Manipur Express | April 29, 2008

Lamka, April 28(BWN): Public Health Engineering Department (PHED) in tulai in Lamka khawpi sung a veng tuamtuam ah Centre Government apan Special Plan Assistance program nuai ah Lamka Khawpi tui nek khawlkhawmna ding bawlna neilel uhi. Manipur Express in muanhuaitak apan thu amuh dan in, Central Govt. in Special Plan Assistance (SPA) kichi scheme thupitak nuai ah sum tamtak State ah hong lut in district tuamtuam ah hawmkhiak in om a, Churachandpur in leng khantouhna nasepna a zat dingin Rs. 10 Crore ngah a, hiai pen district sung adiakin Lamka khawpi tui nek tawh kisai lam puahphatna ding a zat ding in sehkhiak in om chi uhi.

PHED Official khat in agenna ah, nasepna ding sum leng sanctioned khit ahih tak banah, contractor mi tamtak zang in nasepna leng pailel a, hiai nna enkol ding in Public Health Department khut ah mohpuakna piak ahi chi hi. Khawpi sung tuinek siangthou piaksuak ahih theihna ding in PHE dept. in naktak in buaipih in enkol ua; veng tuamtuam mun 12 ah water reservoir bawl in, tui hawm sawnna ding in water tanky neu mun 44 ah bawlna nei lel uh ahihdan taklang hi. Hiai fund zang in Lamka khawpi sung tui piakna ding in reservoir lian huntawk mun 12 ah bawl hi a, Lametna mun, Bungmual, Kashmir Veng D.Phailian, Hqtrs.Veng Dept. offi ce compound, Higher Secondary School Hilltown, Donbosco High School Salem Veng, Rengkai, Lamka College compound N.Lamka, Ebenezer compound N.Lamka, Tangnuam leh Thingkangphai ah khat chiat bawl ahihdan Official te apan kiza a, khawpi nawl tui piakna ding in Tuibuang ah khat kibawl lel a, Khaizang Veng ah khat mah bawl a om ahih dan gen uhi.

Pressmen te’n PHED official te kiang ah, sum le pai bang chi kizat hiam chih dotna abawlna uah, sum sanctioned te kizatna reservoir liante mun 12 abawlna bang, tui piak sawnna ding tuizeem neute tui litre 2000 chiat koih theihna ding veng tuam tuam mun 44 a bawlna bang, huan intake point bawlna leh puahphatna ding bang, approach road bawlna leh pipeline man a kiseng ahihdan gen ua, hiai tui zeem neute mi malmal ten tui alak sawnna dingua bawl ahih dan gen uhi. Press te’n Bungmual Lametna mun a kibawl reservoir study abawlna uah, metre 15 in sau a, avai lam let dan metre 7.5 hi a, a san dan ft. 9.6 phazou hi. Hiai ah tui litres 2.5 lacs ta zou ding a reservoir tungtawn in atawm pen in mihing 5000 in khamzou ding hi. Department thusuak dungzui in Lametna mun Bungmual, Kashmir Veng D.Phailian, Hqtrs. Veng, Secondary School Hilltown, Donbosco High School Salem Veng leh Tangnuam a reservoir om te ah Lanva lui tui laklut hiding a, Thingkangphai, Rengkai, Lamka College Compound N.Lamka leh Ebenezer compound N.Lamka a om te ading in Khuga Dam tui laklut hiding chi uhi.

Lametnamun akipan mun niam lam manoh in akhang suk lak tuam ding a, Tangnuam a om pen in Lanva, Pangzawl, Mualkawi lak pe ding a, Thingkangphai in Ngathal toh kikal kuamlak teng banah, N.Lamka huam zek in pe ding a, Ebenezer Academy leh Lamka College compound akipan in N.Lamka sung tui piak hi ding chi uhi. Rengkai a reservoir in apoimoh dan bang in Saikot khua lamtan piak theih ding a hisap ahihthu leng gen ua, Khawpi nawl lam adiak in Tuibuong leh Khaizang veng a kikoih te’n Sialmat zau huap in pe phei ding ua; Secondary School compound a pen in Hiangtam Lamka leh akhang suk lam teng pe ding hi’n kigen hi. Donbosco High School Salem Veng akipan in Central Lamka kuam suk Zenhang Lamka tan tui pe ding a, Hqtrs. veng a om pen in SSPP Residential school kuam huam in pe ding hi. Kashmir Veng akipan in Chiengkon leh Phaicham kuam tel in tui piak hiding in thusuak kingah hi.

HPC (D) in Tipaimukh Dam tungtang ah thusuah bawl
Tipaimukh Dam Project vanzat Rs 9 Crore vel man suksiat in om
Lamka, April 28: Union Power Minister Santosh Mohan Dev in December 16, 2006 ni a Tipaimukh Dam bawlkhiakna ding a Foundation stone ana honkhiak in buailam nawt hiaihiai ding in kilang a, apaisa Aril 25 in meltheihlouh pawl khat in Tipaimukh Dam site a kikoih vanzat tuamtuam te bomb sia in huai ah Rs 9 crore val man bang mangthang zouding hidanin thuthang kiza hi.

Thutut kingah dan in, Central Government leh Manipur state Government apan clearance om dungzui in, North East Electricity Power Corporation (NEEPCO) te panlakna tawh Tipaimukh Dam nasep pat hi a, April 25 in meltheihlouh galvan tawi pawlkhat in drilling machine tel in van zat chi tuamtuam bomb zang in va hihsia ua, huai ah Rs 9 crore manding susia uh hidanin kigen a, foundation stone tanpha leng kisevek hidanin gen uhi. Tipaimukh Dam a thiltung tawh kisai NEEPCO official te’n agendan un “April 25, 2008 in meltheihlouh galvan tawi tamtak Dam site ah hong lut in drilling machine tel in machine tuamtuam hong susia uh ahi” chi ua, a sum a tuat in Rs 9 crore vel man ding ahi chi uhi. Hiai buaina hun ah site a nasemte enkaitu Engineer 13 leh nasemtu 79 vel ana om khaklai tak uh hidanin gen uhi. Helpawlte’n Dam vanzat tuamtuam a suksiat utawh kiton in Engineer 13 te Silchar zuan in taimang ngal uh a, midang 79 te tunna gam theihchet hikei mahleh Barak luidung tawn in Cachar ah lut uh hiding in ginthu kigen hi.

Tipaimukh Multipurpose Project bawlkhiakna ding tawh kisai in gen le sak tam mahmah a, Manipur singtanggam sang mah in phaizang bial ah nasatak in nan in om zaw mawk hi.

Hiai thiltung tawh kisai in tuni in Hmar Peoles Convention (D) Barak Valley Commander Lalthulunglien Lungtau in thusuah bawl a, Tipaimukh bial mipi leh Hmar mipite’n Tipaimukh Dam bawlkhiak ding adeihlouh ziak ua hiai bang thil HPC (D) in nasem ahihdan taklang hi. HPC (D) thusuak in taklatna ah, Tipaimukh Multipurpose Project bawlkhiak sawm ahihna ah, NEEPCO leh Manipur Government in Tipaimukh Hmar mipite deihdan hilou ahihlam thei gegu in project nasep pai pih teitei ahi chi uhi. HPC (D) in NEEPCO kiang ah nasem nawnlou ding in bangzah vei hiam tak ngen mah leh tawpsan ut tuanlou uh chi’n leng L Lungtau in a thusuah ah gen hi. India leh Manipur apianma a Hmar te’n hiai bial ana opkhum khin ahihtak man in HPC (D) in humbit ding a, NEEPCO in mipite thuneihna leh dikna nelhsiah in hiai project paipih suakthei lou ding uh ahi chi uhi.

HPC (D)thusuak in agenbehna ah, a pupa gam a luahna uh Inche khat leng amawkmai in pekhe lou ding uh ahihdan gen in, gam leh leitang humbitna ah HPC(D) in a sisan uh akan dong in nasemtou zel ding uh ahihdan taklang uhi.

Centre team in Tipaimukh bial ah natna hiileng bangmah mulou
Lamka, April 28: Churachandpur District sung a om Tipaimukh bial ah natna hiileng ziak a naupang 20 val si chih thu tawh kisai in Centre apan expert team lawikhat apaisa April 25 2008 in zin ua, zan nitak in Lamka hongtung nawn ua, Centre team te’n tuni in Delhi zuan in Lamka nusia uhi.

Centre team a va zin official khat in agenna ah, Tipaimukh bial ah mautaam tawh kisai a natna hiileng epidemic kichi bangmah omlou ahihdan gen hi. Centre team te ahihleh, Dr Shyamal Biswal Joint Director & Officer Incharge, National Institute of Communicable Disease (NICD), Plague Surveilance Unit, NTI Campus, Bangalore, Dr Mishra Pathologist, NICD leh Dr Basu Assistant Professor & Padaestrian, Lady Hardinge College, New Delhi te hi ua, amaute Dr F Thienkhogin District Malaria leh Dr N Tualkhankham DSO in va kithuahpih uhi.

Tipaimukh bial vapha Centre team in agenna uah, zusa zun (urine) ziak in natna chi tuamtuam 12 bel om thei a, plague hii tanpha lengthei mah leh Tipaimukh bial ah tuabang natna hii aleng om mahmah lou in, naupangte leng chi dam mahmah uh ahihdan gen uhi. Expert team leader Dr Basu ngial in agendan in, naupangte neekle tak hoihlou (mal-nutrition) kichi omlou ahihdan gen in, New Delhi leh mun tuamtuam a slum area te ah bel thil om thei hi a, himahleh, Tipaimukh bial chet ah tuabang omlou ahihdan gen in, “adam theilua uh” chi in, “mautaam related malnutrition” kichi a om lam muh ahih kei chi hi. Amau’ Pherjawl ah naupang 30 leh Lungthulien ah naupang 5 leng va enkhia ua, lung himawh huailua kuamah va mulou uh hi’n gen uhi.

Ring well apat kia in si
T.Hemkholun (54) s/o (late) T.Henzalun of Tuibuong Happy Valley tuzing dak 8:30 vel in a Ringwell uh feet 35 vel athuk ah kia a,damzou lou in si hi. Thukizadan in Hemkholun in a Ringwell ua tuikhai akhau mong kikhih lou in kesuak ding in kisa a, a khau a bawhna lam ah kesuak suk kha hi’n kigen hi. Inn kim leh kiang te’n atheih un minute 5 vel nung in lakhia ua, kintak in District Hospital Casualty zinglam dak 9 vel in puaktung ahihnung in aliamna alu leh muntuamtuam thuakzou nawnlou in zinglam dak 9:40 vel in si hi. Misi luang asungkuan te’n pokhe ngal ua, Tuibuong ah Doctor leh Police te’n postmortem va bawl uhi. Tuahsiat na tungah Police te’n FIR chiamteh ua, tuni mah in misi kivui hi’n thu kiza hi. Hemkholun ahihleh tulel a DC office a Grade IV semlel hi’n kigen a DC staff te’n siluang Puamdum atuam in Belpi khat in si gal uhi.

Pingpei in mutsia
Lamka Public Ground ah “Summer Grafts Bazar 2008” neih nanga kibawl, April 27, nitaklam dak 1:20 vel in Pingpei hattak in atung a Langva bangzah hiam leh akhanglam pangteng abang(wall) langva mut sia in Langva bangzah hiam leng khia a, vangphat huai tak in kuamah sukha lou hi’n kiza hi .Nitaklam mah in amun agiak te’n Langva te kaikhawm in abang te bawl hoih nawn ua, inn tungbel bawl hoih nailou in asiatdandan in omlai hi.

ECCI Gen.Conference zouta uh
Evangelical Congregational Church of India 2nd General Conference April 25-27,2008 sung M. Songel ECA Church a om lawhchingtak in zouta uhi. Huai hunsung in Rev. Dr. Dino.L.Touthang, Executive Director, EFICOR in Pathian thugenna neia, General Conference sung in ECCI makai ding leh Budget 2008-2009 ding guanna nei uhi. ECCI makai thakte ahihleh General Director Rev.Lalrosiem Songate, Mission Director Rev.L.B Angam, Chairman BOT Elder L.S.Gangte,Vice Chairman BOT Rev.T.Janglhun, Chairman Mission Committee Elder Zamlal,Vice Chairman Mission Committee Rev.D.Jangkholam,Chairman Managing Board ECT Elder Holthang, Vice Chairman Managing Board ECT Rev.L.Sata te hi uhi. 2008-2009 sum zatding in Rs.66,33,766 guang ua, huai lak ah ECT ading in Rs.33,31,537, Mission Dept ah Rs.27,37,432 leh Head office ading in Rs.5,64,797 bikhiah uh hi’n thu kiza hi.

NYK ah interview omding
Nehru Yuva Kendra/CCpur nuai a 2008-2009 asem ding National Service Volunteers(NSV) leh Nehru Yuva Sathees (NYS) adinga application bawl teng in April 29, 2008 zinglam dak 11:30 in NYK office chamber ah interview nei ding uh hi’n thu kiza hi.

Application Form laktheih
Numei hinkhua zangkhial kibawl hoih utte adingin Priscilla Home, New Lamka ah Application Form Rs.10/ in Home mun ah laktheihta a, May 1,2008 zingdak 7 in Priscilla Home mun ah interview neih hiding in thu kiza hi.

Old age sum kihawm ding
National Old Age Pension Scheme(NOAP) Red Card neite ading in pension sum July 2007-December 2007 ading April 30-May 14, 2008 sung Police Station/CCpur ah District Social Welfare Officer saina in kihom khe ding hi. April 30-May 3,2008 sung CCpur Block, May 5&6,2008 in Henglep Block, May 7&8 in Tipaimukh Block, May 9&10,2008 in Singngat Block, May 12&13,2008 in Thanlon Block leh May14,2008 in Samulamlan Block te hi ding uh hi’n thu kiza hi.

DLCC meeting om ding
District Level Co-ordination Committee meeting April 30, 2008 sun dak 12 in DC office Conference Hall ah neih hidinga, huai ah SDO/BDO/DLO te tel ding uh hi’n kigen hi.

DC in Medical Camp ading pia
Thanlon khua a om 12th Madrassi Regiment te’n Thanlon leh Tipaimukh area mun tuamtuam ah Medical Camp sai ua, Damdawi lei nang in Sumant Singh, IAS,Deputy Commissioner/CCpur in BADP fund apat in kha khat paisa in Rs.50,000 pia a, tunai zek inleng Rs.10,000 pe nawn hi. Huaiban ah Thanlon khua a Hostel bawl nang in BADP fund apat mah in Rs.65,000 pia a, Hostel bawl nang ah ahihthei tan a naupang te khualna a lam tuamtuam a panpihna piak hi ding in leng DC in gen hi.

DC in Security te sam nawn
Apaisa August 21,2006 nitaka EBCC Vengnuam a thaukapna ah si leh liam te’ case ziak in DC/CCpur in DIG 27th Sector, CO 3rd AR, CO 41th Bn.BSF leh CO 3rd Raj.Rifle te kiang ah 5 vei sapna bawlta mahleh kua mah vahohlou uhi. DC/CCpur in a 6 vei nang in May 6, 2008 sun dak 12 in DC office ah sapna bawl nawn hi.

Henkholun gari in phukha
Henkholun (54) s/o (late) Jamkham of Vajing, zan nitaklam dak 4:30 vel in akhua ua Lampi nung ngat a lamnawl atulai Activa gari in phukha a, alu, anung leh akawng guh nasa in District Hospital ah om hi.

Halleluijah Vol.II kihong khia
KVC’ Home product,Gospel Audio-Visual Album, “the best of Lucy Lhinghoihkim Kom” in asak Halleluijah Vol.II hon khiakna April 27,2008 sun dak 12:30 in Synod Hall IB road ah om hi. Huai ah D.P.Haokip IRS Commissioner of Income Tax in Chief Guest hihna tawh hong khia a, Rev.Asong Leivom, Executive Secy. KRBCA, India in Pathian kiang ah latna nei hi.

UZO President in tanvou hawmna nei
United Zou Organisation, India a President thak T.Hangkhanpao in April 26,2008 in Zou Working Committee atelching thak te tanvou hawmna anuai abang in nei hi. Upa.Nengkhenthang Samte,V/President(Speaker&Chairman Zou Zumpi), Khamliankhup Lianzaw Zou,V/President(Chairman HEC), M.Sebastian Zou, Asst.Gen.Secy.,S.Jamgenthang,Treasurer, P.Tunzamang,Secy.(Finance), Upa H.Liankhanmang ,Secy.(Arts&Culture), Upa M.Zamkhosuan, Secy. (Archives&Memiors), James Khamchinsuan, Secy.(Literature&Youth Affairs), S.Lianminthang, Secy.(Home), Khamminlun G.Tungnung, Secy.(Inf.&Pub.) leh T.Khupzagin, Secy.(Organisation) te hidan in thusuak kingah hi.

Theihgige na suangphuh honna
K.Salbung Haanmual ah (late) Evan.Sonneh Haokip theihgige na suangphuh honkhiakna April 29, 2008 zinglam dak 10 in Rev.Paojalhun Haokip, Area Pastor K.P.A(E.C.A) in nei ding hi.

Chawilien Cancer damdawi Agency
Chawilien Cancer damdawi tawh kisai in April 25, 2008 in Chawilien Cancer Medicine Research Agency (CCMRA) kiphut khia ua, executive member leng guangna nei ngal uhi. A maute ahih leh Chairman Rev. V. Lalthalien Zote, V-Chairman Rev.Darsanglien Ruolngul, Secy. Lalhmuok Famhoite, Asst. Secy. Sanremsiama, Secy. Info. Laltanlien Famhoite, Finance Secy. Lalropuia Faiheng leh Treasurer in Rev. Hrangvela te hidan in taklang uhi. Huai ban ah committee member ding in midang 22 leng guan uhi. Hiai committee thusuak in ataklatna ah, Chawilien kithuahpih nuamte ading in “rawngbawlna maicham” kichi leng dawh a om ahihdan taklang ua, mipite adia lemtang zaw ding khualna in kalteng, Seppatni apan Kiginni zinglam dak 6-8 kikal ban ah nitaklam dak 2-4 kikal damdawi bawlna, hawmna leh nasepna neih zel hiding in taklang uhi. Pathian in thil hihtheihna apiakziak a Chawilien tungtawn a mi tamsem in damna angah theihna ding in kuapeuh in kithuahpih a thumna a phawk zel ding in Lalhmuok Famhoite Secretary leh Rev V Lalthalien Zote Chairman, CCMRA in Press tungtawn in ngetna bawl uhi.

www.manipurexpress.com

www.zogam.com