Gospel Tangkou | January & February 2010
Editorial | Gospel Tangkou simtute zousie Kumtha chibai Editorial Board te thakhel in kahing bawl masa uhi. Kumtha gualzawlna na tung uah Pa Tapa leh Hagau Siangthou Pasian in hing umta hen. Pasian mapuina toh 2010 i gaalkai ta ua, hitan chieng dong a zangaina toh hing pui zing i Biah Pasian min phat in um sawnsawn ta hen. Tu Kumtha hi a dieh in Pate a dinga kikhelna tha hisah sawm lei chi deisahna lianpi toh kahing gial ahi. I mai ah kam phatna leh kamsiatna aum hi. Pasian in amite Canaan gam apuilut ding lai in ‘Dan’ thupieh khautah ana pie hi. Kanaan mite banga umlou ding chi ahi. Tuama bangin ei Pasian ta Pa deitahte zong kumtha ilut toh kituoh in tam kumtha 2010 sunga thangtatnate, kiletsahnate, kiven zoulou nate leh Pasian thei loute hindan banga um louin Pasian dan thu toh kituah in umsawm vai.
Ahisih leh i vaigei kha dinga, tua i bawl khial leh etton itahlou nate nikhat ni chiengin mittui luonna ding leh i kana ding ahi. Pu leh pate thupil in “Sakhi api asan leh anou san.” anachi thupil ngaitua kia vai. Ei i hoisih leh itate hoilou ding china toh kibang ahi. Amabou ta Nu leh Pa toh kibanglou deuh khat inei khah le lah thu tuom hivan. I taleh inau, itute’n mi phaleh chi ingaikhoh leh tukum 2010 khu ei Nu leh Pate a dinga kivel phat kum, kisiamtha kum in zah sawm lei ikisia sih ding hi.
Kumpi minthang David tangthu apat akhang uh khelna thu tamlou i thei na ding in kahing talang hi. Exo. 20:14 ah Mosi Dan in “Ang nakawm ding ahisih” chi a, Juda in Amounu Tamar luppi a akhang somna tan ah angkawm hah leh suonte suoh uhi. Juda in a mounu Tamar toh ahin a tapa Perez apat Jessi, David Pa khang 10 tan ah jui hi. Ruth. 4:18-22.
Tuajiehin tunia etton tahlouna hinkhuo izat ten ita leh naute tunga hing pei suhsuh ding khanggui khelna ahi jiehin kiveng siam in lampi peidan siam vai. Aipi a soivah chi pu leh pate thupil in ang juilouna dingin pan ilatha ding uhi.
Khanggui basamlou ding, khanggui khahna te hing jui lou ding, khanggui a gualzawlna, khanggui a vangphat nate na tung ah ni bangin hing tangin gual hingzawlta hen aw. Amen.
PDF 
