Tam thutoh kisai ngaidan dohna tampi kana mu zieh in mipite ngaidan dohna Zolengthe tungtawn a bawl ahi. Mipite apat ngaidan giltah tampi muh in um hi. Zou sung tekahna hing zangdi kahi man in ana lungtheh i um khaleh ngaidam.
Zou puondum chi ni um, tuote’n a kankhawm Indian ah mi 25,000+ leh Burma ah 60,000 val nimnem hi. Kitam nailou ahiman in a zah didan gamgi i neisah leh mangthang thei, hing ki teikhiet mangsah thei din mun a um in ka mu hi. Shi ni, man ni a puondum i sil sihleh milah a silkhiet hun hing tawm deu deu ding hi. Sil khiet theina teng, office, school, khawmpi, kisuh khawmna khat poupou a sil zing hileh bawm ka chi nalai hi. Zou niih, Zou puon, Zou puondum, Zou neck-tie, Zou muffler, Zou waist coat, Zou khi, Zou tau, Zou samkil ichite ki zumpi lou leh ki thang-atpi tah a zah hi zize leh chi ngaidan kanei mawh hi.
US a um Khaiminthang in agenna ah ‘I puondum pen i nam flag tobang ahiman in a zaleen theitawp a zah ding, a hinatah manglou a design um thei bang bang a bawl zawh ding ahi’ chi hi. Rev. T.Henkhothang in ahileh “I puondum pen shina hazah sengta ihi man in shipuon bangdohta, Zo puondum pen gun deu in kinei henla, shina puon jatkhat a tuom in ki nei leh” chi ngaidan nei hi.
Zolengthe tungtawn a ngaidan khop ahi dungjui in ki ngaikhawh chietma hina va, mi 463 in ngaidan hing kum hi. Tuolah ah mi 279 in i puondum pen shini man ni a ten hida henlen, a tuom in tuonite a sil leh ten ding ki nei leh chi ngaidan nei uhi. A langkhat lam ah mi 184 in a lem tan dan dan a i puondum pen zah ngeng ngong ding ahi. Tuani a sil ding leh sillou ding chi umsah vate ngailou
achi chi ngaidan nei uhi.
Tamna ngaidan kumte i newspaper a tuonsah ding chi hinanleh a tam seng man in ki tuongsah senglou hi, hinanleh na ngaidan uh nang kup upen suong mantan sangin manpha zaw hi. Ngaisiem Aw!
Lam khat ah, Lamka lamte’n i ngaidan uh ahileh a tuom a nei ding chi ahi deu pen hi. Bang zieh hidng ahie chi’a ka sui chiengin i kim i vel a umte’n zong tuobang a na nei uh ahizieh in ka mudoh hi. Ngaisut tham ching khat – mi’n a bawl zieh a bawl ding imah? Eima bawl dan bang zieh a ki zumpi ding imah? Eima tawn dan leh bawldan bang zieh a ki letsahpi theilou idiei? Zou puondum shina ah ki ha teng sengta, shina puon hi aki chi kha ta amah? Ki chi naisam ding in ka gingta sih hi.
Ei sanga khova mu masa u nao Naga te’n ahileh shini manni chiengin numeite maimai hilou, pasalte tanpha in a puondum uh lien letlutpi batthaw chiet uhi. Etlawm hilou amah? Kum khat a khatvei nivei chivel akizah sang in zang zung zung ding, sesah zung zung ding, gaan zung zung ding, zuoh zung zung ding, a gaan te’n hinna a ngah theina uh hisah ding, the chi tah a the thang ding hileh Zou puondum min theizaw dingn ka gingta hi. Puondum, Puonlaisan chivel ahileh siitlou a zah poimaw hi.
~ T. Zamlunmang Zou
Related posts:
Loading ...
