I gam leitang i kembit jou na diei?

~ T. Zamlunmang Zou

Jamkholien Manlun in a la khat a, “Ka pu ka pa saatsa gam lei hi e, sing dangte di’n phal singe, i vangkhuo uh, kum khuo’n heisa bang pal aw” chi’a ana phuoh pen tutung Ccpur dist gamgi leh Manipur Land Manipur Land Revenue and Land Reforms Acts siemphat ding Assembly a hing ki gen ging toh kisai a thupi di’n koituoh kasa hi. I gam i lei tang tunga sil tungte tungtawn a i ki theisiemlounate koikhiet a i lasah uh a kaidan, thu ki banga sah hun hita hi.

CDSU leh COPTAM in Phouchakhai a i gam leitang kepbitna di’a leikha in a pawtna di a kei vang banga ana sepna tung uah pahtawtna sangpe’n pepum in nautang leh mipi lamkaite’n ahithei tan a thup di’a chielna bawl ihi.

Tamna thei dinga poimaw khat ahileh Phouchakhai a siltung pen ahileh i aw uh kijahna bul ahing suoh hi, ana thuo khate i nuoisie pihna hilou in tualang a i thangpaina uh i pum ngahkha ding uh, dahlam chia Manipur solkal in a issue neu nou khat a a’ng lah kha dih kiven poimaw kasa hi. Tuomun a siltung ahileh i pansie uh hoitah ahi a, i tuppen uh ahileh Manipur govt in i ngetpen a’ng address tei tei ding uh chi manghil sihlei hoi ding hi.

CCpur dist ahileh district dangteng lah a govt in zong a muonpen leh a jau pen hi din gintat huoi hi. Tua ahiman in a sunga tengte iki thutuo ua lungkhat a i luonkhawm uh poimaw hi. Tutung ikiphinna uh i nelsie ua, i pichin suo sih ua ahileh maban ah tambang in sil bawl lei zong itup pen mu nading bai nawnlou mai thei hi.

Tutung issue ahileh double standard a zong khan sang thei in kamu hi. A poimaw khat ahileh consultative meeting nei thei gige pen mipi sou thamna ahiban ah ham leh pau tuomte adi’a i lungsim uh kithei tuohna bulpi khat suoh hi. ADC hi’n Land issue ahisih leh kiphinna issue khat pou pou toh kisai a govt in kihou di’a ang hatta a ahileh lamkaite’n manghillou dia poimaw ahileh Prior Consultative Meeting pen nei ngei ngei i sawm ding ahi. Mimal ngaidan toh i pei chiengin i ki phinna pen manlou suoh thei jel hi.

I MDCte leh i MLAte un zong a gilpi ding uh khuollou a ka ai-awhpi mipite leh ka gam phattuomna ding chi’a thutah a gupngam uh kisam hi. A mipite kiphin, ei hing ai-awhte’n kam khat zong akeh ngamlou uleh mawhna san vawt suoh jel ding ahi man in mipi representte zong apoimaw bang a kipiehkhiet hamsa asah lou uh ngai hi. Unau Nagate a MLAte uh ki resign ngam thrap uh, en i bawl ngam di uai le? I bawl ngam uh ngai ahi.

Tami thu a i nam lamkaite uh ka houpina ah alungam huai ahileh nasatah a COPTAM leh CDSUte nasepna ki back up ahi chi chiet uhi.