~ Suanlyan Tungnung, Zomi Colony

THUPATNA

Mihing ten idei mama uh ahi leh tahsa damtheina ahi. Tahsa damtheitah nei mikhat alungsim zong adamthei ding ahi. Tualeh lungsim damtheitah nei mikhat in ngaisutna chiim leh siengthou anei ban ah ahinkhua a buaina atuahte asuveng thei ding hi. Tamte ban ah alawiapai, aseppi alawm-agual, ainnkuanpite leh amihinpi tetoh akilem (good relationship) ding hi. Hagau hinkhua ah midangte sukipaah leh lungmuongsah tu ahiding hi. Tambang mihingte lungsim damthei (no mental illness) ahi uhi. Itahsa leh hagau pen atuam tuah hinanleh akikhen theilou sil ahi. Tualeh LUNGSIM NATNA (Mental Health) bang a diei?

LUNGSIM DAMTHEINA

Mihing in lunggeel inei chiet hi. I lung geel, akan-aval a asaan a, tam lunggeel in inichin hinkhuo asuhbuai a, bangma sem utlou/ zoulou leh tahsa damlou a ium khu lungsim natna (mental illness) ahi. Tualeh lungsimnatna pen “natna
chikhat mihing tawndan leh theidan/geeldan azong dihlou hinanleh mihing lunggeel, ngaisutna leh umdan/hindan subuoithei ” chilei asiengpen ding in ka gingta hi. Hinanleh eiten MINGOL/MIMAW (Mental disorder) leh LUNGSIM NAT(Mental illness) itheikhen sih uhi. Tualeh lungsim nat ichi chiengin HEART CASE(lungtang natna) ichite zong ahisih hi. Tam lungsim nat ichi pen LUNGGIM SENG SENG ichite hiding inzong igingta hi. Lungsim nat nei itam mama ua, mi naran (mitangpi) toh kikhietna a neituom sih hi. Eilah ah, atangpi in, kingaisietna (depression), zauthawngna (anxiety), nu-le-pa kaal (sexual problem) leh zu-le-sa, khamthei-guithei bawl zongsahna (addiction) chite atam mama hi.

BANGZIEH ADIEI?

Mikhat alungsim ahing buaisiet leh azieh aum ding hi. Eilah ah entalei, khenkhat kaupe/kholaipe ichi ua, khenkhat gam mat/tuimat/ sih-tui mat etc., ichi uhi. Tualeh khenkhat damlouzieh inzong a umthei hi. Hinanleh (i hindan thei kawm in) lungtang natna pen a tangpi in anuai ate zieh ahi utdeu
hi.

1. Hinkhuo a hamsatna tuoh zieh: I hinsung in sil tampi ituohtou a, khenkhat anuam, khenkhat ahamsa hi. Hamsa isahte zong ithuoh toujel a, initeng hindan ahing subuai sih hi. Hinanleh buaina leh lungkhamna tampi ahing kikholkhawm chieng in puohsiem ahing hamsa ta hi. Ingai mama khat hing shi, neehding umlou,muonna umlou, innkuon kituohlou, nupakal kituoh lou, khosung a lemna umlou leh adang tampite ahing kisuhtuo chieng in ihinkhuo ningkitelhuoi hinkhuo ahingsuoh hi. Tambang buainate, mi khat in kum bangzat vei ahei khat ahing thuohtou chieng in tahsa damlouna tuamtuam ahing nei thei hi. Tampen tahsa damlouna hi pongsanlou in, lungkhamsinkham tahluat zieh a hing um ahibou hi.

2. Innsung hindan kituplou: Mihing aneulai a suhgenthei a um, keplou-donlou leh ngaisahna umlou a hinkhuo mang, ittu ding mi umkhollou, ahilouleh kiphawh mun tasengseng kijeep/kisaat munta sengseng in alungsim a zauna toh hinkhuo mangdenta(traumatised) ten ahing upat chieng un lungsim damlouna anei ut uhi. Adieh in,  tambang miten aletnung chieng un
mimal hinkhuo a kingaisietna sangtah banah hinman umlou sahna (depression) leh zauthawngna (anxiety) anei ut uhi. Tambang ma in ama unzong mitung a silgilou bawl khoh asa sih ua, bawlzong a ut uhi.

3. Huoh natna( brain diseases): Pienken a michinglou, sil theithei lou leh sil chiemte theilou, anuaama zong theilou chite khu huoh natna neizieh ahithei hi. AIDS nei, lutang(head injury) kisuhkhahna, zeng, kisat, thakhaat thu a dinpua (huntutnei) leh chilphuan pawt, thakhat a naahtheilou leh khothei lou chite zieh inzong lungsim nat aumthei tham hi.

4. Damdawi zieh(Medical problems): Kalnat ahilouleh sinnat zieh inzong mental illness a umthei hi. Tualeh natna khenkhat zenna a kimang damdawi khenkhat inzong tam natna atunthei hi. ( etsahna BP damdawi in depression atunthei hi). Dawi leh kaute hei a um ata diei le? Tampen itawndan (culture)
toh kisai a inei ahi hi. Agingta aki um a agingtalouzong a ki um hi.

THEITUOH KHENKHAT

• Lungsim natna (mental illness) chitampi a um hi. Tam natna in suhdam theilou tahsa poilongna atunthei a, shina zong atunthei hi.

• En mingol/mimaw chia itheite, atangpi in Schizophrenia, manic-depressive leh acute psychosis chite ahi. (Tamte ahi uleh lungthah a ki-tom, ahilouleh aumdan theilou, puonsil-niihteen ding donlou a umte, amatang a kihouhoute kigeenna deu ahi).

• Mikhenkhat in lungsim natna huoise deu neite (psychiatric) dawile-kaute pe hiva ichikoi valong uhi.(Etsahna: khosih sang sengseng a mot-hamhamte) Thamlou in MANGMUTHEI chibang inei ua, ageente uh PASIAN gen bang in ipom uhi. Tualeh amatang a kihou thitthet te zong DAWILAWMNEI ichi ua, zauhuai sapawl leh athugen ngai ut ium koikoi uhi. Damdawi toh suhdamthei himaithei hi. Medical explanation um maithei hi.

• Tamipa/taminu’n lungsim natna anei hi chi in mi geense sinlen, lungsimnatna pen aumthei ma hi chi thei in. Tuabanah tabang natna veite ading in bang kibawlsah leh ahoi diei chi ngaisun inlen, nangzong tam tungtang ah maw pawkha nahi dan thei in. Ama zong nang bangbang a natna neilou a um ut mama ahi hi.

— sut zop nalai dih

Print PDF