Review: Gospel Tangkou & Khristian Kangkou

Bang zieha tam gel khel khel a’ng pangput ahei nachi kha mai thei. Chi tuoh mawng zong ahina hi. Ha tengin Zolengthe a download thei di’n ang thot zing gel uhi. Kana sim jel a, akhen chiengin chitah bang huoi kasa hi. Zou nam pumpi sunga laibu hateng a suoh i neisun uh hi lenlon gel nalai. Tam laibu gel toh kisai a bulpi lamte hi’n mun tuom a umte kungah kup tuoh them khat um in ka thei hi.

01. A Sunga Thu Ki Gielte: I tangkoute uh na sim khe e sim khalou chi vang thei sing, hinanleh ha tenga simte di’n chimta um isah hun zong um dingin ka ngaisut hi. Hattuom a ahi dungjui in Pasian thu-le-la ma suoh ding mawng hinah, ahi’n i musitna leh simmawhna hilou in khat vei vei outdated kasah hun bang a um thepthup jel hi. Tu giel i chi zong a masala tampi a’ng kihal khawm chiengin hing simnop pan hi. Tangkou a thute a taangpi’n en leh uchin singtangpa huohbu apat hing kuon doh, hattuom sunga khat leh ni sun kha chin chen di’a siihnei tah a kigen chite um sim zepzep in ka mu hi. Tam banga i laibu neisunte uh i suo zom zing uleh a thawn a kihawm hinaleh mi’n a’ng simpeilou hun uh hing um ngeingei di’n kilang hi. Article khat na gel ding leh bang chi’n ki giel leh mi ahiip in, tha nuomtah in mi’n a sim thei diei chi ngaisut ngai hi. Tulai khovel kiheidan zil a laibu a thu kigielte zong khansaang toudeu poimawh hi.

02. Editorte: Lutheran hi’n Presbyterian hitaleh i Tangkoute uh editor i guondan uh akin theilam a hen poimaw kasa tinten hi. Executive hi zieha editor vatu teitei poimaw kasa sih hi. Editor ding i chipen, workerte lah a laibu lam lunglut mi, laigel taima, khovel sil tungte lam a mitkeu deu poimaw hi. Workerte lah a tuobang a um sih lezong halaw nei hiel dinga atha nuom khat employ pen tuona biel fang peilou, tha nga zing pa sanga zong poimaw zaw in ka ngaisun hi. I gen bangin mifel leh taima, kukal khat in hunchiih khat hing enkol heh, ana en ua i hattuom sung auh tusanga ki thalawpna zong hing um zaw dingin ka gingta a, tuaban ah laibu sim lam ah zong kikhelna hing um ngeingei di’n ka lam en hi.

03. Laigiel Mite: Khang kikhel dungjui in laigiel mi zong hing kikhel tou jel ding hi. Ngaisutna thuom, Bible thu i za sasa hinanleh a chituom deu a talat dan, khovel siltungte toh Laisiengthou tekaahna chituom deu chivel, i gam a dinga phattuompi theina thu dang dang chite halkhawm poimaw kasa hi. Sermon, sermon sermon chidan deute tulai koima’n zong sim pei nawnlou hi. Tua ahiman in muntuom a laisim a umte’n zong article khat veivei contribute bawl zel poimaw kasa hi. Tutung issue a gielpa, hakia chie zong giel jel, akia sawn chia zong giel jel chipen den don vai kichi maimai ta hi.

04. Laigel A Hoina: Mite banga siem kihisih nanleh, thei kham kham a ka laigel masa penpen, The Sangai Express a a’ng kisuoh ni’a pat kimuonna khat nei in ka kithei hi. Tuami zong ka lungsim a um, a hivanga a bul pan thei lou, patsawm jel hinanleh a thuteng masa dipen giel doh theilou in ni bangja e khat ka kiniim hi. Atawp khong ah ‘ih’ ahi hi hi, a suo suo suoh chi’n ka pan a, a thupen ahileh a ban ban in hing kilang dundun hi. Article laiteng 1000 vel ka gelna dingah laibu dang 9 ka en kuol lele hi. Tua banga ing bawl chieh eima di’n zong phatuom a, eima mai ngaidan hinawnlou, mi dang 9 te ban ah tuate’n zong ala etton sawn uh midang tampi te ngaidan hing ki gawmkhawm ahiman in a sim zong nuom a, a thu zing hing gil deu hi. Khatvei i’ng gelkhiet nahleh a dang pen gelnop toutou den hi. Tua ahiman in na lunga hing kilang thu na thei leh pen leh paper toh kipan pai lechin tuo khel a midang bun zaw laigel um khollou ahi.

05. Literature Lam Ah: Zou sungah chilai sangin tuhun chiengin Hattuom lam ah ki chimatna leh ki theisiemna hing khang pnpan ta hi. Labu, Laisiengthou chite bang common in hing kibawl theita hi. Hoitah in en veng veng lei hattuom te’n literature lam nasatah a puopha ahidan uh kilang hi. Labu khat ibawl leh i hattuom bawl pen ki thei, a laiteng zahdan tanpha ki thei. Khat in a tuom, adang khat in atuom a i’ng bawl chieng un lasah thugen zong hamsa pi khat hing suoh hi. Tua ahiman in ahithei tan a laiteng zahdan kibang jui sawm poimaw hi. Tuaban ah Hattuom khat in ham dang la khat analeh man taleh a kibang lou deu a valet sese lou in ana kilet masapen bang bang in zilsuh or sasuh lei i lenkhawmna, kipawllimna munte ah buoina bangma um lou ding hi.

I laidal un tam dawllou ahiman in tamtan ah khawl phot tavai. Hunpha imu leh Hattuom te pansan a i Zou sung siem phatna ding lampi tuom tuom umte i kikum tou kia ding uhi.

~ T. Zamlunmang Zou

admin@zolengthe.net

———————————————

Please Visit ZOLENGTHE.NET | Connecting the Zo people