UPF/KNO leh Indian Army te’ makai in Concert thupitak in um

Hiai hun ah, Army te’n mipi ading in singpi athawn in hawm ua, CSD canteen leng nitaklam dak 4 apan Lamka Public ground a concert bawlna mun apan gamla lou ah hon in om hi. Concert apaikawm kawm in mi tamtak in Army te’ bawl nektheih chi tuamtuam lunggulh in lei zungzung ua, canteen a semte leng buai hial uh hi’n kigen hi. Lamka khawpi sung apan band minthang deuh teng apan lasak ngaihkhiakna om a, security khauh mahmah in, UPF, KNO leh Indian Army apan official tamtak tel uhi.

Concert neih sung in a vangkim in Army te’n tunglam ah cracker kapna nei ua, huai in concert su gam lum tuan mahmah hi’n kigen a, CCpur district khangthu ading in helpawl lian nih apan makaite a tutkhawm patna uleh, amaute saina a concert neih masakna ahihziak in CCpur district ading in tu nitak concert pen record break ahi chi’n chiamteh in om hial chih thu kiza hi.

Security khauhtak in duty sakin om a, buaina bawl muh ding a om louh ban ah, helpawlte’ sepaih (cadre) te thautawi lou in duty ua, mipite ading in naak nuam mahmah hi’n concert uap tamtak apan kiza hi. Gypsy nalh mahmah leh vuuk a chei ground sung ah tailut sak in om a, huai ah Christmas putek (Santa Claus) tuang in mipite muh theih ding in kilakkhia a, concert uap mipi tamtak in Santa Claus zui nuainuai uhi.

Concert saitute tupdan in Santa Claus in naupangte lak ah Christmas gift tuamtuam hawmkhiakna neiding chih himahleh, mipi’n Santa Claus kibawh huan maimah ua, Santa Claus in leng zalentak in thilthawn piak hawm theilou in, minute 10 vel nung in kihepkhiak san hi. Mipite’n Santa Claus tuanna Gypsy bawh maimah in a gift ngen ua, ak an tah mah bang suausuau uh hi’n kigen hi.

Source: Manipur Express | December 24, 2008 @ www.zogam.com