Imphal, October-20: Recognised Private School te’n Nov 2 tan hunpia| ATSUM in class boycott tungtang ah tuni’nImphal ah Emergency Federal Assembly nei | All Tribal Students’ Union, Manipur (ATSUM) in tuni zinglam dak 11.00 in ATSUM Head Office ah district tuamtuam apan student leader-te telin Emergency Federal Assembly nei uh a, huai ah Oct 24,23009 a ATSUM makaihna maha Public Meeting thupukna omte enzui kawmin Manipur phaijang biala district khenkhat ah hunchiam omlou dia educational institution kikhak(class boycott) tungtang sawtkuamtak a genkhawm nung un state govt leh student kiphin (AMSU,MSF & KSA) in educational institution-te tunga ‘ban’(class boycott) om October 2009 sung a tawpsak hidin ngen uh a, CBSE/ICSSE nuaia om institution-te leh private coaching institutes tuamtuamte leng awlmawhhuai gawp dinmun a om uh hi’n taklang uhi. BSEM nuaia HSLC examna, Council nuai Class XII examna leh University nuaia examna tuamtuamte leng ahun bikhiah banga omsak  chiat ahih ding chi’n puang uh a, ATSUM ngetna limsak ahih kei aleh  Nov 1,2009 akipan in ATSUM in HSLC & Class XII exam dingte khualna in centrte khenkhat ah Residential Coaching Class pan ding uh hi’n leng taklang uhi. Thudang kizadan in All Manipur Recognised Private Schools Co-ordination Committee pawlin Manipur govt leh class boycott pawlte Nov 2,2009 tana kihoulem ding leh Nov 3,2009 akipan ngeina banga class sutzop ding in phu uh a, huchi ahih kei aleh School Recognition Certificate teng state govt ah piakkhiak(surrender) hiding in puang uhi.

Tuni’n ATSUM Head Office a Emergency Federal Assembly ah thupukna point 8 bawl uh a,huai dungzui in (1) July 23,2009 in Khwaitamband Bazar a thiltung a misi leh liamte thuakpih in suunpihthu puang uhi.2) Huai thiltung ziaka Apunba Lup makaihna a kiphinna leng thildik hi’n puang uh a,hileleng educational institution-te hunchiam omlou a khak(class boycott) bel akhengval hi’n koih uhi.3) ATSUM in state govt leh student kiphinte kala kihoulemna om ding leh class boycott beisak deihthu puang uhi.(4) Private school te’n semtu teacher-te lawh a piak theihna ding un school fee ngeina bang la ding in deihthu puang uh a, state govt in “calamity” dana koih in private school teacher-te huhna pedin leng ngen uhi. Huchi ahih kei aleh ATSUM in cheng 1 hileleng teacher-te huhna din panla ding uh chih hi.

(5) BSEM saina a HSLC leh COHSEM saina a Class XII examna banah University nuaia examna tuamtuamte leng ahun bang chiat a conduct ahih deih uhi. (6) ATSUM in HSLC leh Class XII exam dingte khualna in Residential Coaching Class honkhiak sawm uhi.(7) Student kuapeuh Board kibang nuai agih phot lrh a kaina uh school kisuan utte govt in panpih ding in ngen uh a, (8) Tulai dinmun a nawngkaina a paitouh zel aleh ATSUM in lampi dang zong ding chihthu leng thupuk uhi.

Huailouin All Manipur Recognised Private Schools Co-ordination Committee pawl tuni’n MDU Hall ah a kikhopna uah Govt leh student makaite Nov 2 tana kihoulem ding leh Nov 3 apan class ngeina banga sutzop deihthu a puang ban uah class boycott tutan paitou ziaka student-te maban siatna sautak om thei ding tungtang leng genkhawm uh a,Nov 3 apan class sutzop theih dinga thu kipahhuai bangmah a om kei aleh school recognition certificate teng govt ah surrender ding chih telin thupukna point tuamtuam 4 bawl uhi.

All Manipur Recognised Private Schools Welfare Assn President H. Biren in a genna ah ngeina dana thilpai hileh Nov 20   tan in school tamzaw in final examna zousiang ding uh a, himahleh teacher-te adingin tukum in  working day   om nawnlou tawh kibang hialta hi’n gen hi. Phaijang bial district 4 apan tuni a meeting a tel All Manipur Hr Sec School Lecturers’ Welfare Association, Federal of Elementary to College Teachers Assn leh All Manipur Elementary Teachers’ Assn kichi pawl 3 kigawmte’n leng govt lehg student makaite kihoulem kin a student-te’n sinlai a sutzop kin uh poimawhlua sakthu puang uhi.

DC in Bank 1 ngetbeh sawm       

Lamka, Oct-30: CCpur Dist ah tulelin  UBI & SBI/ CCpur Branch kia in ngeina bangin nasem(business transaction bawl) mahle uh  mi(customer)  tamziak in kidaih zoulou uh a, Ms.Jacintha Lazarus, IAS DC/CCpur in Oct 31, 2009 in  Imphal ah Bank tawh kisai meeting  hun ah Lamka adin Bank Branch khat koihbeh ding in state govt ah  ngen ding hi’n gen hi.  SBI/CCpur Branch a ATM khat om leng khat koihbeh ding in  ngetsawm  hi’n gen hi. PMEGP tawh kisai in Dist dangte’n hihfel khin mahle uh CCpur Dist ah tutan in fel nailou a, DC in Gen Manager, DIC/CCpur kiang ah akinlam a hihfel ding in theisak ahihdan gen hi.

UBI/CCpur Branch apan Rs.4.54 crore lakkhiak tawh kisai in bangtanhiam  progress  omta a,  sum mangte muhkik(recovery) lam et-thu leng gen a, UBI/ CCpur Branch ah khat vei thu in Rs.10000/- tan kia draw khiattheih tungtang leng panla ding hi’n gen hi. Centre apan development fund hongpai chiangin in State share, tax deduction 16% vel bang tungzou hi’n gen a, Centre apan hongpai zah Lamka hongtung theilou hi’n DC in gen hi.

UBI/CCpur  a Rs.4.54 crore mangthang ziak in thuthak om masiah kuama’n UBI leh SBI/CCpur Branch apan DRDA & NREGS fund  transaction bawllouh ding a dalna(ban) kikoih leng tuni akipan  NREGS fund draw theihna ding in  Account kihong ahihdan DC/CCpur in gen hi.

New Lamka ah PHSC kihong ding

Lamka, Oct-30: Director of Health Services, Manipur saina in Nov 5, 2009 zinglam dak 10:00 in New Lamka khawsung a om  Lamka College ah Primary Health Sub-Centre (PHSC) thak kihong ding a, Phungzathang Tonsing, Minister (Power, Hort. Sc &Tech) in Chief Guest apang in hongding hi. Huai ah Guest of Honour in Ph.Parijat Singh,Minister (Health & Family Welfare, CADA, Labour) pang ding a, Functional President in  Dr.W.Motilal Singh, Director Health Services/Manipur pang ding hi.

NRHM  interview ding hun kisuan

Lamka, Oct- 30: National Rural Health Mission(NRHM)/CCpur Dist nuaia semding Account Manager 1; Staff Nurse 5; Addl ANM 2;Lab Technician 1 leh AYUSH Pharmacist 1 lakna din Oct 31, 2009 in  DC/CCpur office chamber ah walk-in-interview om ding chih himahleh lemtanlouhna om ziak in  Nov 10, 2009 zinglam dak 11:00 in DC/CCpur office chamber ah interview om ding hi.

Truck accident ah mi 4 liam

Lamka, Oct-30: Serou leingoi(sand) pawding akuan Truck (No. MN 02-5987) tuni zingsang dak 3.30 velin Sangaikot khawgei ah  stering fail in lamkhang kia in  accident a, huai ah mi 4 liam in Dist Hospital ah admit in om uhi. Aliamte ahihleh Truck driver Khaisuanmung (23) s/o (late) Kaihang of Muallum, agilsung buai in tuni’n emergency operation kibawl hi. Truck handyman Mangsiankhai (20) s/o Kaimang of Tonzang, alu leh amit veilam liam, Soizalam (40) s/o (late) Holpau of Tuining, aliangguh veilam kilawi, M.Tuallianhau (20) s/o Kamkhogin of Zomi Colony te hi uh a,  driver  chihlouh a gimselua omlou uhi.

Buonga’ Archives honna om ding

Lamka, Oct-30: Laphuak minthang leh la lama suanhuai banah ICI Central Choir pitu hisek (late) Buonglienkung theihgigena ding leh Pathian nasepna a a vanzat tuamtuamte kep-hoihna ding in God’s Blessed Choir(lasa pawl) in Muolvaiphei ah inn(Buong’a Archives) a bawl uh Nov 3,2009(Sepnawnni) in honna om ding chih thutut kingah hi.

DC in Prize hawmkhia

Lamka, Oct-30: New Lamka a Grace Bible College ah tuni zinglam in Annual Prize distribution program om a,  Ms. Jacintha Lazarus, IAS, DC/CCpur in prize hawmkhia hi. DC in a genna ah Christian tuailaite chiklai peuhin  society, gam leh nam  ading a poimawh petmah hi’n gen a, GBC in AIDS Project a neih kipahpih thu leng  gen hi.

Blue Star ah Talent Day

Lamka, Oct- 30:Simveng a Blue Star Academy ah tuni zinglam dak 10:00 apan in a 6^th Talent Day program nei uh a, huai ah student te’n talent tuamtuam mipi lak ah lahna(show) bawl  uhi.

Bike in student phuliam

Lamka, Oct- 30: Seingam (15) s/o Chungkhai of Tollen tuni zinglam dak 8:30 vel in school kaiding a kuanlai Tollen Jeep parking ah bike khat in phukha a, alu leh amit taklam liam in a nakguh veilam nasa a, Dist Hospital ah admit in om hi.

Chief te’n MLA ading Maicham bawl

Lamka, Oct-30: Makhao Area Chiefs Assn saina in tuni  in Sangailot Block a Lungngil khua ah T.Hangkhanpau MLA, (Singngat A/C)  ading in Maicham bawl uh a, Rev.Onkhothang Haokip, Dist Suptt ECI/Chandel in thumsakna leh vualzawl ngetsak hi.Huai ah Makhao Area Chiefs Assn; Tuining Area Chiefs Assn; Haopi Area Chiefs Assn , Sangaikot Area Chiefs Assn; KSO/Sangaikot; KKL/Sangaikot leh KWU/Sangaikot makai tamtak tel uhi. T.Hangkhanpau  in a genna ah Makhao Area Chiefs Assn-te office bawlna ding leh Community Hall bawlna din Rs.4 lakh pia ahihdan gen a, Tuining Area Chiefs Assn te office leh Community Hall ading in Rs.2 lakh; Haopi Area Chiefs Assn te Office leh community Hall ading Rs.4 lakh; KKL/ Sangaikot & KWU office bawlna dingin  Rs.4 lakh; Mualkot- DDO/ Sangaikot kikal lampi bawl hoihna din KSO/Sangaikot khut ah Rs.10 lakh piak ahihdan gen hi. ZYO Cultural troop leh Makao Cultural troop-te kiang ah  kipahman in Rs.5000/- tuak pia hi.

Police gam apan lei puakkhiak phal nawnlou

Lamka, Oct-30:Tuibuong a District Jail kianga om Police gam(land) akipan in mi khenkhat in phalna neilouin Truck tanpha zangin lei(soil) tou in pawkhia uh a,huai in lei chimsak thei dinga patauh-huai hi’n SP/CCpur in thusuah hi. Huaiziakin tuban kuamah in huaimun apan lei pawkhe nawnlou ding in theisak a, a pawkhe teitei a om leh dan tawh kituak action lak hiding in leng SP in taklang hi.

ZSP Essay kidemna om ding

Lamka, Oct-30: Zou Sangnaupang Pawlpi(ZSP) Gen HQ leh Zou Workshop Forum kithuahte saina in Class IX apan XII tana MIL(Zou) late adingin Oct 31,2009 zinglam dak 10.00 in Chinkham Modern H/S, Zomi Colony ah ‘Zou Nampi’ –hun peisa, tuhun leh malam hun’ chih thupi zangin essay kidemna om ding hi. Huai essay kidemna a teldingte ahun taka tungchiat dingin Gen Secy/ZSP Gen HQ in theisak hi.

Mimang zonna

Lamka,Oct-30:  Loukhanmang(12) s/o(late) Vungdoulian of Mata village inn akipan Oct 28,2009 nitaklam dak 5.00 a potkhia tuni tan a omna kitheilou chihthu kiza hi. Amah mivom-mam,puan-ak tungsilh lukhu neite a rong puang silh, Ebenezer form khekol teng a,  slipper bun hi a, a mukha leh omna theite’n phone No. 9615943532 ahihkeileh 9436403898 a theisak dingin a innkuante’n  ngetna bawl  uhi.

Seminar-cum-Free Gospel Concert

ECT, Nehru Marg a Music Deptt-te saina in Lower Bijang a DTO complex ah Oct 31,2009 sunnung dak 2.00 akipan nitak dak 7.00 tan “Open Air Youth Transformation Seminar-cum-Free Gospel Concert” om ding hi.

SUUNNA

H. Dalliensoi(52) s/o(late) H. Khamkhokai of Chiengkonpang sungna in zan nitakin si a, tuni’n Chiangkonpang hanmual ah kivui hi. Mrs Kimngaih(42) w/o Soikhohen of Chiengkonpang zan zingsang in TB natna ziakin si a, tuni mah in Chiengkonpang hanmual ah kivui hi. Ngulkhothang (81) f/o Dongzapau of Mualveng, Hiangtam Lamka, nitaklam dak 1:30 in si a, zingchiang in kivui ding hi.

Nov 1 in Information Day kizang ding

Imphal, Oct-30: Directorate of Information & Public Relations(DIPR) inntekna in Nov 1, 2009 zinglam dak 8.30 in Moirangkhom a DPIR complex ah Information Day kizang ding hi. Huai ah T.N. Haokip,Minister(Information & Public Relations) khuallian hiding a,Functional President in P. Bharat Singh,IAS, Commissioner(Information & Public Relations) pang ding hi. Huai function ah “Manipur at a glance” kichi Souvenir/journal hon hiding a, Manipur State Journalists Award-2009 leng mi 6 piak hiding uhi. Huai award ah citation leh Rs. 25,000 zel kithuah ding hi.

CM bungalow a guard-te kikheng

Imphal, Oct-30: Manipur Chief Minister tenna(official bungalow)  vengtu(guard)te CRPF hisek mahle uh state govt apan ngetna Union Home Ministry in a lemsakpih ziakin Central Industrial Security Force(CISF) nuaia Special Security Group(SSG) pawlin zan zingsang akipan in lata uh chihthu om hi. Zan zinglam in Kohima akipan in CISF personnel 96 vel Imphal hongtung in CM bungalow a security lam lenpah uh a,tunung sawtlou in CISF company khat in Raj Bhavan veng(guard) dingin Imphal hongtung pah ding uh hi’n kigen hi. 2-Manipur Rifles complex ah CISF hong om thakte adingin transit camp hon hi a, tulela CM security lam mawhpua M/R leh IRB pawl leng omlai ding uh a,SSG pawl kithuahpih zek lai ding uh chihthu om hi.

National Re-dedication day zat hiding

Imphal, Oct.-30 : Manipur solkal saina in Oct. 31, 2009 nitaklam dak 3:00 in 1st M/R Parade Ground ah Rashtriya Sankalt Diwas (National Re-dedication Day) zat hiding hi. Huai ah  Manpur Chief Minister  O.Ibobi Singh in Chief Guest hikawm in a uap ding banah Functional President in  Power Minister Phungzathang Tonsing  pang ding hi. BT Road a Congress Bhavan ah leng zinglam dak 11.00 in MPCC President Gaikhangam makaihna in Congress Bhavan ah MPCC President Gaikhangam makaihna in zinglam dak 11:00 in Rashtriya Sankalt Diwas (National Re-dedication Day)  zat hiding a, huai ah Chief Minister O. Ibobi in thugen ding hi .

IG AR/South in office bawlna ding hong

Imphal, Oct-30: IG AR/South Major General AK Choudhury in tuni’n Ukhrul vapha a Ukhrul a Tangkhul Naga Long office bawlna ding in suangphum hong(foundation laying) a,huaikhit in   Ukhrul a Baptist Church Pastor Rev. Aping Khamral in Pathian kiangah latna nei hi’n thutut kingah hi. Huai mun a  mipi kikhopna ah General in    thugen a,  Tangkhul Naga Long leh District Administration panlakna ziakin Ukhrul district galmuang hi a gen in Tangkhul Naga Long leh District Administration pahtakthu gen hi. Huai kikhopna ah Ashok Kumar,IAS, DC/Ukhrul leng tel hi.

Traffic tawh kisai in meeting om

Imphal, Oct.-30 : Transport Commissioner’ office ah tuni in traffic regulation tawh kisai kikupkhawmna om a, huai ah Imphal East leh West apan mi poimawh tamtak tel  uhi. Tua tawh kiton in Imphal khawpi sung a traffic banah parking  mun  tawh kisai leng gen uhi. Huai banah mun khenkhat gari parking na dia phallouhte  Oct. 27 a Director of Transport in thusuah a bawlna a mipi tamna mun a parking phal ding a chih pansan in parking  munding tuamtuam leng bikhiah  uhi.

Primary Teacher-te’n sit-in-protest nei

Imphal, Oct.-30:1997- Primary Teachers DPC Association pawl in a amau telna DPC result  puankhiak ding phutna in tuni in Keishampat junction ah sit-in-protest nei uhi. Amau a gendan un govt  in a ngaihsak kei aleh maban ah kiphinna nasa zawsem nei ding uh ahihdan taklang uhi. 1997 kum in Manipur solkal in Primary Teacher  sem ding mi 400 lak ding a gen in  DPC tanpha in omsak  mahle uh tunitan bangmah thuchian theih hi nailou hi. Hiai tawh kisai a solkal in a kinlam a DPC result puangkhe ding in tuni a sit-in-protest a tute’n deihthu gen  uhi

SP/Chandel in Nov 3 adin hunpia

Imphal, Oct-30: Chandel district a Village Defence Force(VDF) lakna ding in Oct 26-29,2009 sung Physical Efficiency Test(PET) om a, huai hunsunga tel theilou leh tel manlou candidate-te adingin SP/Chandel in November 3,2009 in PET om ding chi’n hunthak bikhiahsak a, zingsang dak 8.00 in PET omna mun ding tungkim chiat ding in candidate-te theisak hi.

Ziinling in mi tamtak patausak

Imphal, Oct-30: North-east region ah tuma deuh apan ziinling omsek ziakin mi tamtak patau hi’n kigen hi. Dakkal 24 paisa sung lelin leng ziinling 2vei om a, huaite zan nitak dak 10.31 in Richter scale 5.2 a hat in ling a,MET thusuak dan in akipatna munpi(epicenter) bel Bhutan mallampang hi’n kigen hi. Huailouin tuni zingsang baihtak dak 1.27 velin leng Richter scale 4.2 a hat ziinling om nawn a,epicenter be; Assam tumlam bial Kokrajhar kiang lak hi’n kigen hi. North-east bial ah ziinling hattak om dek ziakin tulai a ziinling thithe hidinga patau mi tamtak om hi.

- DOSRAP @ KK Valte

Print PDF