Lamka hanmual a Setan biakna siansuah
Lamka, Nov 30: Lamka hanmual ah ni tamlou paisa in Setan bia pawl khat in hansuang 2/3 a Cross kigelhte athaisiat banuah, hantung ah a sign/symbol uh gelh in Setan bia ua, amau pawlin huai mun mah ah maicham bawlsawm nawn ua, Setan biakna suang tanpha phuhsawm uh chih thu omlai in, zan nitakin Pastor H Jamkhanpau EBC Central Lamka Pastor makaihin EBC Hiangtam Lamka local Pastor Rev V Jamkhanthang leh saptuam upa hunkhop te’n hiai mun zan nitak dak 9 velin siansuahna va nei uhi.
Lamka hannuol ah Setan biehna sign tampi mu khiet in um.
Lamka hanmual ah Setan bete’ chetna hidia gintak om ahi chih thu zakin Manipur Express staff te’n leng amun mahmah ah pai in lemlakna va nei ua, tua nung in Bethel Counseling Centre a heutu Rev Lallienmawi kiang ah hiai bang thilte Setan bete’ gamtatna mah hihiam chih dotna va kinei a, aman leng a symbol/sign uh ahi, amau pawl thilhih leh gamtatna mah ahi chi’n ana gen hi. Rev Lallienmawi ahihleh EFCI pastor hi a, Delhi pansanin kum tam kuamtak nnasem mah leh Lamka zang siat gawpdan atheih in a mun (spot) mahmah a nnasem dia kisa hi a, tuma zekin leng Spiritual leaders conference ana zintun in huai ah Lamka khawpi sung a saptuam makai 150 vel ana paikhawm uhi. Aman Manipur Express staff te’ kiang ah Setan biakna ataktak a om mawkpen lamdang petmah a, patauhhuai tawpkhawk kitung hita a, pianthakna ngah bangzahhiam omta mah le uh lunghimawh huai deuhdeuh chi hi. Saptuam mipite’ thumpihna ka poimawh mahmah uh chi hi.
Pastor H Jamkhanpau in agenna ah, Setan be pawlte khang hat mahmah in mi 1000 bang phazouta ding ua tuat hi ua, hun paisate in amau mah sisan banah, zawh-ngeu sisan leh ganhing chi tuamtuam sisan te zangin kithoih ua, tu in bel in mihing sisan mahmah a kithoih asawm taak ziak un, nulepa te’n leng i tate adiakin naupangte khawlak ah pawt tamsaklouh bitna pen hita ahi chi hi. Tulai in natna chi tuamtuam leh dawi nnasep tuamtuamte kihah gen mahmah a, ahihziakin natna chi teng dawi nnasep hilou ahi chi’n leng gen hi. (Manipur Express Dec 1, 2011 Issue)
UPDATE:
Lamka apan simlam km 5 vel agamla Khuga Dam apan gamla lou Khianglam leh Khuga Dam kikal a setan biakna dia a zatna mun uh zan Pastor H. Jamkhanpau makaih mah in December 1, 2011 nitakin va siansuah uh chih thu om hi. Tualou in, zan (Dec 2) nitakin Setan bia pawlkhat mi phatuam ngaite’n Khuga Dam lam mah ah va delhzak uh chih thu om hi. Thudang khat ah, tulai in Lamka khawpi sung veng khenkhat ah ui nou a lu kitankhia a, a pumlam kinusia a, alu (head) mang om zeuhzeuh hihtuak a, tualou in vok kul sung a vok nou piangtung tanpha alu ana mang zel hihtuak hi. A lu va tankhe te’n ahihleh blade hiam mahmah zang uh hihtuak a, a gil leng khuah ua ahihziakin sisan bua/kaai/taak khe lou hi’n gen leuleu pawl om hi. Khelhna bel sang mahmah ta hih tuak a, huchi kawmkal ah, Setan be taktak uhiam ahihkei leh bang bia uh ahi di chih ngaihtuah huai sim leh kilawm hi.
~ KK Valte @ Dosrap
Related posts:
- Defence Secy, KNO in Hengjang Public ground hong
- BYF Hiangtam Lamka in Muvanlai Camp vena nei
- A zawngte zawng gige lou ding
- Lamka khopi khan dan diklou
- Lamka Fashion
- Christian gam ah kidouna
- Sodom leh Gomorra khawpi Lamka
- GREEN LAMKA
- NIT Ki Tanglou Zel: Lamka Post Editorial [July 3, 2007]
- Pasian Biahna leh Miuzik
