Zomi Council ah Kom Union, Manipur lut

Lamka, Oct 30: Zomi Council vaisaina in tuni’n Simveng a SYO Hall ah Zomi Council constituent member khat hidia Kom Union, Manipur laklutna programme zang ua, tua ah Zomi Council President Pu L.B. Sona in laklutna huhseh zang hi.

Hiai hun zatna a Kom Union President Pu Hmangloler Kom in a genna ah, ZC a lut ding toh kisai pen hun sawtpi apan ngaihtuah hi a, mi poimoh tuamtuam leh makai tuamtuamte muhkhit ahihnung in Kom Union Manipur cabinet thupukna toh ZC a lut ding a resolution lak ahihdan gen hi. ZC a lut thei dia hunlemchang bawlsaktute kiang ah leng kipahthu gen hi.

ZC President Pu L. B. Sona in a genna ah, ZC ah hong lut chi a zawl leng hilou, amau utna liauliau ban ah Zosuan ahih uh kitheichian a hong lut ahihna uah kipahhuai mahmah a, tuni pen Zosuante a ding a Ni Poimohpente lak a khat hi’n leng gen hi. Tuni chiang in ZC ah nam 8 omta a, hiaite ngetna government inleng a bildoh mahmah ding chi’n leng gen hi. ZC a Kom Union a lut toh kiton in ZYA, ZMA, ZSF leh ZHRF te ah leng constituent member ahi ding ua, tua a member ding amaute toh kithuzak a pelut ngal ding inleng theisak hi.

ZC President in tuni hun zatna ah, Oct. 1, 1998 Zomi-Kuki Peace Accord simkhiakna nei a, tua ah Zomi-Kuki kizahtaktuah a, Zomi/Kuki hih ding kuamah kidal louh ding; buai lai hun a inn-le-lou kilaksakte kipiakkik ding chih leh Zomi/Kuki lemsakpihna omlou a sum-le-pai kidon louh ding chihte ahihdan taklang thak hi.

Tedim-Chin Union President in, “Kom Union in MDC/MLA chih leh thil dang lamet nei a hong lut na hih uh leh tu nung chiang in na kisik ding uh, Zosuan taktak i hi chiatna uh chih kitheihtelna toh lut poimoh ahi” chi’n gen hi.

Hiai programme zoh nung a Lamka Post Editor toh Kom Union President leh Adviser Pu Lalkhopao Kom a houlimna ua a gen dan in, 2001 census dungzui in Manipur ah 20000 val Kom mi-le-sa om ua, tuate CCpur district sung Sangang area leh Bishnupur district Moirang area ah om ua, a dangte Senapati district a Sadar Hills east leh west ah leng om uh hi’n gen hi. A ban a genzelna ah, Zo kichi hon suangtu diktak ahihdan leh ZC policy Manipur a dia hoihpen ka sak ziak ua honglut ka hi ua, tua ding in mipite leng a kimin mahmah uh chi’n leng editor dotna dawng hi.

Source: http://zogam.com/index.php?option=com_content&task=view&id=4789