Maban ah Manipur in bang hon phutpih dia?

Kum chinglou naupang pimangna, helpawl tuamtuamte ziak a buaina leh protest, general strike, bandh leh public rally tungtawn mipi kiphinna tuamtuamte banah a tangpi thu a dan leh thupiak dinmun ni teng phial a kise hulhul in Manipur paidan luah dim hi. Hiai bang dinmun ziak in gam hoih leh nuamtak Manipur pen “Switzerland of the East” leh “Jewel of India” chih minkhem bang piak in ana om mahleh tu’n bel muanna leh bitna om nawnlou in Manipur polammite’n a hon mullit uh gentaklouh Manipur sung a tengte mahmah lungsim ah leng a om geuguau gige khat, lauhthawnna chi kituhta hi. Huai ziak in mipite lungsim ah mawk mai a dam zoklou ding ‘meima’ omta a, tulai a thil paidan et in i dinmun un hoihlam sang a siatlam manoh sem ding ahihdiam chih ngaihtuahlouh theihlouh khat suak hi.

Kha khat vel paita sung in niteng phial in newspaper teng phial ah helpawlte’n a sepaih ding ua kum chinglou naupangte a pimangna thu tuang gige a, thului kia hilou in hiai bang a naupang pimangna thu thak leng omtou den hi. Manipur a newpaper-te report dungzui in apaisa kha 6 sung in Manipur ah thagum a mi pimangna case 45 om a, huai lak a case 21-te ahihleh piching a kisim nailou leh kum chinglou a ngaih naupang kum 18 nuailamte pimangna case ahi uhi. Hiai thu 45 te’n July 16 tan a pimangna sawmna case, pimangna case, pimangtute apat suakte case leh pimangtute apat hutkhiak a omte case huamkhalou zomah hi. Case 45 lak a pimangna case 21-te ahihleh July kha sung kia a kum chinglou naupang 24 pimangna case hi a, hiai naupang 24-te lak ah naupang 5 khahkhiak in om ua, a dang 5-te ahihleh a pimangtute apat suakta thei uhi. Case 45 lak a case 24-te ahihleh government officer-te leh a dangdangte pimangna toh kisai hi uhi.

Hiai bang a kum chinglou naupangte pimangna thu in nu-le-pate patausak mahmah a, pawlpi tuamtuam leh school tuamtuamte’n naupangte mah zang a sit-in-protest leh public rally tamveitak a neihtak banuah general strike leh bandh bang leng tamveitak puan in ana omta hi. Sit-in-protest chauh leng tukha sung in Manipur phaizang bial a 30 bang omta hi. Kum chinglou naupangte pimangna tungtang a kiphinnate’n mipi a dia nawngkaina nasatak a tun dan gentaklouh ‘kuamah phawkphaklouh’ JAC tuamtuamte’n leng strike leh bandh chihte puang den ua, zanhal masa zek in leng khumbichilh in i om uhi. Singtangmite leng ‘vualphalou’ hituanlou i hihna uah govt. in school 171-te huhna piak nawnlouh dia thupukna a lak tungtang ah AMHGAESTA in Manipur pumpi huap di’n bandh puang ua, “JAC-te” hon khumbichilh vettak deihkhoplou in i gum zomah uhi.

Helpawl member hivek tel ding uh hiam chih muanmohhuai thei khop in security force te’n niteng in ‘helpawl hidia muanmoh’ mi 1 bek kaplum gige ua, tuni mahmah sunnung dak 2 ding vel in leng Laphupat ah Imphal West police commando te’n mi 2 kaplum nawn uhi. Helpawl member hitaktak hi’n hitaktaklou hitale uh, hiai in dan leh thupiak dinmun a tangpi thu a kise deuhdeuh ahihdan taklang hi. Dan leh thupiak dinmun kise deuhdeuh kia hilou in Manipur ah nekguk-takgukna uang mahmah zomah hi. Transparency International India in survey a bawl dan dungzui in India a nekguk-takguk a tamnapen state 4, “very high corruption” category ah Jammu and Kashmir, Assam leh Madhya Pradesh lak ah Manipur leng tel hi. Nagaland ahihleh “high corruption” category ah Chandigarh, Delhi, Kerela, Tamil Nadu leh Chhattisgarh lak a tel hi. Hichibang dinmun a i dinlai un thautui leh niteng poimoh van tuamtuam banah nek-le-tak man nakpitak in hong khang zomah hi. Hiai bang dinmun ah Manipur in maban ah bang hon phutpih peuhmah ding hiam chih ngaihtuah tham ching mahmah a, mautaam kialpi maituah dia kisate a ding ngial in patauhhuai mahmah hi.

Source: http://zogam.com/index.php?option=com_content&task=view&id=3984