~ Nu Mannuamching, M.C.S.

Numeite khantouna khu Innsung leh gamsung khantouna ahi.Pasianin numei khu pasal panpitu ding in ana siem hi.Gen.2: 18 . Tami apan numei pen silbawl thei a siem ahi dan alang hi. Hinanleh eite lah le gam khen khat a numei pen pasal sanga ngiem a koina abei nai sih hi. Mi khen khatten numei khu inn na sem ding leh ta nei ding bep in a ngai uhi.Tuajiehin, numeite laisim sah ding bang ana gelsih uhi. Pasianin siemna (talent ) apiehte nasan uh phawldohna ding hunlem mulouin numei tampiten hanmuol ajawtpita uhi. Siemna jilna ah Numeite khu hunlem (Opportinity) pieh hileuh asiem maw tuom sih ding uh chi tulai in suhlang in aumta hi. Pi Hillay Clinton ,US Secretary of State in,” Numei tellou in khovel akhangtou thei sih,”a chi pen thudih ahi. Gam khangtou a kithei gamte ah numei in pasal bangin siemjilna leh khotangah jalenna anei ua, gamsung vaihawmna ah dinmun lienpipi te atu ua, feltah in anate uh asem khe thei uhi. Hinanleh, gam khangtou lou gamte ah numeite gamsung vaihawmna ah dinmun pieh ahilou banuah alaijil ding bang uh ngaisah ahi sih uhi.

Innsung ah numei leh pasal a um hi. Numei umlouna Innsung khu a buching/bukim thei sih hi. Mihing tahsa toh tekak ta lei numei tahsa phalkhat hi leh pasal khu a langkhat khu ahi ding hi. Tuajieh in mihing khat aphal shi leh damthei leh mihat kichi thei lou ding hi. Pasalte bou siemna, hatna khotang/society leh innsung khu damlou taw bang ahi. I innsung leh society hat thei na ding in numei leh pasal siemna leh thuneina kikim a aum uh ngai hi. I lah a numei te dinmun dopkang na ding in tam anuoi a te kiphamaw hi:

I. EDUCATION/LAISIEMNA

Education khu khantouna ding a kalbi masa pen ahi.Lai tungtawnin theina belap ahie, tua theina in lungsim zalenna atuna, tanvou leh mawpuohna thei thei na atut banah kimuonna apie hi.. Hinanleh mawlna in jauthong na apiengsah a ,lungneu na leh kimuanngamlouna atut hi.

Mimawlten midang te apat pilna jilbe theilou in ama uh lunggeel teng ah akinga uhi.Tua bangte jieh in khantouna in agamlat hi.Tuajiehin, Education khu mizousie numei-pasal khenlou a anga ding uh ahiNumeite laijilna lam habawl leh ngaisah angaita hi.Numeite’n hunlem anga thei chiengun pasal te sangin zong bawlthei zaw abang uhi.Tulaitah dinmun ah enlei India kivaihawmna ah numeite panna lien ma ma hi. Gamsung pumpi a thuneitu, India lutang khu President Pi Pratibha Patil ahi. Tualeh, Solkal siemtu UPA( United Progressive Alliance ) khu Pi Sonia Gandhi in amakai hi. Tuabanah, innpi (Lok Sabha) Speaker khu Pi Meira Kumar ahi nalai hi. Tuabanah Minister, Governor numei tampi te banah Solkal nasepna a zong numei tallang tampi um hi; Pi Kiran Bedi, IPS, Pi Nirupama Rao, IFS tualeh Infosyst
Company a CEO Pi Indra Nooyi te bang adinmun uh kikimpi pasal tampite tung ah aleng uhi.

Tam atung a itahlang mitallang khenkhatten tua bang a dinmun atuh theina ukhu bang dang hilou in Education jieh ahi.Ama uh te zong khu eite bang in laitheilou in ana mawl uleh tua a dinmun tuh te ukhu tukha lou ding uhi.Tuajieh in laisiemna khu numeite dinmun dopsang na ding a akiphamaw peen ahi.

Numeiten gamsung khantouna ding leh innsung kining chin na din panmun lienpi nei uhi. Sum leh pai jahdan, siengthoudan leh tate etkolna ah numeite panmun thupi ma ma hi.I nei-ilamte ukhu ajah dan leh akepdan ithei sih leh tangton dai ding umlou hi. Tuajiehin, akem siem leh ajangsiem ten sawtpi daidin akem thei uhi. Tami siemna din zong education ma pawimaw hi.

Education ichi chieng in laisiemna guoh genna ahi sih hi. Khutsiem silbawl , tahsa kep siengthouna leh eima leh kitoudel theina ding lampite jilna zong ahuop hi.Tamte pansan in leitung ah zawnna (poverty) suhbei thei ahi. Tami ading in numeite atel uh angai hi. Numeite tellouin leitung ah Zawnna suh bei guol ahi sih hi. Zawnna suhbeina dinga numeite panlahna khat en zuai vai .Pi Ela Bhatt in Self Employed Women’s Association (SEWA) ana phut khie a tuanah numei 2.14 lakhs bang atel uhi. Ama uh ten Gamgawutna gam (drough prone area) Gujarat ah Fodder Bank (Bawng ann kholna) ana pat khiet jiehun Bawng ann kivatlouin agam aten anga ua, tuami apat Bawngnoi kiching in khosahna ah nahpin aki thuopi hi. Tam gam atengte khu Bawngnoia kivah ahimanun a Bawng ann ding uh umlou chie pem le le te ahi ua, ainnsuan uh akitup thei sih hi. Tam banga numeite panlah na khu Education tungtawna theina kipieh tua (idea a ki share) jieh ua hing um thei bep ahi.

Tulai igamsung ua khanlawna ang tung panta hi. Masang lai sang in Laijil ding ngaisah na aumta a,sieljilna jong kibe lap mama hi. Numeite khu pasalte banga hun lem pieh ahichieng un pasalte sang in hatzaw phiel uhi. Pawl X leh XII result suoh chieng in numeite Pass percent pasalte a sangin ahoijaw gige
ta hi. Tualeh,2009 Civil Service result bang i et leh thumna tan khu numei in alua hi.Numeite laisim zong apung ta ma ma hi. Manipur state mai a zong numei laisiem khan dan nasa ma ma hi.Kum 1901 kum in i state ua numeite laisiemna te na, Female Literacy rate khu 0.04 % ahie, 1991 in 47.60 % atung a , 2001 in tam khu 60.50 % atungtou ta hi. (India pumpi ah 53.70 % atung hi).

A tung a igen tah ma bang in, numei te dinmun dopsang ding khawh ngai jousien itanu te uh laisim ding gelkhoh angai hi. I gam Kumpi in gamsung pen numeite tellou a khangtou theilou ahi dan musuoh in tulai in numeite laisim thei na din pan nahpi in la lel hi: Sarva shiksha Abhiyan (SSA) nuoiah ‘Care for Girl Child’ ‘Numei naupangte etkaina ‘ khu pat ahie, numei naupangte khu
kum 6-14 kikalte amanbei a alou theilou a laijilsah ding chi tup in nei hi.Tualeh Kumpi in Dan siem in Numei leh pasal dinmun kikim thei na ding in sepna leh kiteelna te ah numeite a din‘reservation’bawl ahi sepna kibang ah Equal remuneration Act tungtawnin law pasalte toh kibang pie hi ta hi.

2. SOCIAL EMPOWERMENT

Islam Sahkhuo juite lah ah nume maikhu (Purda system) hunkhat lai in ana uang hi. Tuo leh, Hindu sahkhuo juite lah ah numei khu apasal si chie aki halna mei a hallup (Sati) ana hi jel uhi.Hinan leh tu chieng in tambang a um non sih hi. Kikhelna (change) umlouna ah khantouna umlou hi. Tam kikhelna zong eite lah ah hing um pan panta a numei tampi laisiem leh sepna hoipipi nei bang ium pan ta uhi. Hinanleh numei leh pasal dinmun akikim ta ichi thei naisih hi.Kikhelna deilou, khanglui ngaidan pai khe theilou mi tampi ium nalai jiehun numeite dinmun ahiding bang atung thei naisih hi.Itawndan uah
numeite pen gamluo theilou die koi ahi jieh in tuni dawngin nu leh pa ten zong tate chiet chie a kibang a ngai theilou atamjaw ihi nalai uhi.

Khanggui pen pasal tungtawn bou a sim ahina ah khanggui man ding ut lou jiehin tapa neiloute bang lungleng in kingaise thei uhi. Tami apat in numei leh pasal khenna kipan hi. Tuabang tawndan leh pei dan khu numeite nuoinet tu ahie, iminam khantouna daltu zong ahi.

Gam khangtou gamte ah tam bang kikhenna umtalou hi. Kolte leh Meiteite lah nasan ah nu-le-pa te lamsa tung ah numeite tanvou pieh in a umta uhi. Hinanleh, eite lah ah tam khanglui tawndan pen manphasa tampi pate jiehin kikhel but nailou hileh kilawm hi.Numeite dinmun domsang vai ichi leh innsunga tanute goutan pieh ve angai hi.Dan khautah nei Israelten zong numeite goutan piehna din Pasian apat thu namu uhi.

Numbers 27:8 ah Pasianin Mosi kung ah “Pasal khat tapa neilou a ashi khah leh agoutan khu atanu ten luo uheh” chi hi.Zeolophahad tanuten apa gam luo sah ana hi uhi. Eite lah azong tapa neiloute zong gam ikitom va ong sang un atanu ten apa gam luo uleh suh khelna hiding amah?Laisiengthou juina hilou ding amah ahisih leh Israelte a hibou ichi nalai di uoi? I innsung a numeite
dinmun ang hoi chieng in khotang ah adinmun uh ahoisa ahi.

Nu leh pa ten zong i tate chietchiet khentuomlou in akhantou thei na dingun hun lem akibang in bawlsah vai. Numei in inn nateng sep toh laisim buoitah a thuahsah pasalte mawhvah ahilou leh kimawl die pawtsah chite khu itate ikhentuom dan uh suh lah na ahi.

3. HATTUOM A NUMEITE DINMUN:

Hattuom sung a numeite ikoi dan uzong khu ikhantou uh leh khantou lou uh tena khat ahi.Tua jieh in pawlpi vaihawm dan zong ki etphat ngai hi.Hattuom pawlpi in numeite bang dinmun ah ikoi uoi ? Pawlpi vaihawmna ah numei member bangja i um ua? LCC kitel hun a bang die numeite candidate nasan a
iguan ngamlou uh e? Tualeh, bangtan in numeite Pawlpi sung ah sum-lepai toh kisaiin zalenna ipie ei chi et thah ngai ahi. Pasian hepina toh numeite Pawlpi hatna ding a sem thei tampi te zong dinmun/ mun (opportunity ) pieh ahi masang un Pawlpi ah numeite dinmun dopsang in aum ki chi theilou ding hi. Numeite hatna Pawlpi khu akhangtou Pawlpi te ahi jeel uhi.

Pawlpi dangte sanga numeite dinmun ngaikhoh Lutheran Pawlpi  ahi. Asean leh India adie numei Bishop masa pen Rt. Rev. Dr. Katakshama Paulraj khu Lutheran Pawlpi mi ahi.Tua bang in ei pawlpite zong iki et phat uh hun hi.Vaihawmna teng a numeite atel thei na ding un amun ding uh siem ngai hi.Nuoinet a ana upsawt seng ta jieh un numei tamjaw ten ngiem tah a um khu ahi ding mawng in akoi uhi. Tua bang ngai dan a pat apawt doh thei na ding uleh Pasian in apieh Talent te apholdoh thei na ding un numeite hunlem guon pieh khu Hattuomte mawpuoh na ahi.

CONCLUSION

Numei khu Pasian in mihing asiem chillai in pasal panpitu din ana siem hi. Midangte panpi thei na ding talent Pasian ana pieh sa ahi. Hinanleh mihingte siemtawm Tawndante jiehin numeite khu nuoinet in ana um ua, a talent neilam uh kiphoh lou dingkhop in pasal vaihawmna gamah nuoinetna sal ana
taang uhi.Tuabang a numeite nuoinet a aum na gamte uah khantouna aum sih hi.Tuana pat in numei tellou in khantouna aum thei sih chi khu atah in imu thei uhi.Gamsung guoh hilou in innsung leh Hattuom pawlpi sung a zong numeite tel lou in khantouna tah um thei lou hi.Tulai a gam khangtou (developed nations) ten tami athei ua, numeite khu pasal toh tanvou, dinmun kikim apieh jieh un tu ni in gam khangtou te chi’n ithei uhi. Eite zong khantou i ut sam ta jieh in numeite dinmun dopsang angai hi. Numeite khu pasal bukimna ahi ua, ama uh tellouna ah bukimlouna um hi. Mihing, abukim lou pa khat khu bukimtah pa toh kibanga ahat ding pen ahitheilou taw bang ahi. Tuajiehin, i Hattuom, i innsung te uleh i nam akhantou thei na ding in numeite dinmun dopsang khu aki phamaw hi. 

Tua chianumeite dinmun dopsang ahi na ding in :

1. Numeite laijil ding pawimaw ngai/ ngai khoh vai , Education khu khantouna kalbi masa pen ahi. Tamna siemna ichi in laisiemna guoh ahuom sih a, khutsiem silbawl, innten dan jilna, sienthouna leh damtheina chite zong ahuom hi; tuate jil in i numeite uh hasuan ngai hi.

2. Numeite dinmun dopkang thei na ding in numei toh kisai a ilunggel uh, ina ngai dan luite uh hen angai hi.  Lunggel a kikhelna aum sih leh nasep a kikhelna piengtheilou ding hi. Kikhelna (change) khu aum sih leh khantouna um theilou hi.

3. Numeite dinmun dopsang na ding in innsung gou a tanvou pieh angai hi. Tapa umlouna ah tanu in apa gou aluo thei chieng in numeite simmaw na leh ngainepna bei ding hi;

4. Numeite dinmun siemphat na ding in innsung a akipat angai hi. Nu leh pa ten tate chiet chiet khentuom neilou a hunlem (opportunity) akibang a siemsah angai hi. Tanu te buoitah a innsung nasem a jah a lai zong simmanlou khop a sep ding guon a tapa te bangma bawlloua zalen tah a koi tuom chite zong tawpsan ahunta hi:

5. Hattuom sunga numeiten a talent te uh aphol khiet thei ua Pasian nasepna a pan alah thei na ding ua Pawlpi in mun guon angai ahi. hattuom kivaihawmna ah numeite telsah ahi na ding un ama ua ding a mun pieh ding ahi. I unau te uh Arcot Lutheran ten a vaihawmna uah numeite din 40 % reserve sah uhi. En bangja ikoi ut di uoi ?

Pasian nasepna hat tah leh hangsantah a pan ilah ua Mang gam ikehlet thei na ding un lunggel lui leh tawndan leh chindan luite heh thei ding leh siempha thei din Pasian in simtu jousia  Thupha hing pe ta hen.

~ MWCA/ELWA Golden Jubilee Souvenir 2010

Print PDF