):
1. Manipur Hill Areas huapsung a thil tengteng Hill Areas Committee thuneihna nuai ah aom vek diing hi.
2. ‘Money Bill’ chihlouh siah Hill Areas toh kisaikha ‘Bill’ peuhmah Assembly a puaklut ahihchiang in Hill Areas Committee in angaihtuah a “report” abawl dia piaksawn masak zel diing ahi. Bill toh kisai bang hiam thu buaihuai aom peuhmahleh Governor khut a piaksawn ahi diing a, huchi in amah thupukna pen thutawp ahi diing hi.
3. Hill Areas toh kisai thil khat peuhpeuh, daan bawlna hiam sepkhiak diing thilte hitaleh, ‘State Annual Budget’ – sum-le-pai zatna ah Hill Areas Committee in ngaihtuahkhawm a thupukna bawl in State Government ah deihdan pelut diing in thuneihna piak ahi.
4. ‘Annual Financial Statement’ – Hill Areas toh kisai peuhmah genkhawm diing a thuneihna Hill Areas Committee in anei a, sum muhna leh zatna Hill Areas huapsung ahih peuhmahleh ‘State Consolidated Fund’ akipan apoimoh dungzui in alalut in azangthei diing hi.
Theihtuak: Nasep-silbawl toh kisai Hill Areas Committee in amohpuakna adang tampi aom lai hi.
Hill Areas Committee Kum 40 A Upa Ahita:
April 1, 2012 chiang in Hill Areas Committee kum 40 a upa ahita diing hi. Tualsuak MLAs Hill Areas akipan Manipur State Assembly ah mipi ai-oh di’n hunteng in Members 20 zel sawllut in aom sek uhi. Mipite’n kithalawp leh lametna saangtak toh amaute sik-le-tang a Innpi a Daan bawltute lak a dinmun poimohtak luah diing a ‘vote’ manphatak pia in leh theihtawpsuah in kitelpina aom teng in adeihpen uh telching diing in nasatak in apang chiat zel uhi. Mipite dangtakna diahnel diing in nou sung a khutmong diah a tuisik taak khat beek amaute kiang tungpha samleh i chi mahmah hi.
Mi kimkhatte telching a aom chiang un, mipite “Lampi Kawi” tawnsak a, makaih thei mumal ngel lou in, amaute haksatna leh dangtakna phawkphanawn lou pawl zong omthei leuleu zel uhi. Mipite’n lah MLAs amau telching hinapi in houpih baannawn lou, akaal kigamla lua chih diing hileh kilawm, huaiziak in tutung akipan bel mipi leh MLAs kaal kinaizaw sem a khuimat poimoh ahi chih milip in theisiam in pangkhawm taktakta le’ng deihhuai petmah hi. MLAs khat peuhpeuh in Daan bawltu ahihna leh mipi ai-oh dia telching a om ahi chih theihna leh theihkakna hoihtak aneih teitei diing kisam hi.
THE SECOND SCHEDULE [See paragraph 2(f)] SCHEDULED MATTERS:
Hill Areas Committee Order, 1972 dungzui in ‘Second Schedule’ ah Scheduled Matters – Hill Areas huapsung a lam tuamtuam a sep-le-bawl toh kisai Members mohpuakna akigelh hi. Tuate lak a tam lou i taklang zual diing:
(1) Development and economic planning within the Plan allocations of the Hill Areas.
(2) Constitution and power and functioning of District Councils in the Hill Areas of Manipur.
(3) The regulation of the practice of Jhum or other forms of shifting cultivation.
(4) The establishment of Village Committees or Councils and their powers and other matter relating to village administration.
(5) Social customs.
Theihtuak: Apoimoh dang (The Second Schedule) – Scheduled Matters tampi om lai…
Abiktak in Hill Areas toh kisai a Daan omsa poimoh taktak theih ngeingei diing bangzah hiam aom hi. Hill Areas Committee Member khat in mohpuakna aneihte leh nasep-silbawl pianzia Daan Bupi (Constitution) ah kigelh dimdiam hi. Daan Bu a akigelh bang dungzui a semsuahthei tualsuak MLAs kua aom a? Kum 40 a upa Committee hita ngal a, mipite khantouhna diing leh nekzonna toh kisai Hill Areas huapsung ah adetdou settheih bangzah bawlkhiak in aomta a? Singtang Lou neihdan ngeina (Shifting Cultivation) toh kisai Hill Areas ah ‘Plan & Program’ zuihtheih diing kichian bang aom a? Hill Areas Committee sepkhiak diing tamtak lak a hiai, Shifting Cultivation toh kisai guanlut a om ahihman in Manipur State in ngeingaih se lou asuak hi. Huaiziak in, Hill Areas Committee Member(s) kuapeuh in amau Constituency chiat a diing ‘Plan & Program’ Meeting ah ngaihtuahkhawm diing in luikhe zel theile uh aphatuam in ahoih mahmah diing hi.
‘Development and Economic Planning’ toh kisai Hill Areas huapsung biik a zat diing Plan allocations kum khat in bangzah akiguanglut zel a? Tualsuak MLA khat in abialsung a diing “Plan” guanglut ngei lou houh hia le? State in apumpi a dia guangkhin chi a ngaihmuang maimah ahizaw hia chih bel i thei het kei zel hi. Atuam a “Plan allocations” aom diing ahi chihlam himhim phawk lou ngen hun paisate a Hill Areas Committee Members – (MLAs) telching a om nilouh louh uh hi hiam? Manipur State Annual Budget bawl ahihchiang in ‘Plan allocations’ toh kisai Hill Areas huapsung a thil dang a zat diing khat peuhpeuh Hill Areas Committee a luikhiak diing chih ahi. Hill Areas a sum zatna toh kisai kumteng a Governor/President kiang a “Report” Hill Areas Committee Chairman in a piaklut zel diing chihdan hizaw mah lai hi. Huchi hitaleh, ‘Development and Economic Planning’ toh kisai Hill Areas koimun pentak ah sepkhiak in a om a chih leh mi bangzah in hamphatna angahta ua chih lungsim ngaihsutna thuktak akipan dotna hong suak thei leuleu hi lou hiam?
India Daan Bupi – Article 275:
Manipur State Annual Budget ah Hill Areas a sum zat diing State Consolidated Fund akipan “Plan allocations” guanlut in aom hia om lou chih velchiantu diing bel Hill Areas Committee ahi. Hill Areas puahna leh Lou neihna, damtheihna leh sianthouna lam chiteng a khantouhna (socio-economic development) Scheduled Tribes, tualsuak mite sum zat diing, India Daan Bupi Article 275 nuai ah “Consolidated Fund of India” akipan ‘grants-in-aid’ Manipur Sorkar in Phualpi Sorkar akipan kumteng in ‘Funds’ tampipi alailut zel sek hi. Hiai Funds pen Hill Areas Committee in bangchi’n akizang zel a chih enkai diing in thuneihna anei hi. Manipur Sorkar in Hill Areas Committee atheisak hia, tua baan ah, ‘Hill Commissioner’ in sum zatna toh kisai bangtan atheihpih a? Hiai “Committee” pen amin maimai a om hi hiam? Manipur Sorkar nuai ah ‘Hill Areas Committee’ in mipite lampi kawi tawnsak in, tualsuak mite hamhaihtak a koih in tunitan khosakna, neekzonna leh khantouhna toh kisai adetdou kingakna diing ‘Hill Areas’ ah “Trade & Commerce” hi in “Marketing” hitaleh muh diing bangmah abawlkhiak om lou lailai mawk hi.
Scheduled Areas ahihke’h Hill Areas Committee kivaihawmna leh singtang mite (Scheduled Tribes) khantouhna diing bang, amaute kipuahphatna diing bang, thil tuamtuam a nam dangte toh kikhoukhiat lawtel lou a khosakna leh neekzonna kong bangkim a masawnna diing a Phualpi Sorkar in sum zat diing apoimoh dungzui a Art. 275 nuai a Consolidated Fund of India akipan Manipur Sorkar khut ah kumteng a ‘grants-in-aid’ apiak zel pen “Tribal Sub-Plan” zong akichi hi… Scheduled Areas huapsung a Scheduled Tribes, tualsuak mite zat diing a kibawl ahihman in… Singtang mite’n hamphatna angah diing bang uh tunitan tangzou ngei lou nilouh uh ahihman in tukum kitelpina a telching a om diing MLA 20 tualsuak mi siangset Hill Areas (Outer Manipur) akipan mipi ai-oh, Daan bawltu diing Manipur Innpi a sawllut a om diing ahita ua, gam leh nam itna ziak a kikhekna nasatak hong om lamen phot peuhmah le’ng maw!
Thukhitna:
Hill Areas Committee in singtang mite tengteng akhaikhawm vek a, India Sorkar in Outer Manipur gamluahtute, tualsuak mite, Scheduled Tribes, Singtang mite omzeneitak a kivaihawmna diing Daan Parliament in abawlsak: “The Manipur Legislative Assembly (Hill Areas Committee) Order, 1972” kichi – Statehood dinmun a Manipur dopsang ahih toh kiton in amaute (Tribals) kihumbitna diing a atuam a kivaihawmna neunou piak a om ana hidan ahi. Himahleh, “Hill Areas Committee” in tunitan asep diing bangtak a semsuah ngei lou in om nilouh louh hi. Bangziak hi diing hiam? Manipur Sorkar in hiai “Committee” hattak a apai a, ahi diing bangtak a naa asep khak diing lau mahmah leh kihta petmah diing ahi chih theikawm a, Outer Manipur akipan tualsuak MLAs tengteng thukhat saat a, kilualtak leh kipumkhatna hoih leh detdou hong piankhiak theihna diing a “Lampi Tang” zui a “Political Goal” kichian nei a kithukimna mumaltak toh Manipur Innpi a atangkoupih kaal uh angaklahhuai petmah mai hi.
Related posts:
- Singngat leh Hiangtam K, kikal a PMGSY lampi hong
- Zomite Neekzonna leh Khosakdan – II
- Zomite Neekzonna leh Khosakdan
- Manipur leh India Malsuah Gam a ST list tungtang
- Lemna leh Muanna Suangphum
- Nam Tuantualte Hamphatna
- Tribal Customary & Traditional Practices
- Polar Bear leh Penguin: UZO President leh 60 Singngat A/C MLA
- MAUTAAM KIALPI–Suahtaakna Lampi
- Kichamna Lhacha Natoh: Chamna Lampi (The ministry of reconciliation: the way to peace )
