Jeremiah Mission

Pasian in Israelte siamthakia nading in Jeremiah kung ah a thu ahing tut a, “Ngaiin na gen ding thute na kam ah ka koi hi, Tuniin namte leh lengte nangma’n phungkala botdoh in, susie in paimang in,lam dih a phut kia ding in thuneina kahing pie hi” a chi hi(Jeremiah 1:9b-10).

1.Bawltawm Pasian miitna phungkal in botdoh in: Pasian in amuda mama khelna namkhat ahileh, ahiloupi ahidan a kilim bawlna khu ahi. Pharisaite zong Mangpa Jesu’n “Natung uh gih talawm me izaw! Han apulang lungngou kinu kaanga,a sunglam mishi gu leh taang muot um toh kibang ngel uteh! Mi musiet in michin tung ah hoiin kilang uchin, na sunglang uh kipohna leh lepchie na ngen in a dim hi”(Matt.23:27- 28).Khopi lian ginum tah khu numei thanghuoi bangin a umta! Khatvei midih ngen in aum ua, tuin tuolthat ngentang umta giap. Jerusalem khatvei dangka bangsa na hiin,tuin mantheilou na suohta.Grep gui zuchie nana banga,tuin tuisih bangta teh! Na lamkaite zong helbawl leh gutate lawmte ngen hita uh; amun silpiehte apom ua, guhgolnate ane uhi. Kihehna zum ah tagate apanpi sih ua, meithaite thugen angaikhe sih uhi(Isa.1:21).

2.Gitlouna leh tawnkhelna zousie suchimit in: Mangpa’n amuda a athuoh theilou sil nam sagih aum hi.Pasian in amuda amit dongmama sil guh um hi: Kiphatsahna min ha, juou genna lei leh dang,mawsiet banglou tualthana khut,silhoilou ngaituona lungsim, gitlouna nasemdinga kalsuon vapiel kengte, juau thu ban gengente theipitu, phasah pina tuachiangin alawm aguol lah a buoina siamtu mihing khu ahi uhi(Pau.6:15- 19). Tuajiehin gitlouna chinteng toh kipel un, juou nonsih un,lepchie sih un engse sih unlen, housietna kamteng zang non sih un. Nau pieng chilte bangin um un(I Pet.2: 1-2). Tuajiehin namit jietlangin ahing khelsaha ahileh, Kheldoh inlen paimang ta’n(Matt.5:29).

3.Tahsa deigawna hoilou teng taisan siang in: khangdawn hunsung tahsa deigawnate taisan in lungsim siengthou taha Mangpa panpi ding deite toh dihtatna ginna, itna leh kilemna del zel in(II Tim. 2:22). Na lah uah huasan thu, thang huoina chinteng leh kithangsietna kichi pouma genkhah in zong umsih hen, tua khu Pasian tate umdan ding mawng ahi hi( Eph.5: 3).Tuajiahin nalungsunga leitung sil umte thatlum in (Kol.3:5).

————————————————————————————————-

NUAJUI SUOHNA

Nuajui ding a ki haan: Hinanlezong noute pen nam kituom tel na hita ua; kumpipa siampute nahi ua, nam siangthou nahi ta ua, miel akipat ama vah loupitah sunga hing haan lut Pasian Nasep lamdangte gen dinga teldohte nahita uhi(1pet.2:9).

Khantahoi kigen zahna leh gintatna akuan a Krist nuajui ding a siam dinga hat leh teelte ihi uhi (Mark16:15-16;Matt.28:19). Nuajui ichi chiang mikhat nuajui china ahia; mikkhat nuajui ichi chiang, aum dan leh athu gette ching leh jui china ahi.

Jesu nuajui te’n Jesu thugen juiin, ama umdan aching uhi. Jesu neilou ten Jesu tungtang akam in agen ua, Jesu neiten Jesu tungtang akam uleh gamtat-khoheina toh a genchian uhi(Acts 4:13b).

Jesu’n “Ka belam te’n ka aw angai khie ua keiman amau katheia, amaun keima ei jui uhi” Jn. 10:27) suun ding in ama ijui uhi.

Jesu Nuajui khat hi ding in: Nuajui masate’n a bangkim taisan in ajui uhi (Mk.1:18). Abraham in atenna gam, khuo leh tui,ulehnau bangkim taisan in Pasian puina ana jui hi(Heb.11:8). Barnaba leh nuajui masa te’n agam leitang te uh juahin Pasian gama dingin Sawltahte kengbul ah ahing pekhia uhi(Acts 4:34,37). I Mangpa leh hundampa Jesu ngel in apa Pasian deina sem ding in abang kimteng taisan in lei ah ahing tualkum hi(Phil.2).Jesu main ‘Koizong aneisa zousie taisan a hing jui lou khu kanuajui hitah ahi sih hi” achi hi(Lk.14:33).

Misiangthou Paul in ahina jousie Krist nua ajuina ding in panna bei vawt ahidan agen hi(Phi.3). Jesu nuajui khat suohna dingin Pasian thu, Jesu tangtang theitam gintam theisiam gensiam a huntoh sih. Nuajui masate’n Jesu tungtang kanmasa louin hata aumbangun ajui pasa phawt uhi. Guolnei Hosie thuget “Ama theidingin Mangpa jui tou tou vai”(6:3).Nuajui masa te’n kumthum val vingveng ajui nua unzong theisiam nailou uhi.

Kidot tuoh pen ahileh Jesu nuajuiding in nakipan tahtah tai? chi hizaw hi.Tualeh akipansate adingin nuakia-nuahei lou dingin Mangpan ang dei hi. Loukaina a khut ngam zouta a nualam hei khu Pasian Gam mii hitah ahi sih” achi hi(Lk.9:62).Paul i ‘ Mangpa bang bawl ding in nahing dei ei ?’ chiin Pasian deilam bawl ding in ahinkhuo alaan khia hi.

————————————————————————————————-

KAL KHAT SUAN IN

Mihingte hinkhuo pen tuiluong banga mailam naw apei jing ahi. Mitphet kal chin in ihaan mun lam ahing naisah jing hi. Khum bang ma in gingtute I hagao hinkhuo zong khawl hun leh nuakia hun umlou in asia ahiai apha ahiai khatlam pen pen ah kal akisuan jing hi. Hinkhuo in akal suanpi silnam thum in akikhen theia,eima deidan a kalsuan, setan deidan a kalsuan chi leh Pasian deidan a kal suan khu ahi hi. Pasian deidan a nichin a i kalsuanna ding kalbi namthum igen ding hi.

1. Ginna kal khat suan vai: Kristiante pen ginna a lampai ihia, imutheite, ineisate,itunnasate a umden louin, imu nailou silte muding in, itun khah nailouna munte tung ding in , itan ngailou silte tang ding in tualeh I thei ngainailou silthathate theiding in Pasian ginna in nichin mailam ikalsuan zel ding uhi. Ginna a gamte latoutou in I kalsuan jel ding uhi. “Aw peilai ihi tutkhawl louin, Mangpa hatna muangin Sianmang siang juan ta vai”

2. Itna kalkhat suan vai: Khovel a mizousien adeipen uleh alam et pen uh khu itna ahi. Kristian ten ihinpi pen khu itna ahi. Itna in ahing hundam a,itna in ahing kalsuan sah a, itna in inn ahing tun ding hi. Itna kitahsapna mun ah kipahna leh hamuonna akiphasam hi. Itna in Pasian toh ahing kikhawl khawm sah hi. I itna masa pen ma a Pasian, midangte leh I innsung it semsem ding in Pasian in hing panpi ta hen.

3. Silpha bawl in kalkhat suan vai: Zani hunte abeita a, jingchiang lah ahing tung naisih hi. Zingchiang in bang hing tunpi ding chi zong ithei tuom sih uhi. Tuajiah in tuni khu Mangpa hing pieh ni khu ahia, tuni kipahpihna in silhoi-silpha khat tei eia ding guoh hilou in, midangte tung ah zong silpha bawl in ni chin kal I suan ding uhi. Silhoi bawl dinga, Krist a siam a umin Pasian khut suoh ihi uhi.

————————————————————————————————-

Pasian Gintatna

Laisiangthou in a gen Pasian gintatna pen Pasian in silthonpiah a ahing piah ahia, (Eph. 2:8), Pasian silbawl theina toh kijop ahi (I Cor 2:5). I gintat ding Pasian khu bangkim siamtu ahia ( Jn.1:3), silbangkim tung a thuneitu ahi hi (IChron.29:10-12). Khum Pasian ngelkhu gintat huai mwng ahia, a kamteng zong gintat ahuai mawng mawng hi (Num.23:19). Mikhat in Pasian a gintat tah tah chiang in aki mutheilou a Pasian gintatna khu Pasian silbawltheina leh thuneina toh hing kizop in aki muthei silte in a Pasian gintatna khu a hing gah doh zel hi. Miten Pasian gintatna toh kal na suan in sil loupi tah tah na sem khia uhi. I gintat ding thuchiam hing chiampa leh a thuchiam tang tungsah ding pa Pasian gingta te’n a gintat zaza uleh a muan ngam zaza uh a muta uhi. Aziah pen laisiangthou in “koizong a gingta pouma kizum sua sih va” achi hi (Rom 10:11).

AB Simpson in “ Pasian gintat pen patep thaw ding ahiai sukkhah mai mai ding bep hilou in Pasian thuchiam tung a kiphengpha mai ding ahi” achi hi. Pasian in lamkai Joshuo kung ah “Na keng phang ua na tot khah na chin chin uh ka hing pe ding hi” achi hi (Joshuo 1:3). Pasian muan na toh bangkhat poupou tung a kal suan ngam pou pou lei aman ang pichin sah ding hi. Pasian in thu khat a chiam leh abawl teitei dinga anamdet sa ahita hi.

————————————————————————————————-

A Hampha Minam Suahna

A hampha minam suahna ding thu kikum lei ut huai sa ing. Minam bup i chi chiang in mimalmal, innkuan kuan leh behtang sung teng igenna ahi hi. Mimal mal, innkuan kuan leh batang sung chiet in hamphat na i hing nga chiang un minam hampha ihing hi ding hi. Hamphatna nga na dingin Pasian thei minam, Pasian nei minam, Pasian zaahtaat minam leh Pasian thuzui minam ihih ding ahi.

Pasian thei: Pasian thei i chi chiang in Pasian zau, Pasian ngaisah, Pasian iit chite a huap hi. Laisiangthou in “ Mi a Pasian thei te’n vannuai ah sil loupi tah tah a phawl doh uhi ( Dan.11:32). Pasian khuah a theina leh pilna a thei na mai hilou in i theina ah mihepina ihal ding thu Laisiang thou in agen hi. Pasian itna leh hepina tellou Pasian thei na khu panna bei ahi hi.

Pasian nei: Pasian gingta mai hilou in Pasian nei minam ihi ding ahi. ‘Mangpa Pasian anei minam khu -a hampha minam ahi (Psa.33:6). Israel te’n mangloubang ana paisa uh Vanleng Mang Gou manpha suang mantam keia chiin laphuah ten ana phuah uhi. Ahi, innlam miten ana deilou uh aninga suangmanpha leh phatuom pen minam Krist neitu te khu ahampha minam hi tah tah vawt hi.

Pasian zahtat: Pasian zahtat,Pasian zau ten dihtatlouna zousia ataisan uhi. Pasian gam leh adihtatna sui masa ten a poimaw zousia anei suoh kei uhi. Pasian sui miten tahsap bangma anei sih uhi(Psa.34:10).

Midihtat hamphatna: Mangpa jahtat a athupiehte kipahpih mi khu mihampha ahi. Mihoi ta te khun mite gamsung ah silbawltheina hing nei va un,ahah asuanten zong guolzawlna khu tang ta va uh (Psa.112:1,2).

Pasian thu zui: Pasian thuzui ichi chiangin Pasian deilam bawl china ahi(Matt.7:21). Pasian thuzui ichi chiangin Pasian lungsim bang lung sim nei china ahi(Phil.2:1).Tualeh Pasian thuzui i chi chiang in Pasian umdan aum china zong ahi (Eph.5:1). Mualtunga Mangpa Jesu’n a thugenna ah ahampha minam suahna ding suangphum kichientah in a gen hi. “Koi pou ka thu get te ngaikhia a zop tapou khu mipil suangpi tunga innlam toh kibang ahi hi(Matt.7:24) ana chi hi.

“A thununte Mangpan anahsah zing a,tuachiin leitung khu amaua hing hi zing zing ta va. Mangpa guolzawl aumte vangin leitung aluo ding uhi”(Psa.37:18,22). Mangpa i tung ua alungkim pou leh aminamtel Israelte bang in eite zong gam nuam tah, gam hausa leh kining ching ahing pe ding hi. Pasian ngaisah khu Politics siangthou leh thahat pen ahi.

————————————————————————————————-

Tam atung a article te ahileh ZCF Delhi Pastor Rev. GK Samte’n kal teng a Fellowship News a suo zingte hing ki kaikhawm ahi.

~ zcfdelhi.org

Print PDF