I gam uh, tulai hun a dia Manipur sim bial a 1910 kum a Tanchinhoih hong lut ahi i chi ua, kum nawn 2010 chiang a kum 100 a chinna Gospel Centenary lawm di’n saptuamte i kisahol sauhsauh uhi. Khalam thil kia hilou in, khovel leh taksa thil a leng Tanchinhoih in i lak ua khovak hon puak a naktak a hon domkang ahihna ah, a thupi thei pen a Gospel Centenary lop tuak mah ahi hi. Himahleh, i muhna uh a sawtluattak ziak hia, ahihkeileh bang ziak ahia, Tanchinhoih in gingtute hon gawmkhawm ding hileh kilawm napi in eite hon khenzak a hizaw dia aw chihsim in a om sek hi.

I pu-pate un Tanchinhoih a zak tung un doctrine e, bang e, chihte a thei sese kei ua, Hondampa dia Jesu Khrist a san/pom uh tuh a doctrine uh a himai ahi. Huai hunlai in kuamah Tanchinhoih in a hon khenzak kei a, khenzak nak sang in gingtute tuh i kipumkhat uhi. Tanchinhoih hon puaktute saptuam tuamtuam hilou a saptuam khat ahih ziak uh, ahihkeileh, i pu-pate a mawlluat ziak uh leng a hikha maithei. Hilehleng, mawltak a, naupang’ lungsim bang pu a Hondampa dia Jesu Khrist ana pomna uh tuh Pathian’ deihdan leng hizaw di’n a gintakhuai hi. Saptuam tuamtuam in Tanchin hoih a hon puak uh ana hita himhim lehleng i pu-pate hunlai in bel mipite gingtute leh gingloute chauh in a kikhen a, gingtute doctrine tuh Hondampa dia Jesu Khrist pom ding (min gelhlut ding) chih tan ahi. Tanchinhoih in a tung in honna khenzak kei himhim a, honna gawmkhawm zaw ahi.

Tanchinhoih i hon zak chiat uh toh kiton in Pathian in nakpitak in a hon domsang a, laisiam leh mipil tampi i hong piang uhi. I pu-pate’n mawltak leh naupang lungsim bang pu a Jesu Khrist a pom dan uh tawpsan phetlou in Laisiangthou i khiakdan uh leng a hong kibang nawnkei hi. I pilluat ziak uh hia, Pathian thu khat himahleh gindan tuamtuam piang in doctrine tuamtuam zui saptuam tuamtuam in i hong kikhenzak uhi. Tanchinhoih pen kikhenzakna dia i zat un khalam ginna thu kia ah a hon khenzak kei a, khovel leh taksa thil a leng hon kikhenzaksaktu di’n ama a ‘ei pau’ ngen zang gigete’n a tuam in ‘mahni pau’ chiat in Laisiangthou i hon kineih sawnsawn uhi. Tuchiang bang a doctrine khat zuite nangawn kipumkhat theilou tamtak ki-omta. Setan kipah lamtak ahihlouhtawp in leng Pathian tuh kipak lawmlawm di’n a gintakhuaikei himhim hi. Pathian’ vualzawlna a zangsiamloute a dia hamsiatna suak thei chihmahtak, kum 5 hal a assembly election in a hon khenzak thithe sang a detzaw in i kikhenzak uhi.

Tanchinhoih pen a hon khenzaktu dia i zat ziak uh a hingei ding a, khangtoulua hinapi khovel thil, nam-le-gam vai ah gamchiam lut theilou in i gamdai ah i vakvai uhi. Nam bawltu leh gam neitu Pathian ahihdan theichiat ihihna uah, nam-le-gam vai toh Tanchinhoih (saptuamte) kikhentheilou ahihdan leng i theih ding uh ahi. Pathian namtelte tung a saptuamte’n khalam chauh a mohpuakna nei a hizenzenkei ua, kha toh sa a omkhawm lai teng kha lam thil toh sa lam thil leng saikhawm ngai ahihman in sa lam a leng belampu a a pan ding uh ahi. Himahleh, kholak thuthang a kigen khat ah, galvan tawi pawl tuamtuamte’n kithah-kimat a tawpsan ua a kipumkhatna ding ua panla saptuam heutute kiang ah “Nou Pathian thu awite leng kigawmkhawm theilou…” (chih dandeuh khat) chihsan a om uh ahi a kichi hi. Thiltung taktak hilou ahih a lehleng, a thu pen thudik ahi.

Pankhawm hatna ahi chih thupil pen banglam peuh a leng thudik ahi a, hilehleng, eite pangkhawm theilou ihihna uah hatna ngaihna omlou mah ahi. Tua dan a i pai ua leh SoO mun 100 in pun lehang leng gamdai a kum 40 i vakvaih nung ua leng gamchiam lutlou ding ihi. A hon gawmkhawmtu ding hoihpen Tanchinhoih nangawn i kikhenzaksak ua leh Gospel Millennium lawm lehang leng vakvai lai ding ihi. Mimal ginna toh kisai thu ahihna ah, buaihuaipi leng ahi. Hilehleng, PCI (R) in Silver Jubilee lop a sawmna ua BYF tel a pawl tuamtuam a chialkhawm bang uh kalsuanna bek hong tam deuh leh kipumkhat theihna ding lampi tawnkha zaw deuh ding ihi. Vangam lutna ding kia hilou a, i kipumkhatna ding ua leng naupang’ lungsim bang pu a Jesu Khrist a i omkhawm taktak uh ngaita ahi.

Editorial, The Lamka Post | December 10, 2009

Print PDF