ZORO Gen HQ makaite tawh meeting

Lamka, March-8: ZORO Northern Zone makaite inntekna in March 6,2010 in PTC Conference Hall ah mipi kikhopna om a, huai ah Aizawl apan hongzin Zo Re-Unification Orgn(ZORO) Gen HQ makaite’n uap uhi. Huai ah R. Thangmawia, President,ZORO Gen HQ in May, 1988 in Champhai a 1^st World Zomi Convention om akipan  Zo(Kuki-Chin-Mizo-Zomi) Re-Unification Movement paitouzel dan report pia a, India, Burma leh Bangladesh a Zo suante kigawmna dia ZORO in kum 20 val pan alakdan tangpi leng pulak hi.Aman Sept 2007 in UNO ah Zo suante leitung a “Indigenous Peoples” khat a registered ahihdan leng gen hi. Kipumkhatna a hatsemna dingin Zo Innpi(Council) hatksak sem poimawh thu leng ZORO President in gen hi. Huaia tel Dr H. Lallungmuana,ex-MP(Lok Sabha) & Consuiltant,ZORO Gen HQ in kigawmkhawmna bukim om theihna ding in Pathian lau in amah thu zui lehang Pathian in bangkim hihthei ahi, chi’n gen hi.

Numei zukham 1 in a inn katlam theilou

Lamka, March 8: Zenhang Lamka a Tuitha nui naihsim lam a teng Mrs Liannu (name changed) tenna inn tunitak dak 8 vel in mei in kaang a, aman zu akhamluat ziak in a inn kat lam leng theilou a, innkim-innkiangte’ ban ah khawsung mipi pilvanna ziak in a hinna tanpha hutkhiak a om man hi’n kigen hi.

Thusuak kingahdan in, Mrs Liannu in hun paisa in leng zu dawn sek a, a lupna kiang a khawnvak (lantern) adet uh beengpuuk kha hiding in ginthu kigen a, huchi kawmkal ah, alupna nuai teng kaang in, a puansilh (blanket) leh puanphah (dunlop/matress) pehtou a, thousileen (mosquito net) akat tanpha in khawphawk nailou hiding in muanmawhthu gen uhi.

Meikuang pen thakhat thu a inn tung lam a kikhoh tou in langva kaang zek man a, meivak leh thilgim nam in vengsung mite patausak hi’n gen uhi. Innkim-innkiang ban ah Zenhang Lamka mipite’n delh huan in meikuang phelhmit ua, Mrs Liannu leng a lupna apan domkhia in kong ah koih ua, a khut lak kaang zek man in district hospital tun uhi.

Ni 4 sung sitting om ding Assembly Session kipan, Chief Minister  in Supplementary Demands for Grants, Budget leh Vote on Accounts luikhia

Imphal, March-8: Manipur Assembly Budget Session ni 4 sung om dingin tuni zinglam dak 11.00 in kipan a, Committee Report tuamtuam 2 luikhiak ahih khit in Finance leng  lenkhawm Chief Minister O. Ibobi in March 31,2010 tana state govt in a sum zat ding a House in a genkhawm zawh a pass dingin “Supplementary Demands for Grants,2010” Rs. 733.91 crore luikhia(present) a, huaizawh in kum 2010-2011 a Budget Estimates Rs. 4,939.40 crore luikhia in huaipen kum 2010-2011 a  Plan Outlay bikhiah nailouh ziakin Provisional Budget dan in CM in luikhia a, huai lakah Plan sum Rs. 1,821.64 crore banah Non-Plan sum Rs. 2,883.24 crore leh Centrally Sponsored Schemes, Central Plan Schemes leh NEC schemes a Rs. 234.52 crore tel hi’n len taklang hi. Huaizawh in Chief Minister in April,2010 akipan July,2010 tan kha 4 sung state govt in a sum zat dingin Vote on Account,2010 nuaiah Rs. 1,646.46 crore leng luikhia(present) hi.

Chief Minister in Supplementary Demands for Grants,2010” luikhe kawmin a genna ah  March 31,2010 tana zat ding Rs. 733.91 crore tangpi taklang in employees retire-te pension sum piak ding,MPSC examination hall kibawlthak a furniture man ding, street light zatman, PHE deptt in electric fee a batlai omte adia piak ding, District Council nuaia teacher-te lawh piak ding,Lok Sabha election a senna leh Assembly by-election a senna, helpawlte thah innkuante kianga compensation/relief/ex-gratia a piak ding leh senna poimawh tuamtuam a ding hi’ taklang hi. Chief Minister in Budget Estimates,2010-2011 a luikhiak hun ah  Planning Commission in kum 2010-2011 a Manipur in a ngah ding Plan size a bikhiah nailouh ziakin kum 2010-2011 a full Budget ngeina bangbang luikhiak theih hinailou a, Plan size bikhiah ahih nunga Non-Plan allocation finalised zawh in full Budget luikhe thei ding hi’n leng gen hi.

Huaima deuhin  Chief Minister in 13veina Business Advisory Committee,2010 report luikhiak a, huaikhit in Education Minister L. Jayentakumar Singh in Selection Committee  on the Manipur Higher Secondary Education(2^nd Amendment) Bill,2009 leng House ah luikhia hi. Financial Bill tuamtuam 3te Chief Minister in a puaklut khit in T. Mangibabu Singh,MLA in January 13,2010 a Assembly Session honna hun a Manipur Governor in a thugen kipahpihna thusun pawlut a, Governor’ thugen thudik leh bukim ahihdan gen hi. Aman a gen behna ah kum 2005-2006 akipan state a sum-le-pai dinmun hoih takin paitou thei a, govt in thil tamtak semkhia in kong tuamtuam ah masawnna(development) om hi’n gen hi. Mangibabu thugen N. Mangi Singh,MLA in thuap(seconded) hi. Assembly Session bel March 9,2010 zinglam dak 11.00 in sunzom nawn ding uhi.

Statistic deptt te’n pension kha

Lamka, March 8: District statistics deptt te’n tuni in a staff pih uh Feb 28 2010 a pension Liantawn Hauzel, Asst Director, Neikholam UDC leh T Surendra Sub Inspector te khakna tuni’n a office mun uah nei uhi.

“Song & Painting Competition” om

Lamka, March-8 :7-Sector nuai a om 2-Assam Rifles leh St. Xaviers School kithuah te saina in Thanlon ah Painting leh Song Competition om hi. Huai ah khaw tuamtuam Aina, Leijangphai, Zoutung, Parbung leh Bukpi akipan in school naupang 200 tel uh a, kidemna tuamtuam leng om hi’n kigen hi.

Cl XII examna tuni  in kipan

Lamka, March-8: Council of Higher Secondary Education, Manipur saina in tuni in examination  centre “A” CCpur Govt College leh centre “B” Lamka College ah Class XII examna(Hr Secondary examination)kipan a, candidate 1463 lak ah 1423 tel uh a, 32 absent uhi.Centre “A” a examna ah  Arts stream a candidate 465 lak ah mi 450  exam   uh a, Sc stream a candidate 438 lak ah  424  exam uhi. Exam Centre “B” ah  Arts stream apan candidate 247 lakah  243  exam uh a,  Sc stream a candidate 220 lak ah 215  exam uhi.Examination  Centre 2  kimkot metre 100 ah Dist Magistrate in Cr.PC 144 koih in Police-te duty uh a, candidate-te chindan kilomlou kuamah matkhiat omlou a, March 26, 2010 in zouding uhi.

Tuanchinthang’ inn kangtum

Lamka, March-8: Mata Mualtam gam liantak Feb 25, 2010 sun lai in  mei in kang a, meikuang paisuak in Tuanchinthang s/o (late) Chinzanang of Mata Mualtam tenna in kangtum dimdem in innsung van lakkhiat man omlou phial a, inn kang ah Rs. 1 lakh man inn leh van tuamtuam  kangtum hi’n innneitu Tuanchingthang in tuni’n Police Station ah lemlak telin report pia a, Police te’n leng thil omdan chiamteh  uhi.

Auto bhara pung pomlouh thu theisak

Lamka, March-8: S. Munnuam, Mata, Bisanmual,Lingsiphai, Tangmual, D. Leikot leh Tualnuam akipan  Village Authority Chairman/Chief tengin suaikai in President/Secy, Mata to Lamka Auto Assn ah lehkha pia uh a, March 1,2010 akipan Mata apan Lamka kikal Auto bhara Rs. 5 apan Rs. 10  a pung tungtang ah mipite patauh ziakin khaw tuamtuam apan Hausate’n patauhna tak mah hi’n taklang uh a, huaiziakin abial a Hausa upate tawh genkhawm masiah huai bial a totkhak uh March 9,2010 akipan khawlphot ding in theisak uh a, huai ngaihsaklouh ziaka Auto service-te tung a thiltung a om leh amau mawh kipuak ding uh hi’n theisak hi.

Accident ziak in mi 3 liam

Lamka, March-8: Lianchinpau (35) s/o Nengdou of Zomi Colony tuni sun dak 12:00 velin Kamdou Veng ah Activa gari in accident a, akhuksiin (knee-cap) veilam khaang a, Dist Hospital ah admit in om hi. Tongtinlal (45) s/o Nengkai of Selvung(Henglep Sub-Divn) kalnih  vel paisa in gamlak a louvatlai tempawng in akhukguh veilam satliam kha a, tuni’n Dist Hospital ah puaklut leh admit in om  hi. Lalchawnthanga (78) f/o Tawnluai of New Lamka(G) tuni zinglam dak 11:00 vel in Hmuia Veng a SALOM Hospiece kiang chin ah  lampi geia omlai tuipua DI gari pei(tyre) lengkhia in alu dengkha a, Dist Hospital ah admit in om hi.

Eviction ding khawlphot uh

Lamka, March-8: Addl SP/CCpur makaihna  in Police team  khatin Tuibuong area

a Govt Quarter Type -II a inn 9 leh Type-III inn 3 ah phalna neilou(unauthorised occupant) omte eviction bawl ding in kuan uh a, hileleng Quarter a omte lakah a tate uh Class XII & Class X examna a tel a om ziakun eviction bawl nailou din ngen uh a, huaiziakin Police te’n eviction bawl dinglai khawlphot uh chihthu om hi.

DC makaih in DLCC meeting om

Lamka March-8: DC office a BRGF Hall ah tuni in Dist Level Co-ordination Committee meeting om  a, SDO/ BDO leh Dist Level Officer tamzaw tel uhi. Electoral Roll Revision tungtang ah DC in ZEO leh CEO kiang ah inn ah banlut a, hoihtak a sai din theisak a, Sinjawl, Pherjol leh Tuilaphai  a Medical Camp adingin  panla din leng  CMO theisak hi.  Vaingai area ah NREGS tungtawn in  rubber plantation seminar om ding a, Agri, Horticulture  leh Forest Deptt te’n akisaipihte kithuahpih ding in DC in theisak hi. Tu March 2010 kha  financial year ahih ziak in March sungin DLCC review meeting omlou  ding a, April 6, 2010 in DC office ah om nawn ding a, huai ah Police-te telin  Deptt teng in amau achievement report gelhthawh a pe di’n  DC in DLO teng theisak hi’n kigen hi.

CE leh Supdt khakna om ding

Khuga Dam Local Employees Association pawlin Chief Engineer(IFC/Khuga Project) hihna apan retired  SD Gangte @ Kakap leh Superintendent(IFC) hihna apan retired T. Thangzalam khakna programme March 9,2010 sun dak 12.00 in Khuga IB ah nei  ding uh chih thutut kingah  hi.

Khawmpi hun ding suan uh

Khuptong Valte Innkuan Khawmpilian,2010 hongtung ding March 13,2010 in Lamka khua a om ding chih himahleh a lemchangzaw ding etna in ahun suan uh a, Central Executive Committee in ahunthak ding bikhiah ding chi’n Secretary apan thutut kingah hi.

SUUNNA

P.Khamkhomang Zou (52) f/o Thangminlian of Tuibuong Dist HQ tuni zinglam dak 9:30 vel in sungna in si a, tuni’n Dist HQ hanmual ah kivui hi.

Ginsang Hangzou (25) s/o (late) Thangzahau of Pearsonmun, apaisa Kiginni nitak dak 9 vel in Bangalore a a om na mun Vasanth Nagar ah natna neikhawl leng hilou in si phut a, ZCF Bangalore panlakna tawh tuni in aluang akhua uh puaktung in om a, nitak dak 6 vel in vui in om hi.

Siamman (76) w/o (late) Songlian Naulak of Pearsonmun, hun bangtanhiam sungna natna neihziak in Imphal ah ki enkolsak a, tunitaklam dak 4:50 vel in RIMS ah si hi. A luang Pearsonmun puaktung ahihnung in tuni (March 9) nitaklam in Pearsonmun hanmual ah vui hiding hi. Amah ahihleh, Manipur Police a sem N Ginmuanthang pianna nu ahi hi.

Helpawl in A/R 2 kaplum, 2 liam

Imphal, March-8: Chandel District sung Warou a Mourouripang village   ah tuni zingsang  dak 6:30 vel in 15-Assam Rifles  leh PLA-te kikap uh a, huai ah A/R personnel 2 si in 2 liam uh hidan in kigen hi. Mourouripang khaw hausa Chingai Yartio in  press-te kianga a genna ah  tuni zing dak 6:00 velin PLA pawl full combat dress a kichei 100 vel  khawsung ah valut uh a, tuanung sawtlou in 15- Assam Rifles te gari 3 a kizui in a khaw kiang uh Selungpham Khunou Santipur ah Gari apan kumkhia in Mourouripang zuan in  khe in pai uhi. A/R pawl a pailai un PLA te’n  mu in kap uh a,  A/R personnel 2 si in  2 liam uhi. Huai hun ah PLA te’n bomb  3  kapkhum uh hi’n leng gen hi. Hibang a kikaptuahna om zawh in Mourouripang village a om pasalte  khua a om ngamlou in taimang vek uhi. Village Chief Chingai Yartio in Assam Rifles te’n misi 2 leh a liam 2 Ambulance a a guan lai uh mu ahihdan gen a, huai apan in Thoubal tan gari a pua in Thoubal apan in Leimakhong ah  Helicopter in pua uhi. Huai thu zakphet in 9-Sector  a Assam Rifles te’n a mun delh l in operation bawl uh a, tuni nitak tan inleng matkhiak a neih thu uh zak hilou hi. Amau operation a bawlna uah gam lak tanpha mei in hal uh  hi’n kigen hi.  Tuni a kikapna mun bel  March 2, 2010 a Maryland a A/R leh PLAte kikapna mun apan gamla hi’n  kigen  hi.

Bar Assn  Spl. Gen. Body meeting om

Imphal, March-8: Advocate General (AG) N.  Koteshwar Singh zan in Works Minister K. Ranjit leh TD Minister DD Thaisii tawh Ukhrul District a Hundung pha kiklam kapkhak ahih tawh kisai in tuni’n High Court Bar Association, Manipur member-te’n Special General Body Meeting nei uh a,  thupukna tuamtuam 6 la uhi. Amau huai thiltung  mawhpaih uh a, thiltunna mun tawh kinaipen  Police station ah FIR gelhlut din lemsa ua, CBI ahihkei aleh Independent Agency in thil omdan a sui ding,  tuni leh March 9  in High Court  a advocate  nasemlou ding, March 9 zing dak 10:30 apan nitaklam dak 6:00 tan Guwahati High Court, Imphal Bench kong ah dharna neih ding thupuk uhi. Thupukna a bawl uh  copy leng Bar Association leh Bar Council of India ah leng  khak ding in thukim uh a, Governor, CM, Chief Secretary leh DGP banah Imphal East SP te kiangah leng copy pia in  a kinlam a panla ding in theisak ua, March 9 in leng dharna tukum in  Special Emergency Meeting  nei ding uh hidan in gen uhi.

Commando te’n helpawl 1 mankhia

Imphal, March-8 : Thoubal Commando-te’n zan zinglam dak 2:30 vel in  Hiyanglam Mayai Leikai area lak operation a bawlna uah PLA active member  Elangbam Inao @ Che (27) s/o (late) E. Bijen of Hiyanglam Mayai Leikai mankhia chih Police thusuak om hi. Amah thudotna apan in kum 2002, 2003 & 2004 sungin  Wangjing, Singngat leh Selungpham munte a security force-te tawh kikaptuahna a telkha ahihdan leng kipuang hi.

Irom Sharmila khahkhiak in om

Imphal, March-8 : Manipur a Armed Forces Special Powers Act (AFSPA) lak khiak ding deihna a an-ngawl a kiphin ziakin Police te’n man in JN Hospital Security Ward a om  Irom Sharmila tuni in  matkhiak ahih  nung  kumkhat a chin tawh kiton in khahkhia uhi. Akigendan in Court in Sharmila  khahkhe dia thu apiak ziaka khahkhiak hi a, aman khahkhiak ahih phet in JN Hospital kong ah kiphinna sunzom veve hi’n kigen  hi.

26-A/R te saina in Inter-School Competition

Imphal, March-8 : 26-Sector Assam Rifles-te saina tuni in Pallel  ah Inter-School Competition om hi. Huai ah group song, fancy dress leh group dance chihte sai uh a, school tuamtuam 5 apan in student(naupang) tamtak paikhawm uhi. Huai hun ah Brigadier S.K. Bhanot, Commander,  26^-Sector khuallian in pang a, kipahman tuamtuamte leng pekhia hi.

Community Hall hong in pekhia

Imphal, March-8: Chandel District sung Chakpikarong Sub-Division a Aibol Zoupi village  ah  6^--Assam Rifles te’n Community Hall  lamsak uh a,  March 3, 2010 in huai Community Hall honna leh khaw mipite kianga piak khiakna nei uhi. Huai ah Colonel Rajesh Gajraj, Commandant, 6-Assam Rifles khuallian a pang in pekhia  a, kim leh kianga khaw tuamtuam akipan hausa(village chief) tamtak leh Secy. te’n uap uhi.

Assembly News

RIMS Hospital a CT Scan

Imphal, March-8: Dr Ng. Bijoy,MLA in tuni’n Assembly Session ah RIMS Hospital a CT Scan facility bangchik apan omlou hiam huai thu ah state govt in bangtan panla hiam chih a dotna CM in a dawnna ah kum 2006 akipan CT Scan facility omlou ahi a, RIMS akipan report kingah danin CT Scan leina ding in process pai hi.

Police in galvan 1728 mankhia

Imphal, March-8: Kum 1990 akipan in state Police te’n galvan bangzah mukhia(seized/recovered) uhiam chihthu tuni’n Assembly ah W. Morung Makunga in dotna a bawl CM in a dawnna ah Police te’n 1990 akipan galvan 1728 mankhia/mukhia uh a,huaite lakah galvan neu(small arms) 104 vel auction a zuakkhiak hi’n leng CM in gen hi.

SDC Island Circle function lou

Imphal,March-8: Doukhomang Khongsai,MLA in tuni’n Assembly Session ah Saikul Sub-division a SDC Island Circle office dinmun dotna a bawl Revenue Minister Th. Debendra in a dawnna ah huai office function lou a, huaiziakin SDC a omlouh banah staff leng koih hilou hi’n hilhchian hi.

Assam helpawl cadre khenkhat te’n designated camp nusia

Guwahati, March 8: Assam state assembly pailel ah tuni a dotna khat Forest Minister in adawnna ah, tuma zek a designated camp apan taikhia DHD-Jewel ‘commander-in-chief’ Niranjan Hojai mat theihna ding in ‘arrest warrent’ om ahi chi hi. DHD-J pawl in ahihleh, centre government tawh kitheihsiamna aneihnung uh Assam’s North Cachar Hills district ah designated camp nei uh hidanin kigen hi.

Alou theilou program neihziak a session atelmanlou Chief Minister Tarun Gogoi tang in hiai dotna poimawhtak Forest Minister Rockybul Hussain in CM tang in dawnna nei a, Hojai pen kintak a mat a dan tawh kituak a tung ah gawtna piak hiding chi hi. AGP MLA Hiren Das in DHD-J member khenkhat in designated camp nusia uh hilou maw chih dotna abawl, Rocky in adawnna ah, Niranjan leh Dima Halam Daogah(Jewel) cadre 20 vuallak ten Jatinga designated camp nusia in taimang uh chih thudik hi a, amaute mattheihna ding in arrest warrant lengomta ahi chi hi.

Thusuak dangkhat in agendan in, Centre govt leh Assam helpawl khenkhat in kitheihsiamna nei in helpawlte designated camp ah khum in om mah le uh centre in thuchiam a bawlte a taktak a a sukpichinlouh ziak in helpawlte thangpai in designated camp tuamtuam apan in DHD(Nunisa) faction 7, NDFB helpawl 40 leh ULFA cadre mi 5 te designated camp apan taikhia uh chi uhi.

Print PDF